ފަހު ވަގުތު ވަޔެކާނޯ އިން އެތުލެޓިކޯ ހިފަހައްޓައިފި

ސްޕެނިޝް ލީގުގައި ރަޔޯ ވަޔެކާނޯއާ ދެކޮޅަށް ކުޅުނު މެޗުން އެތުލެޓިކޯ މެޑްރިޑު އެއްވަރުވެއްޖެއެވެ.

އަންގާރަ ދުވަހުގެ ރޭ އެތުކޯލެޓިގެ އަމިއްލަ ދަނޑުގައި ކުޅުނު މެޗު އެއްވަރުވީ 1-1 އިންނެވެ. މެޗުގައި ފުރަތަމަ ލަނޑު ޖަހާ ލީޑު ނެގީ އެތުލެޓިކޯއިންނެވެ. އެއީ މެޗުގެ 20 ވަނަ މިނެޓުގައި އެންޓޮއިން ގްރީޒްމަން އަރިމަތިން ނަގައިދިން ބޯޅައެއް، އޭރިޔާ ތެރޭގައި ހުރެ ގޯލުގެ ތިރީ ކަނަށް ފޮނުވާލައިގެން އަލްވާރޯ މޮރާޓާ ކާމިޔާބުކޮށްދިން ލަނޑެކެވެ. ނަތީޖާ ހަމަހަމަ ކުރުމަށް ވަޔެކާނޯއިން ކުރި މަސައްކަތުގެ ހުރަކަހަކަށްވީ އެތުލެޓިކޯގެ ގޯލް ކީޕަރެވެ.

މެޗު ނިމެން މަދު ވަގުތުކޮޅަކަށްވެފައި ވަނިކޮށް، އެތުލެޓިކޯގެ ޑިފެންޑަރު ގިމިނޭޒްގެ އަތުގައި ބޯޅަ ޖެހުމުން ރެފްރީ ވަނީ ވީއޭއާރު ބެލުމަށްފަހު ވަޔެކާނޯ އަށް ޕެނަލްޓީއެއް ދީފައެވެ. ލިބުނު ޕެނަލްޓީ ކާމިޔާބުކޮށް ވަޔެކާނޯ އަށް ނަތީޖާ ހަމަހަމަކޮށްދިނީ ރަޑަމެލް ފަލްކާއޯއެވެ.

މެޗުން އެއްވަރުވެ ލިބުނު އެއް ޕޮއިންޓާއެކު، 10 މެޗުން ޖުމުލަ 20 ޕޮއިންޓު ހޯދައިގެން އެތުލެޓިކޯ އޮތީ ތާވަލްގެ ދެ ވަނަ މަގާމުގައެވެ. ވަޔެކާނޯ އޮތީ 10 މެޗުން 12 ޕޮއިންޓާއެކު 10 ވަނައިގައެވެ.