ގަތަރުގެ ޝާހީ އާއިލާއަށް ރާއްޖެއިން ރަށެއް ދޭން އުޅޭކަމަށް "ދިޔަރެސް" ނޫހުގައި ވަނީ ދޮގު ޚަބަރެއް
17 އޮކްޓޯބަރު 2022 | ހޯމަ 10:56ޅ. އަތޮޅުގެ ދެ ރަށެއް ދެއްވަން އުޅުއްވާކަމަށް މި ޚަބަރުގައި ވޭ
ރައީސް އޮފީހުގެ ތަރުޖަމާނު، މިއުވާން މުހައްމަދު
ގަތަރުގެ ޝާހީ އާއިލާއަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ރާއްޖެއިން ރަށެއް ދެއްވަން އުޅުއްވާކަމަށް ބުނެ "ދިޔަރެސް" ނޫހުގައި ޝާއިއުކޮށްފައިވަނީ ދޮގު ޚަބަރެއް ކަމަށް ރައީސް އޮފީހުން ބުނެފިއެވެ.
"ޤަތަރުގެ ޝާހީ އާއިލާއަށް ރައީސް ސާލިޙް ރާއްޖެއިން ރަށެއް ދެއްވަނީ" މި ސުރުޚީގައި ދިޔަރެސް ނޫހުގައި ވަނީ ޚަބަރެއް ޝާއިއުކޮށްފައެވެ. މި ޚަބަރުގައި ވާގޮތުން ޅ. ދިއްފުއްޓާއި، މައިދޫގައި ރިސޯޓެއް ތަރައްގީކުރަން ގަތަރުގެ ޝާހީ އާއިލާއަށް ދިނުމަށް ރައީސް ސާލިހު ވަނީ ނިންމަވާފައެވެ.
އަދި މި ރަށްތައް އެ އާއިލާއަށް ދިނުމަށް ގަތަރުގެ ޝާހީ އާއިލާއިން އެދިލައްވާފައިވާކަމަށްވެސް މި ޚަބަރުގައިވެއެވެ. އަދި އެ ރަށްތައް ދޭން ރައީސުލްޖުމްހޫރިއްޔާ ނިންމަވާފައިވާކަމަށް ވަނީ ބުނެފައެވެ.
މި ޚަބަރާ ގުޅޭގޮތުން ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ މިއީ އެއްވެސް ހަގީގަތެއް ނެތް ދޮގު ޚަބަރެއް ކަމަށެވެ.
"ދިޔަރެސް" ނޫހުގައި މީގެ ކުރިން ލިޔެފައިވާ ޚަބަރުތަކެއްވެސް ރައީސް އޮފީހުން ދޮގުކޮށްފައިވެއެވެ. އަދި ދިޔަރެސް ނޫހާ ގުޅޭ މައްސަލަތަކެއް މީޑިއާ ކައުންސިލުންވެސް ބަލާފައިވެއެވެ.
