މި މަހުގެ 28 ގައި އިސްލާމީ މަރުކަޒުގައި މުފްތީ މެންކް ހުކުރު ކުރައްވާނެ: އިސްލާމިކް މިނިސްޓަރު

މިމަހުގެ 28ވާ ހުކުރު ދުވަހު އިސްލާމީ މަރުކަޒުގައި އިމާމްވެ ހުކުރު ނަމާދު ކުރައްވާނީ މަޝްހޫރު ދީނީ އިލްމުވެރިޔާ އިސްމާއީލް ބިން މޫސާ (މުފްތީ މެންކް) ކަމަށް އިސްލާމިކް މިނިސްޓަރު ޑރ. އަހްމަދު ޒާހިރު އަލީ ވިދާޅުވެއްޖެއެވެ.

މިނިސްޓަރު ކުރެއްވި ޓުވީޓެއްގައި ވިދާޅުވީ މި މަހުގެ 28 ވަނަ ދުވަހު އިސްލާމީ މަރުކަޒުގައި މުފްތީ މެންކް ޚުތުބާ ދިނުމަށް ހަމަޖެހިފައިވާ މަޢުޟޫ ޢަކީ މާތް ﷲ އާ އޮންނަ ގުޅުން ބަދަހިކުރުން ކަމަށެވެ.

އިސްލާމިކް މިނިސްޓަރު މިހެން ވިދާޅުވެފައިވާއިރު އިސްލާމިކް މިނިސްޓްރީގެ މީޑިއާ ކޯޑިނޭޓަރު އިސްމާއިލް އަފްރާހު ވަނީ މި މަހުގެ 28ން 31ށް މުފްތީ މެންކު ރާއްޖެއަށް ކުރާ ދަތުރުފުޅުގައި 4 ތަނެއްގައި ދަރުސް ދެއްވުމަށް ހަމަޖެހިފައިވާ ކަމަށް ވިދާޅުވެފައެވެ.

މި މަހުގެ 28 ވަނަ ދުވަހުގެރޭ އަލިމަސް ކާނިވަލުގައި ދަރުސް ދެއްވާއިރު، 29 ވަނަ ދުވަހުގެރޭ ފުވައްމުލަކު ސިޓީގައި، 30 ވަނަ ދުވަހުގެރޭ އައްޑޫ ސިޓީގައި އަދި 31 ވަނަ ދުވަހުގެރޭ ހުޅުމާލޭގައި ދަރުސް ދެއްވަން ވަނީ ހަމަޖެހިފައެވެ.

އަފްރާހު ވިދާޅުވީ ދަރުސްތައް ކުރިއަސްދާނީ ވަކި މައުޟޫއަކަށް ވާހަކަދައްކަވާ ގޮތަށް ކަމަށެވެ. އެހެންނަމަވެސް ދަރުސް ކުރިއަށްދާނީ ސުވާލު ކުރެވޭ ގޮތަކަށް ނޫން ކަމަށާއި، ދަރުސްތަކުގައި އާންމުންނަށް ބޭނުންވާ މުހިންމު މައުލޫމާތުތައް ގެނެސްދެެވިގެންދާނެ ކަމަށް އޭނާ ވިދާޅުވިއެވެ.

މިއީ މުފްތީ މެންކު ރާއްޖެއަށް ކުރައްވާ މިފަދަ ތިންވަނަ ދަތުރުފުޅެވެ. މުފްތީ މެންކު އެންމެފަހުން ރާއްޖެ ވަޑައިގަތީ 2020 ވަނަ އަހަރުއެވެ. އެ ދަތުރުފުޅުގައި ދަރުސް ދެއްވީ ހދ. ކުޅުދުއްފުށީގައެވެ.