އިގްތިސާދު ކުރިއަރާނެ ކަމަށް އަންދާޒާ ކުރީ %37، ނަމަވެސް %41.6 ކުރި އެރި - އަމީރު
ނެޝަނަލް ބިއުރޯ އޮފް ސްޓެޓިސްޓިކްސް އިން އެންމެ ފަހުގެ އަންދާޒާއަކީ 41.6 އިންސައްތަ މިދިޔަ އަހަރު ރާއްޖޭގެ ގްރޯތް އައި
ރައްޔިތުންގެ މަޖިލީހުގެ ޖަލްސާގައި ފިނޭންސް މިނިސްޓަރު އަމީރު
މިދިޔަ އަހަރު ރާއްޖޭގެ އިގްތިސާދު ކުރިއަރާނެކަމަށް ލަފާކުރިވަރަށްވުރެ 4.6 އިންސައްތަ، އިގްތިސާދު ކުރި އެރިކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
ރައްޔިތުންގެ މަޖިލިހުގެ ހޯމަ ދުވަހުގެ ޖަލްސާގައި، ހޯރަފުށީ ދާއިރާގެ މެންބަރު އަހުމަދު ސަލީމް ކުރެއްވި ސުވާލުގެ ޖަވާބުގައި މިނިސްޓަރު ވިދާޅުވީ މިދިޔަ އަހަރު ނިމުނު އިރު އަންދާޒާއަކަށްވީ 2021 ވަނަ އަހަރު ރާއްޖޭގެ އިގްތިސާދު ކުރިއަރައި ދިޔައީ ގާތްގަނޑަކަށް 37 އިންސައްތަ ކަމަށެވެ. އެހެންނަމަވެސް މިހާރު ނެޝަނަލް ބިއުރޯ އޮފް ސްޓެޓިސްޓިކްސްގެ އެންމެ ފަހުގެ އަންދާޒާއަކީ 41.6 އިންސައްތަ މިދިޔަ އަހަރު ރާއްޖޭގެ އިގްތިސާދަށް ގްރޯތް އައި ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ރައްޖޭގެ އިގްތިސާދު، އަންދާޒާ ކުރި މިންވަރަށްވުރެ ރަނގަޅަށް ޕަރފޯމް ކުރަމުންދާ ކަމަށެވެ. އަދި 2022 ވަނަ އަހަރުގެ ބަޖެޓުގައި ޖެހީ ގާތްގަނޑަކަށް 1.6 މިލިއަން ޓުއަރިސްޓުން މިއަހަރު އަންނާނެކަމަށާއި، ނަމަވެސް މިހާރު ގާތްގަނޑަކަށް 1.2 މިލިއަން ޓުއަރިސްޓުން އަތުވެއްޖެ ކަމަށެވެ. މިދިޔަ އަހަރު ނިމުނު އިރު އަންދާޒާއަކަށްވީ 2021 ވަނަ އަހަރު ރާއްޖޭގެ އިގްތިސާދު ކުރިއަރައި ދިޔައީ ގާތްގަނޑަކަށް 37 އިންސައްތަ ކަމަށާއި، ނަމަވެސް އެއަށްވުރެ ކުރިއަރައި ދިޔަކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ އެންމެ ފަހުގެ ފިޗްގެ ރޭޓިންއަށް ބަލާލާއިރު، ފިޗުން ވެސް ފާހަގަކޮށްފައި ހުރީ ރާއްޖޭގެ އިގްތިސާދު ރަނގަޅުކަމާއި، ފަތުރުވެރިކަމުގެ ދާއިރާގެ ރެސިލިއަންސް އަދި ކޮންސްޓްރަކްޝަންއާއި އެހެނިހެން ދާއިރާތައް ވެސް ރަނގަޅުކަން ކަމަށެވެ.
އެކަމަކު ދުނިޔޭގެ އެހެނިހެން އިގްތިސާދުތަކަށް އަންނަ ލޮޅުންތަކާ އެކު އައުޓްލުކް ނެގެޓިވް ކަމަށެވެ. ނަމަވެސް އައިއެމްއެފް އަދި ވޯލްޑް ބޭންކުން ނެރޭ ރިޕޯޓްތަކުގައި ވެސް ރާއްޖޭގެ އިގްތިސާދުގެ ރެޒިލިއަންސްއާއި، ރާއްޖޭގެ އިގްތިސާދު ކުރިއަރާ މިންވަރު އެބޭފުޅުން ވެސް ވަރަށް ރަނގަޅަށް ފާހަގަކޮށްފައި އެބަހުރި ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ރާއްޖެއަށް ލިބޭ އާމްދަނީ ވެސް އަންދާޒާއަށްވުރެ ރަނގަޅު ކަމަށެވެ. އަދި ރާއްޖޭގެ ދަރަނި ސަރވިސްކުރުމުގައި މިހާތަނަށް އެއްވެސް ދައްޗެއް ނެތް ކަމަށާއި، މިދިޔަ އަހަރުތަކުގައި ސަރުކާރުން ވަނީ ކުރީގެ ފަސް އަހަރުގެ ތެރޭގައި ނަގާފައި ހުރި ދަރަނިތައް އެންމެ އުނދަގޫ ދަނޑިވަޅުގައި ދައްކާފައި ކަމަށެވެ.
މިނިސްޓަރު ވިދާޅުވީ މިހާރު ހުށަހަޅަނީ ދައުލަތަށް ލިބޭ އާމްދަނީ އިތުރުކުރުމަށާއި، ފިސްކަލް ސްޓްރެޓަޖީގައި ކުރާ ހަރަދު ކުޑަކުރުމަށްޓަކައި ޕޮލިސީޓަކެއް ފާސްކޮށްފައި ވާނެ ކަމަށެވެ. އަދި އާމްދަނީން 3 އިންސައްތަ ހޯދުމާއި، ޖީޑީޕީގެ ނިސްބަތުން 3 އިންސައްތަ އަދި ހަރަދު ޖީޑީޕީގެ ނިސްބަތުން 3 އިންސައްތަ ކުޑަކުރުމަށް ފާހަގަކޮށްފައިވާނެ ކަމަށެވެ.
މިނިސްޓަރު ވިދާޅުވީ އެއްވެސް ދައްޗެއް ނެތި ދަރަނި ދެއްކޭނެ ކަމަށެވެ. އަދި ކުރީ ސަރުކާރުން ނަގާފައި ހުރި ދަރަނި ވެސް މި ސަރުކާރުން ދައްކަމުން އަންނަ ކަމަށް މިނިސްޓަރު ވިދާޅުވިއެވެ.
