"މިޔަހެލި 2022"ގައި ބައިވެރިވުމުގެ ފުރުސަތު ހުޅުވާލައިފި

މިޔަހެލި 2022ގައި ބައިވެރިވުމުގެ ފުރުސަތު ހުޅުވާލައިފިއެވެ.

"މިޔަހެލި" އަކީ 2016 ވަނަ އަހަރުން ފެށިގެން ޔޫއެންޑީޕީ މޯލްޑިވްސްއާއި އުރީދޫ މޯލްޑިވްސް ގުޅިގެން، އެހެނިހެން ފަރާތްތަކުގެ އެހީއާއެކު ޒުވާނުން ބާރުވެރިކުރުވައި އިޖުތިމާއީ ކަންކަމަށް ހައްލުހޯދުމުގެ މަގުސަދުގައި ބާއްވާ ސޯޝަލް އިނޮވޭޝަން ޗެލެންޖެކެވެ. މިހާތަނަށް އިންތިޒާމުކުރެވުނު މިޔަހެލި ސޯޝަލް އިނޮވޭޝަން ޗެލެންޖުތަކަކީ ޒުވާނުންނަށް އަމާޒުކުރެވިގެން ހިންގާފައިވާ ޕްރޮގްރާމްތަކެކެވެ. އަދި ކޮންމެ އަހަރަކުވެސް މިޔަހެލި ކާމިޔާބުކުރާ ޒުވާނުންނަށް އެފަރާތްތަކުން ހުށަހަޅާފައިވާ މަސައްކަތްތައް ހަ މަސްދުވަހުގެ މުއްދަތެއްގެ ތެރޭގައި ޕައިލެޓް ކުރުމަށް ސީޑް ފަންޑިންގ ފޯރުކޮށްދެވިފައިވެއެވެ.

މިޔަހެލި 2022ގައި އައު އީޖާދުތަކާއި ހައްލުތައް ހުށަހެޅުމަށް ހުޅުވާލެވިފައިވަނީ "ޕީޕަލް، ޕްލެނެޓް އެންޑް ޕްރޮސްޕެރިޓީ" މި ޝިއާރުގެ ދަށުންނެވެ. މި ޝިއާރުގެ އަމާޒަކީ ދެމެހެއްޓެނިވި ތަރައްގީގެ ލަނޑުދަނޑިތައް ހާސިލުކުރުމުގެގޮތުން ބަދަލުތައް ގެންނާނެ މީހުންނާއި ތަޖުރިބާކާރުންނާއި، ދުނިޔެ އަދި ތަރައްގީގެ ރޮނގުތަކުން ބަދަލުތައް ގެންނާނެފަދަ އީޖާދީ ޚިޔާލުތައް އެއްތަންކުރުމުގެ ނިޔަތުގައި މަސައްކަތްކުރުމެވެ. އަދި މި ސޯޝަލް އިނޮވޭޝަން ޗެލެންޖުގެ މަގުސަދަކީ މި ޕްރޮގްރާމުގެ ބައިވެރިންގެ ފަރާތުން، މުޖުތަމައުގައި ހަވާސާކުރެވިފައިވާ ފަރާތްތަކަށް އެއްހަމައެއްގައި ފުރުސަތުތައް ހޯދައިދީ، އެފަރާތްތަކުގެ ބައިވެރިވުން އިތުރުކޮށް، ސައިންސަށް ބިނާކޮށް، ތިމާވެއްޓަށާއި މުޖުތަމައުއަށް ދިމާވާ މައްސަލަތަކަށް ފައިދާހުރި ހައްލު ހޯދުމުގެގޮތުން އައު ވިސްނުމެއްގައި މަސައްކަތްކުރުމެވެ.

ކުރިން އަހަރުތަކާއި ޚިލާފަށް، މިޔަހެލި ސޯޝަލް އިނޮވޭޝަން ޗެލެންޖް 2022 ހުޅުވާލެވިފައިވަނީ މަދަނީ ޖަމްއިއްޔާތަކަށެވެ.

މިޔަހެލި ކޭމްޕްގައި ބައިވެރިވުމަށް 13 ޖަމްއިއްޔާ ހޮވުމަށް ހަމަޖެހިފައިވާއިރު، ބައިވެރިވާ ޖަމްއިއްޔާތަކުގެ ތެރެއިން 3 ޖަމްއިއްޔާއަކަށް އެ ފަރާތެއްގެ އީޖާދީ ހައްލުތައް ޕައިލެޓްކުރުމަށް ސީޑް ފަންޑިންގ ދޫކުރެވޭނެއެވެ. މިޔަހެލި ސޯޝަލް އިނޮވޭޝަން ޗެލެންޖް ކާމިޔާބުކުރާ ފަރާތްތަކަށް އެ ޖަމްއިއްޔާތަކުން ހުށަހަޅާފައިވާ ތަސައްވުރު 6-8 މަސްދުވަހުގެ ތެރޭގައި ތަންފީޒުކޮށް ޕައިލެޓްކުރުމަށް 300،000 ދިވެހި ރުފިޔާގެ ސީޑް ފަންޑިންގ ފޯރުކޮށްދީ، މަޝްރޫއުތައް ސްކޭލްކުރުމަށް އިތުރު ފުރުސަތުތައް ފަހިކޮށްދެވޭނެއެވެ. މިޔަހެލި ކާމިޔާބުކުރާ 3 ޖަމްއިއްޔާގެ ތެރެއިން 2 ޖަމްއިއްޔާ ހޮވާލެވޭނީ މާލެ ސިޓީ ނޫން އެހެން ސަރަހައްދުތަކުގައި އިދާރީ މަސައްކަތްތައް ހަމަޖެހިފައިވާ މަދަނީ ޖަމްއިއްޔާތަކަށް އިސްކަންދީގެންނެވެ. 

