ގްރިޒްމަންގެ 100 ވަނަ ލަނޑުން މޮޅުވެ، އެތްލެޓިކޯ މެޑްރިޑް ތިންވަނަ އަށް
ދެވަނާގައި އޮތް ރެއާލްއާއި ދެމެދު ތިން ޕޮއިންޓްގެ ފަރަޤެއް އެބައޮތް
ގްރިޒްމަން ލަނޑުޖެހުމަށްފަހު އުފާ ފާޅުކުރަނީ
ފްރާންސްގެ ފޯވާޑް އެންޓޯނިއޯ ގްރީޒްމަން އެތްލެޓިކޯ މެޑްރިޑަށް ޖަހައިދިން 100 ވަނަ ގޯލުން މޮޅުވެ, ސްޕެނިޝް ލަލީގާ ތާވަލްގެ ތިންވަނައަށް ޖެހިލައިފިއެވެ.
އެތްލެޓިކޯ ބިލްބާއޯގެ މައްޗަށް ރަށުން ބޭރުގައި އެތްލެޓިކޯ މެޑްރިޑް ކުރިހޯދީ 1-0 ނެވެ. މެޗުގެ ހަމައެކަނި ލަނޑު އަދި ގްރިޒްމަންގެ ތާރީޚީ ލަނޑު އޭނާ ޖެހީ ދެވަނަ ހާފް ފަށައިގެން ދެވަނަ މިނެޓުގެ ތެރޭގައެވެ. ގްރިޒްމަންއަށް ލަނޑުޖަހަން ފުރުޞަތު ފަހިކޮށްދިނީ ސްޕެއިންގެ ފޯވާޑް މޮރާޓާއެވެ. މިއީ ލީގުގައި މިސީޒަންގައި އެތްލެޓިކޯ މެޑްރިޑްގެ ހަ ވަނަ މޮޅެވެ.
މިމޮޅާއެކު އެތްލެޓިކޯ މެޑްރިޑް ލީގު ތާވަލްގެ ތިންވަނައަށް ޖެހިލީ ނުވަ މެޗުން 19 ޕޮއިންޓު ހޯދައިގެންނެވެ. ދެވަނާގައި ރެއާލް މެޑްރިޑް އޮތީ އަށް މެޗުން 22 ޕޮއިންޓާއެކުއެވެ. އެއްވަނާގައި އޮތް ބާސެލޯނާއަށްވެސް ލިބިފައިވަނީ 22 ޕޮއިންޓެވެ.
ލީގުގެ އެންމެ ވާދަވެރި މެޗުގައި އާދިއްތަ ދުވަހުގެރޭ ރާއްޖެ ގަޑިން 19:15 ގައި ރެއާލް މެޑްރިޑާއި ބާސެލޯނާ ވާދަކުރާނެއެވެ. މިމެޗުގެ ނަތީޖާއިން ތާވަލްގެ އެއްވަނައާއި ދެވަނަ މިވަގުތަށް ކަނޑައެޅޭނެއެވެ.
