އިނގިރޭސިވިލާތުގެ ބޮޑުވަޒީރު، ލިޒް ޓްރަސްގެ އަމިއްލަ ޕާޓީ ކަމަށްވާ، ކޮންޒަވޭޓިވް ޕާޓީގެ މެމްބަރުން އެކަމަނާގެ އިސްތިއުފާއަށް އެދެން ފަށައިފިއެވެ.

އެ ޤައުމުގެ މިހާރުގެ ހާލަތަށް ރިއާޔަތް ކުރައްވަައި މަޖިލިސް މެމްބަރުން ކަމަށްވާ ކްރިސްޕިން ބްލަންޓާއި އެންޑްރޫ ބްރިޖެން އާއި ޖޭމީ ވަލިސް ވަނީ ފާޅުގައި ޓްރަސްގެ އިސްތިއުފާއަށް ގޮވާލައްވާފައެވެ. އެ ތިން ބޭފުޅުން ޓްރަސް ސިފަކުރައްވަނީ މަގާމެއްގައި ހުންނެވި ނަމަވެސް ބާރެއް ނެތް ވެރިއެއްގެ ގޮތުގައެވެ.

ޑެއިލީ މެއިލް އިން ރިޕޯޓު ކުރާ ގޮތުގައި ޓްރަސް މަގާމުން ވަކި ކުރުމުގެ މަސައްކަތް މި ހަފްތާގައި ފަށާނެއެވެ. އެގޮތުން އެކަމަނާއާ ދެކޮޅަށް 100 އަށްވިރެ ގިނަ މެމްބަރުން އިތުބާރު ނެތްކަމުގެ ސިޓީ ހުށަހަޅުއްވާނެ ކަމަށް ވެސް ވަނީ ރިޕޯޓުކޮށްފައެވެ.

ލިޒް ޓްރަސްގެ މަގާމާ މެދު ސުވާލު އުފެދިފައިވަނީ އިނގިރޭސިވިލާތުގެ އިގްތިސާދު ދަށްވެފައިވާ ދަނޑިވަޅެއްގައި އިގްތިސާދު ވެއްޓުނަނުދިނުމަށް އެކަމަނާ ގެންގުޅުއްވާ ސިޔާސަތުތަކުގެ ސަބަބުންނެވެ. އެގޮތުން އިގްތިސާދީ ހާލަތައް ބަލައި ރައްޔިތުންނަށް ޓެކުހުން ދީފައިވާ ލުއިތައް އުވާލުމަށް އެކަމަނާ ޗާންސެލަރގެ މަގާމަށް އަލަށް އައްޔަން ކުރެއްވި ޖެރެމީ ހަންޓު ވަނީ ނިންމަވާފައެވެ.

ތަކެތިގެ އަގު އުފުލެމުންދާތީ އިނގިރޭސިވިލާތުގައި މުޒާހަރާތައް ވެސް ދަނީ ކުރަމުންނެވެ.

މަގާމުން ވަކި ކުރަން އުޅޭ ވާހަކަތަކާ ގުޅިގެން ޓްރަސް، ބީބީސީއަށް ވިދާޅުވެފައިވަނީ ދެން އޮންނަ އާއްމު އިންތިޚާބަކާ ހަމައަށް ކޮންޒަވޭޓިވް ޕާޓީގެ ލީޑަރުގެ ގޮތުގައި ހުންނަވާނެ ކަމަށެވެ. އަދި އެއްވެސް ގޯހެއް ހެދިފައިވާނަމަ މައާފަށް އެދޭ ކަމަށް އެކަމަނާ ވިދާޅުވިއެވެ.

ލިޒް ޓްރަސް ބޮޑުވަޒީރުކަަމާ ހަވާލުވެވަޑައިގެންނެވިތާ ވީ އެންމެ ހަ ހަފްތާއެވެ.