ވޯލްޑް ކަޕް ކަވަރޭޖްގެ ޓައިޓަލް ސްޕޮންސްރަކަށް އުރީދޫ

މިއަންނަ މަހު ގަތަރުގައި ފަށާ ފީފާ ވޯލްޑް ކަޕް ކަވަރޭޖްގެ ޓައިޓަލް ސްޕޮންސަރަކަށް އުރީދޫ މޯލްޑިވްސް ހަމަޖައްސައިފިއެވެ.

މިއަހަރުގެ ވޯލްޑް ކަޕް ރާއްޖެއަށް ފެންނާނީ މީޑިއާނެޓް މެދުވެރިކޮށް ރާއްޖެ ޓީވީ އަދި އައިލެންޑް ކޮމިއުނިކޭޝަންސް އެންޑް އެންޓަޓެއިންމެންޓް ޕްރައިވެޓް ލިމިޓެޑް 'އައިސް ޕްލަސް' އިންނެވެ. މެޗުތައް ފެންނާނީ މި ދެޗެނަލް މެދުވެރިކޮށް މީޑިއާނެޓުގެ ނެޓްވޯކުންނެވެ. ކަވަރޭޖްގެ ޓައިޓަލް ސްޕޮންސަރަކަށް އުރީދޫ މޯލްޑިވްސް ހަމަޖައްސާ، މީޑިއާނެޓް، ރާއްޖެޓީވީ އަދި އައިސް ޕްލަސްއާއެކު ސޮއިކުރީ ހޮނިހިރު ދުވަހުގެ ހަވީރު ސޮލައިޓް ރެސްޓޯރެންޓުގައި އޮތް ޚާއްސަ ރަސްމިއްޔާތެއްގައެވެ.

އުރީދޫ މޯލްޑިވްސްގެ މެނޭޖިންގ ޑިރެކްޓަރ އަދި ސީއީއޯ ޚާލިދު އަލް ޙަމާދީ ވިދާޅުވީ ކަވަރޭޖްގެ ޓައިޓަލް ސްޕޮންސަރެއްގެ ގޮތުގައި އުރީދޫ މޯލްޑިވްސް ހަމަޖެއްސުމަކީ ލިބުނު ވަރަށް ބޮޑު ހިތްހަމަޖެހުމެއްކަމަށެވެ. އަދި މަސްވެރިކަން ފިޔަވާ ދިވެހީން އެންމެ ގަޔާވަނީ ފުޓްބޯޅައަށް ކަމަށެވެ. އެހެންކަމުން ކުރިއަށް އޮތް މަސްދުވަހުގެ ތެރޭގައި ދިވެހީންގެ ތެރޭގައި ވޯލްޑް ކަޕްގެ ފޯރި ގަދަކުރުމަށް ގިނަ ކަންތައްތަކެއް ރާވަމުންދާކަން ފާހަގަކުރެއްވިއެވެ.

ރާއްޖެ ޓީވީއަށް ދިން އިންޓަރވިއުއެއްގައި އުރީދޫ މޯލްޑިވްސްގެ ޗީފް ކޮމަރޝަލް އޮފިސަރ (ސީސީއޯ) ހުސެއިން ނިޔާޒް ވިދާޅުވީ ފުޓްބޯޅައަކީ ދިވެހީންގެ މެދުގައި ވަރަށް މަގްބޫލު ކުޅިވަރަކަށްވުމާއި، އުރީދޫގެ އިންޓަރނޭޝަނަލް ބްރޭންޑް އެމްބަސެޑަރުން ކަމުގައިވާ މެސީ އަދި ނޭމާއަކީވެސް ފުޓްބޯޅަ ކުޅުންތެރިންނަށްވުމުގެ އިތުރުން މިފަހަރުގެ ވޯލްޑް ކަޕް އޮންނަނީ އުރީދޫގެ ހެޑް ކުއާޓާ ހުންނަ ގަތަރުގައި ކަމަށް ވުމުން މިފަހަރުގެ ވޯލްޑް ކަޕަކީ ހުރިހާ ގޮތަކުންވެސް އުރީދޫއަށް މުހިންމު ވޯލްޑް ކަޕެއް ކަމަށެވެ.

ވޯލްޑް ކަޕަކީ ކޮންމެ ފަހަރަކުވެސް ވަރަށް ފޯރިގަދަކޮށް މީޑިއާނެޓުން ގެނެސްދޭ އިވެންޓެއްކަން ފާހަގަކޮށް ރާއްޖެ ޓީވީއަށް ދިން އިންޓަރވިއުއެއްގައި މީޑިއާނެޓް ކޮމާޝަލް ޑިވިޝަންގެ ކޮންޓެންޓް އެންޑް ވީޑިއޯ ކްލަބްގެ އެޗްއޯޑީ ޒިހުނީ ރަޝީދު ވިދާޅުވީ މިފަހަރުގެ މުބާރާތަކީ ސައްތައިން ސައްތަ ދިވެހި ޗެނަލްތަކަކުން ދިވެހީންނާއި ހަމައަށް ވޯލްޑް ކަޕް ގެނެސްދޭ ފުރަތަމަ ފަހަރު ކަމަށެވެ.

އަދި މިފަދަ އިވެންޓެއް ރާއްޖެއަށް ގެނައުމަށްޓަކާ ގިނަގުނަ މަސައްކަތްތަކެއް ކުރަންޖެހޭކަން ފާހަގަކޮށް ޒިހުނީ ވަނީ އުރީދޫގެ ފަރާތުން ލިބޭ އެއްބާރުލުމަށް ޝުކުރު އަދާކުރައްވާފައެވެ.

މިފަހަރުގެ ވޯލްޑް ކަޕް އޮންނާނީ ގަތަރުގައެވެ. މުބާރާތް ފަށާނީ އަންނަ ނޮވެމްބަރު މަހުގެ 20 ވަނަ ދުވަހުއެވެ. މި މުބާރާތުގެ ހުރިހާ މެޗުތަކެއްވެސް ރާއްޖެޓީވީ މެދުވެރިކޮށް ދިވެހީންނަށް ބެލޭނެއެވެ.