2016 ވަނަ އަހަރުން ފެށިގެން 2021 ވަނަ އަހަރުގެ ނިޔަލަށް 1،072 މިލިއަން ރުފިޔާ ނުވަތަ 1 ބިލިއަން ރުފިޔާގެ ގެއްލުން މިފްކޯއަށް ލިބިފައިވާކަމަށް އެ ކުންފުނީގެ އޮޑިޓް ރިޕޯޓުން ދައްކައިފިއެވެ.

މިފްކޯގެ އޮޑިޓުގައި ބުނެފައިވަނީ 2016 ވަނަ އަހަރުން ފެށިގެން 2021 ވަނަ އަހަރުގެ ނިޔަލަށް މިފްކޯއަށް އާމްދަނީގެ ގޮތުގައި ޖުމްލަ 6.9 ބިލިއަން ރުފިޔާ ލިބިފައިވާ ކަމަށެވެ. ނަމަވެސް މި މުއްދަތުގެ ތެރޭގައި ވިކުނު މުދާ އުފެއްދުމަށް ހިނގި ހަރަދު، އެ މުދާ ވިއްކުމުމުން ލިބުނު އާމްދަނީ އަށްވުރެ އިތުރުކަމަށެވެ. އެގޮތުން ކޮސްޓް އޮފް ސޭލްސްގެ ގޮތުގައި 7.1 ބިލިއަން ރުފިޔާ ހަރަދުވެފައިވެއެވެ.

މި ހަރަދުތަކުގެ ތެރޭގައި ރާއްޖޭގެ މަސްވެރިންގެ އަތުން މަސް ގަތުމުގެ ހަރަދާއި އަދި އެ މަސް އެކްސްޕޯޓް ކުރުމަށްޓަކައި މިފްކޯގެ ފެކްޓަރީތަކުގައި މަސް ޕްރޮސެސް ކުރުމުގެ ހަރަދު ހިމެނެއެވެ. ނަތީޖާއެއްގެ ގޮތުން 2016 ވަނަ އަހަރުން ފެށިގެން 2021 ވަނަ އަހަރުގެ ނިޔަލަށް، 2017 ވަނަ އަހަރުގެ ފިޔަވައި ހިމެނޭ ހުރިހާ އަހަރުތަކެއްގައި ވެސް މަހުގެ އުފެއްދުންތައް ވިއްކުމުން ޖުމްލަ 250 މިލިއަން ރުފިޔާގެ ގެއްލުން ލިބިފައިވެއެވެ.

މިފްކޯގެ އަހަރީ ރިޕޯޓްތަކުން އެނގޭގޮތުގައި 2016 ވަނަ އަހަރުން ފެށިގެން 2021 ވަނަ އަހަރުގެ ނިޔަލަށް މިފްކޯއިން މަސްވެރިންގެ އަތުން އެވްރެޖްކޮށް މަސް ގަނެފައިވަނީ ދުނިޔޭގެ ބާޒާރުގައި މަސް ވިއްކެން ހުރި އަގަށްވުރެ މަސްޓަނަކުން 7458 ރުފިޔާ ކުޑަ އަގުގައެވެ. އެގޮތުން މި މުައްދަތުގެ ތެރޭގައި އެވްރެޖްކޮށް މަސްޓަނެއް 24،845 ރުފިޔާއަށް ވިއްކާފައިވާ އިރު، މަސްވެރިންގެ އަތުން މަސް ގަނެފައިވަނީ ޓަނަކަށް 17،387 ރުފިޔާއަށް ކަމަށް އޮޑިޓްގައި ބުނެފައިވެއެވެ.

މިފްކޯއަށް މަސްގަންނަ ރޭޓާއި ވިއްކާ ރޭޓާ ދެމެދު 7458 ރުފިޔާގެ ޕްރޮފިޓް މާޖިންއެއް ހުރި ނަމަވެސް، މަސް ގަތުމަށް ހިންގާ ހަރަދުގެ އިތުރުން މަސް ފިނިކޮށް ރައްކާކުރުމަށާއި، ޕްރޮސެސް ކުރުމުގެ ހަރަދު ހިމެނުމުން، މަސް ޓަނަކަށް ޖެހޭ އަގު ދުނިޔޭގެ ބާޒާރުގައި މަސްވިއްކާ ރޭޓަށްވުރެ ބޮޑުކަން ފާހަގަކޮށްފައިވެއެވެ.

މީގެ އިތުރުން އިދާރީ ހިންގުމަށާއި، ހިންގުމުގެ އެހެނިހެން ހަރަދުތައް ހިމެނުމުން 2016 ވަނަ އަހަރުން ފެށިގެން 2021 ވަނަ އަހަރުގެ ނިޔަލަށް ޖުމްލަ 1072 މިލިއަން ރުފިޔާގެ ސާފު ގެއްލުން މިފްކޯއަށް މި މުއްދަތުގެ ތެރޭގައި ލިބިފައިވެއެވެ.

މިފްކޯއަށް ގެއްލުންވަމުންދާ ސަބަބުތަކުގެ ތެރޭގައި، މަސްވެރިންގެ އަތުން މަސް ގަތުމަށް ސަރުކާރުން ކަނޑައަޅާ ރޭޓަކީ، މަސް އެކްސްޕޯޓް ކޮށްގެން ލިބޭ އަގާ އަޅާބަލާއިރު ނިސްބަތުން ބޮޑު އަގަކަށްވުމާއި، ކުންފުނިން ކުރާ ބައެއް އިންވެސްޓްމަންޓްތަކުން ގެއްލުންވަމުން ދިއުމާއި، ކުންފުނީގެ ހިންގުމުގެ ހަރަދު ބޮޑުވުމުގެ އިތުރުން، އެކްސްޕޯޓްކުރާ މަގުގެ ޝިޕްމެންޓުތަކުގައި ހުންނަ މަހުން ބައެއް ގަންނަ ފަރާތްތަކުން އެކި ސަބަބުތަކާހުރެ ގަބޫލުނުކޮށް ދޫކޮށްލުމުންނާއި، އަދި އެކްސްޕޯޓްކުރާ މަހުގެ ސައިޒާއި ބާވަތްތައް ތަފާތުވުމުގެ ސަބަބުން ލިބޭ ގެއްލުމުގެ ނިސްބަތް އިތުރުވުން ހިމެނެއެވެ.

މިގޮތުން މިފްކޯއިން ކޮށްފައިވާ އިންވެސްޓްމަންޓުތަކުން 60.1 މިލިއަން ރުފިޔާގެ ގެއްލުން ވެފައިވާއިރު، 2016ން 2021 ވަނަ އަހަރުގެ ނިޔަލަށް އެކްސްޕޯޓްކުރި މަހުގެ ޝިޕްމެންޓްތަކުން 290 މިލިއަން ރުފިޔާގެ ގެއްލުންވެފައިވެއެވެ. މިއީ އެވްރެކްޖޮށް އަހަރަކަށް ލިބެންޖެހޭ އާމްދަނީގެ 6 އިންސައްތައެވެ. އަދި އިންޑަސްޓްރީގެ އެވްރެޖް ގެއްލުމުގެ ރޭޓްކަމުގައި ބަލާ 2.5 އިންސައްތައާއި އަޅާބަލާއިރު 166 މިލިއަން ރުފިޔާ އިތުރު އަދަދެކެވެ.