ހިޔަލަ ވިންގުން ދެމުން އައި ބައެއް ޚިދުމަތްތައް ދަރުމަވަންތައަށް ވަގުތީގޮތުން ބަދަލުކޮށްފި

މާބަނޑު މީހުންނާއި ތުއްތު ކުދިންނަށް އައިޖީއެމްއެޗުން ހާއްސަ ކޮށްފައިވާ "ހިޔަލަ" ވިންގުގެ ބައެއް ހިދުމަތްތައް ވަގުތީ ގޮތުން ދަރުމަވަންތަ ހޮސްޕިޓަލަށް ބަދަލުކޮށްފިއެވެ.

އާދީއްތަ ދުވަހު އައިޖީއެމްއެޗް އިން ބުނީ ހިޔަލަ ވިންގުގެ ބަލި މީހުން އަރައިފޭބުމަށް ބޭނުންކުރާ ލިފްޓަށް ޓެކްނިކަލް މައްސަލައެއް ދިމާވެފައިވާ ކަމަށެވެ. އެހެންވެ އެ ވިންގުގެ ބައެއް ހިދުމަތްތައް ވަގުތީ ގޮތުން ދަރުމަވަންތަ ހޮސްޕިޓަލަށް ބަދަލުކޮށްފައިވާ ކަމަށެވެ. އެގޮތުން ހިޔަލަ ވިންގުގެ ޚިދުމަތްތައް ބަދަލުކޮށްފައި ވަނީ ދަރުމަވަންތަ ހޮސްޕިޓަލުގެ 12، 16، އަދި 17ވަނަ ފަންގިފިލާއަށެވެ.

އެ ވިންގުގެ ދެވަނަ ފަންގިފިލާއިން ދެމުން ގެންދިޔަ އިމަޖެންސީ ހިދުމަތްތައް މިހާރު ލިބޭނީ ޓްރޯމާ އެންޑް އިމަޖެންސީ ޑިޕާޓްމެންޓުގެ އައިސޮލޭޝަން އޭރިއާއިން ކަމަށް އައިޖީއެމްއެޗުން ބުންޏެވެ. އަދި ހިޔަލަ ވިންގުގައި އެޑްމިޓް ކުރަންޖެހޭ ބަލި މީހުން ދެން އެޑްމިޓް ކުރަން ހަމަޖައްސާފައިވަނީ ދަރުމަވަންތަ ހޮސްޕިޓަލުގެ 12، 16 އަދި 17ވަނަ ފަންގިފިލާގައެވެ.

އެ ވިންގުގެ ފުރަތަމަ ފަންގިފިލާއިން ދެމުން ގެންދިޔަ އޯޕީޑީގެ ހިދުމަތައް އެއްވެސް ބަދަލެއް ނުގެނެެއެވެ. އަދި 10 ވަނަ ފަންގިފިލާއިން ދެމުން އަންނަ އެންއައިސީޔޫގެ ހިދުމަތަށް ވެސް ބަދަލެއް ނުގެނެއެވެ.

އައިޖީއެމްއެޗް އިން ބުނި ގޮތުގައި އެ ބަދަލުތަކާއެކު، ބެޑްކެޕޭސިޓީ ދަށްވެ އެޑްމިޓް ކުރާ މީހުންގެ އަދަދު މަދުކުރެވުމުން ބައެއް ހިދުމަތްތައް ދިނުމަށް ބުރޫ އެރުމަކީ އެކަށީގެންވާ ކަމެކެވެ. އެހެންކަމުން ދުރާލައި ތާވަލު ކޮށްފައިވާ ބައެއް ސާޖަރީތައް ވެސް މަޑުޖައްސައިލަން މިހާރު ނިންމާފައިވާ ކަމަށް އެ ހޮސްޕިޓަލުން ބުންޏެވެ.

ލިފްޓަށް ދިމާވި މައްސަލަ ވީހާ ވެސް އަވަހަކަށް ހައްލު ކުރަން މަސައްކަތް ކުރަމުން އަންނަ ކަމަށާއި ވީހާވެސް އަވަހަކަށް އަލުން ހިދުމަތްތައް ހިޔަލަ ވިންގަށް ބަދަލު ކުރާނެ ކަމަށް ވެސް އައިޖީއެމްއެޗުން ބުންޏެވެ.