އެމްއެންޑީއެފުން ކަމަދޫގައި ޚާއްސަ މެޑިކަލް ކޭމްޕެއް ފަށައިފި
20 އޮކްޓޯބަރު 2022 | ބުރާސްފަތި 06:30މިއީ ދެ ދުވަހަށް ކުރިއަށްގެންދާ ކޭމްޕެއް
އެމްއެންޑީއެފުން ކަމަދޫގައި ކުރިއަށްގެންދާ ކޭމްޕް
އެމްއެންޑީއެފް މެޑިކަލް ކޯރއިން "ސިފައެހީ މެޑިކަލް ކޭމްޕް" ގެ ނަމުގައި ބ.ކަމަދޫގައި ކޭމްޕެއް ފަށައިފިއެވެ.
މި ކޭމްޕް ފަށާފައިވަނީ މިމަހުގެ 19 ވަނަ ދުވަހުއެވެ. 20 ވަނަ ދުވަހުގެ ރެއާ ހަމައަށް މި ކޭމްޕް ކުރިއަށްގެންދާނެއެވެ.
ރާއްޖެއެމްވީއަށް މައުލޫމާތުދެއްވަމުން ކަމަދޫ ސިއްހީ މަރުކަޒުގެ އެޑްމިނިސްޓްރޭޓަރު އަހުމަދު ސާޖިދު ވިދާޅުވީ މިއީ ކަމަދޫ ސިއްހީ މަރުކަޒުގެ 14 ވަނަ އަހަރީ ދުވަހާ ގުޅިގެން ކުރިއަށްގެންދާ ކޭމްޕެއް ކަމަށެވެ. މިއީ ކަމަދޫ ސިއްހީ މަރުކަޒާއި، ކަމަދޫ ކައުންސިލާއި، ގެސްޓްހައުސްތަކާއި، ބ. އަތޮޅު ހޮސްޕިޓަލުގެ އެއްބާރުލުމާއެކު ކުރިއަށްގެންދާ ކޭމްޕެއް ކަމަށް އޭނާ ވިދާޅުވިއެވެ.
ސާޖިދު ވިދާޅުވީ މި ކޭމްޕުގައި ސެނަހިޔާގެ 7 ޑޮކްޓަރުންގެ ޓީމެއް ހަރަކާތްތެރިވަމުންދާކަމަށެވެ. މި ޓީމުގައި އެތެރެހަށީގެ ޚާއްސަ ޑޮކްޓަރަކާއި، ސްކޭން ޑޮކްޓަރަކާއި، އޮޕަރޭޝަން ޑޮކްޓަރަކާއި، ކަށީގެ ބަލިތަކަށް ޚާއްސަ ޑޮކްޓަރަކާއި، ކުޑަކުދިންގެ ބަލިތަކަށް ޚާއްސަ ޑޮކްޓަރަކާއި، ފުއްޕާމޭގެ ބަލިތަކަށް ޚާއްސަ ޑޮކްޓަރެއްގެ އިތުރުން ދަތުގެ ބަލިތަކަށް ޚާއްސަ ޑޮކްޓަރެއް ހަރަކާތްތެރިވެއެވެ.
ސާޖިދު އިތުރަށް ވިދާޅުވީ މި ކޭމްޕުގެ އިތުރުން ފަސްޓް އެއިޑް ޕްރޮގްރާމެއް ވެސް ކުރިއަށްދާކަމަށެވެ. މި ޕްރޮގްރާމްގައި 30 މީހުން ބައިވެރިވާކަމަށް އޭނާ ވިދާޅުވިއެވެ.
މި ކޭމްޕް ނިންމަން ހަމަޖެހިފައިވަނީ ބުރާސްފަތި ދުވަހުގެރެއެވެ. ކޭމްްޕް ނިމިގެންދާނީ މިކަމަށްޓަކާ ބާއްވާ ޚާއްސަ ހަފްލާއަކުން ކަމަށް ސާޖިދު ވިދާޅުވިއެވެ.