މިޔަހެލި 2022 ރޭވިފައިވަނީ މަދަނީ ޖަމްއިއްޔާތަކަށެވެ. އަދި މިފުރުސަތުގައި ބައިވެރިވުމަށް ދިވެހިރާއްޖޭގައި ރަޖިސްޓަރީކޮށްފައިވާ ހުރިހާ މަދަނީ ޖަމްއިއްޔާތަކަށް އެޕްލިކޭޝަން ފޯމު ހުށަހެޅޭނެއެވެ. ހަތަރު ދުވަހުގެ މުއްދަތަކަށް ކުރިއަށް ގެންދާ މިޔަހެލި ކޭމްޕްގައި ބައިވެރިވުމަށް ހޮވާލެވޭ ކޮންމެ ޖަމްއިއްޔާއެއްގެ 3 މަންދޫބުން (ރައީސް/ޗެއާޕާސަން/ބޯޑު މެމްބަރު، ޖެނެރަލް ސެކެޓްރީ/ސީއީއޯ އަދި ޑެޑިކޭޓެޑް ޕްރޮގްރާމް ސްޓާފެއް) ބައިވެރިވާނެއެވެ.

މިޔަހެލި ސޯޝަލް އިނޮވޭޝަން ކޭމްޕް ކުރިއަށް ގެންދިއުމަށް ހަމަޖެހިފައިވަނީ ނޮވެމްބަރ 17ން 20ށެވެ. މިޔަހެލީގައި ބައިވެރިވުމަށް ހޮވޭ ފަރާތްތަކަށް، ކޭމްޕް އޮންނާބެ ތަން، ފެށޭ ތާރީޚާ ކައިރިކޮށްފައި ހާމަކުރެވޭނެއެވެ. މިޔަހެލި 2022ގައި ބައިވެރިވުމަށް ފޯމު ހުށަހެޅުމަށް މިހާރު ވަނީ ހުޅުވާލެވިފައެވެ. ފޯމު ހުށަހެޅުމުގެ ސުންގަޑިއަކީ 2 ނޮވެމްބަރ 2022ގެ 23:59އެވެ.

މަދަނީ ޖަމްއިއްޔާތައް މިޔަހެލި 2022ގައި ބައިވެރިވުމަށް ފޯމު ހުށަހަޅާއިރު، އިޖުތިމާއީގޮތުން ރާއްޖޭގައި ކުރިމަތިވާ ކޮންމެވެސް މައްސަލައަކަށް ހައްލެއް ހޯދައިދެވޭފަދަ އީޖާދީ ޚިޔާލެއް ނުވަތަ ޕްރޮޖެކްޓެއް ހިމަނަންވާނެއެވެ. ޚިޔާލު ހުށަހަޅާއިރު ފުރިހަމަ ހައްލެއް ހުށަހަޅާކަށްނުޖެހެއެވެ. ނަމަވެސް، މަދަނީ ޖަމްއިއްޔާތަކުން ޚިޔާލު/ޕްރޮޖެކްޓު ހުށަހަޅާއިރު، އެޚިޔާލުން ހައްލުކުރަން މަސައްކަތްކުރާ މައްސަލައާއި، ޚިޔާލު/ޕްރޮޖެކްޓު އަމާޒުކުރެވޭ ފަރާތްތަކާއި، ޚިޔާލު/ޕްރޮޖެކްޓުގެ ސަބަބުން ކުރާނޭ އެދެވޭ އަސަރުތަކާއި، ޕްރޮޖެކްޓް ދިގު މުއްދަތަކަށް ދެމެހެއްޓުމަށް އަޅާނޭ ފިޔަވަޅުތައް، ހެކި/މިސާލާއެކު ޚުލާސާކޮށް ބަޔާންކުރަންވާނެއެވެ.

ފޯމު ހުށަހަޅާއިރު އިސްވެދިޔަ މައުލޫމާތު ޚުލާސާކޮށް ބަޔާންކުރަންވާނެއެވެ. އަދި ޝޯޓްލިސްޓުވެގެން މިޔަހެލި 2022ގައި ބައިވެރިވާ 13 މަދަނީ ޖަމްއިއްޔާއަކުން، އެފަރާތްތަކުން ހުށަހެޅި އިޖާދީ ޚިޔާލު/ޕްރޮޖެކްޓް އިތުރަށް ފުރިހަމަކުރުމަށް މަސައްކަތްކުރާނެއެވެ. އަދި މި މަސައްކަތުގައި ފަންނީ މާހިރުންނާއި، ފެސިލިޓޭޓަރުންނާއި، މެންޓަރުންގެ އެހީ ލިބޭނެއެވެ.