ސަރވޭކުރަން އެފްކޮންއަށް ދިނީ 7 ދުވަސް، ދަތިވަނީ މޫސުން ގޯސްވުމުން
16 އޮކްޓޯބަރު 2022 | އާދީއްތަ 14:10ސަރވޭ ލަސްވަނީ މޫސުން ގޯސްވުމުން
ގްރޭޓަރ މާލެ ކަނެކްޓިވިޓީ ބްރިޖްގެ ޖިއޯޓެކްނިކަލް ސަރވޭގެ މަސައްކަތް ވަނީ ފަށާފައި
ތިލަމާލެ ބްރިޖްގެ ޖިއޯ ޓެކްނިކަލް ދިރާސާތަކަށް ގެނެސްފައިވާ ސެލްފް އެލެވޭޓިންގ ޕްލެޓްފޯމް (އެސްއީޕީ)، ވިލިމާލެ ފަރަށް އެރުމުގެ ސަބަބުން ފަރަށް ލިބުނު ގެއްލުމުގެ ތަފްސީލުތައް ބެލުމަށް އެފްކޮންސްއަށް ދީފައިވަނީ 7 ދުވަހުގެ މުއްދަތެއް ކަމަށާއި، މިހާރު އެ މަސައްކަތް ކުރިއަށް ނުގޮސް އޮތީ މޫސުން ގޯސްވުމުން ކަމަށް، އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ)އިން ބުނެފިއެވެ.
ފްކޮންސްއިން އަމިއްލައަށް ސަރވޭ ހެދުމަށް އެދިފައި ވަނީ، މި މައްސަލައިގައި އީޕީއޭއިން ހެދި ރިޕޯޓް ބަލައިނުގަންނަން ނިންމުމަށްފަހުއެވެެ. އީޕީއޭގެ ޑިރެކްޓަރ ޖެނަރަލް އިބްރާހީމް ނައީމް ރައްޖެ އެމްވީއަށް މައުލޫމާތުދެއްވަމުން ވިދާޅުވީ، އެ މަސައްކަތް ލަސްވަނީ މޫސުން ގޯސްވެ ވިޒިބިލިޓީ ދަށްވުމުންކަމަށް އެފްކޮންސްއިން ބުނެފައިވާކަމަށެވެ. މި ޕްލެޓްފޯމް ފަރަށް އެރުމުގެ ސަބަބުން ފަރަށް ލިބުނު ގެއްލުމުގެ ސަރވޭގެ މަސައްކަތް އީޕީއޭއިން ފަށާފައިވަނީ ސެޕްޓެމްބަރު މަހުގެ 6 ވަނަ ދުވަހުއެވެ. އެ މަސައްކަތުގެ ތެރެއިން އީޕީއޭއިން ވަނީ ފަރުގެ ބައެއް ފޮޓޯތައް އީޕީއޭގެ ޓްވިޓަރގައި ހިއްސާކޮށްފައެވެ. އެ ފޮޓޯތަކުން ފެންނަގޮތުގައި، ޕްލެޓްފޯމް އޮތް ތަނުގައި ފުން ވަޅުގަނޑުތަކެއް ވަނީ ހެދިފައެވެ.
ޕްލެޓްފޯމް ފުންކޮށްފައިވަނީ އޮގަސްޓް މަހުގެ 28 ވަނަ ދުވަހު، ފަރަށް އެރިތާ 12 ދުވަސް ފަހުންނެވެ. ބްރިޖްގެ މަޝްރޫއު ހިންގަމުންއަންނަ އިންޑިއާގެ އެފްކޮންސް ކުންފުނިން ކުރިން ބުނީ، ޕްލެޓްފޯމް ފުންނުކުރެވި ލަސްވީ މޫސުން ގޯސްވުމުގެ ސަބަބުން ކަމަށެވެ. އަދި ޕްލެޓްފޯމް ވިލިމާލޭ ފަރަށް ބީހެން ދިމާވީ މޫސުން ގޯސްވެ ވައިގަދަވުމާއި ރާޅު ބޮޑުވުމުގެ ސަބަބުން ކަމަށާއި، އެ ހާދިސާ ހިނގީ އެ ސަރަހައްދުގައި ޕްލެޓްފޯމް އަޅާފައި ބޭއްވުމަށް މަސައްކަތް ކުރަމުންދަނިކޮށް ކަމަށްވެސް އެ ކުންފުނިން ބުނެފައިވެއެވެ.
