ޚިޔާލުފާޅުކުރުމުގެ މިނިވަންކަން ތުރުކީގައި އޮތް މިންވަރާމެދު ކަންބޮޑުވުންތައް ފާޅުކުރަމުންދަނިކޮށް ގަސްތުގައި ގޯސް މައުލޫމާތު ފަތުރާ ނޫސްވެރިންނާއި ސޯޝަލް މީޑިޔާގައި އެފަދަ ގޮތަކަށް މައުލޫމާތު ފަރާތްތަކަށް ތިން އަހަރު ދުވަހުގެ ޖަލު ހުކުމެއް އަންނަ ގޮތަށް ތުރުކީގެ ގާނޫނު ހަދާ މަޖިލީހުން ގާނޫނަށް ބަދަލު ގެނެސްފިއެވެ.
ތުރުކީގެ ރައީސް ރަޖަބް ތޮއްޔިބް އުރުދުޣާންގެ ޕާޓީ ކަމަށްވާ އޭކޭ ޕާޓީ އާއި އެޕާޓީ އާ ގުޅިފައިވާ ޕާޓީތަކުގެ މެޖޯރިޓީ އޮންނަ ގާނޫނު ހަދާ މަޖިލީހުން ގާނޫނަށް މިބަދަލު ގެނެސްފައިމިވަނީ އިދިކޮޅު މެމްބަރުންނާއި ޔޫރަޕްގެ ގައުމުތަކުންނާއި މީޑިޔާގެ ހައްގުތަކަށް ވަކާލާތުކުރާ ފަރާތްތަކުން އެބަދަލު ނުގެނައުމަށް ގޮވާލަމުންދަނިކޮށެވެ.
ގާނޫނުގެ 29 ވަނަ މާއްދާއަށް ގެނައި މިބަދަލާއެކު އެންމެ ބޮޑެތި ކަންބޮޑުވުންތަކެއް އުފެދިފައިވަނީ ޚިޔާލު ފާޅުކުރުމުގެ މިނިވަންކަމާމެދުއެވެ. އެމާއްދާގައި ބުނެފައިވަނީ ތުރުކީގެ ސަލާމަތީ ކަންކަމާއި ގުޅޭގޮތުން ގޯސް މައުލޫމާތު އޮންލައިންކޮށް ފަތުރާ ބިރުވެރިކަން އުފައްދާ އަދި އާންމު އެންގުންތަކަށް ހުރަސްއަޅާނަމަ އެމީހަކަށް އެއް އަހަރާއި ތިން އަހަރާ ދެމެދުގެ ޖަލު ހުކުމެއް އަންނާނެކަމަށެވެ.
މިކަމަށް ފާޑުކިޔާ ފަރާތްތަކުން ބުނަމުން އަންނަނީ ގާނޫނުގައި ސާފުކޮށް ގޯސް މައުލޫމާތު ނުވަތަ އޮޅުވާލައިގެން މައުލޫމާތު ފެތުރުމަކީ ކޮބައިކަން ބަޔާންކޮށްފައިނުވާކަމަށެވެ. އަދި މިއީ އެކަމުގެ ސަބަބުން ގާނޫނުގެ ބޭނުން ނަހަމަގޮތެއްގައި ކޯޓުތަކުގައި ހިފޭނެކަމެއްކަމަށް ފާޑުކިޔާ ފަރާތްތަކުން ބުނެއެވެ.
އުރުދުޣާންގެ ޕާޓީން ބުނާގޮތުގައި ގާނޫނަށް ގެނައި ބަދަލާއެކު ގޯސް މައުލޫމާތު ފެތުރުމާއި ސޯޝަލް މީޑިޔާގައި ގަސްތުގައި ފަތުރާ ތެދު ނޫން ޚަބަރުތަކަށް ޒިންމާދާރުކުރެވޭނެކަމަށެވެ. އަދި މިއާއެކު އިދިކޮޅުގެ އަޑު މަޑުވެގެން ނުދާނެކަމަށް ވެސް އުރުދުޣާންގެ ޕާޓީން ބުނެއެވެ.
ގާނޫނަށް ގެނައި މިބަދަލު މިހާރު އޮތީ ރައީސްގެ މޭޒުކޮޅުގައި އެއާމެދު ގޮތް ނިންމާ ހިސާބުގައެވެ.
އަންނަ އަހަރު އެގައުމުގައި އޮންނަ ރިޔާސީ އިންތިޚާބާއި ގާނޫނު ހަދާ މަޖިލީހުގެ އިންތިޚާބާއެކު ޚިޔާލުފާޅުކުރުމާއި މީޑިޔާގެ މިނިވަންކަމަށް ކުރިމަތިވަމުންދާ ހުރަސްތަކުގެ ވާހަކަތަކުގެ އަޑު ވަނީ ގަދަވެފައެވެ. ޚިޔާލު ހޯދުމުގެ ވޯޓުތައް ދައްކާގޮތުން އުރުދުޣާން އަށް ތާއީދުކުރާ ފަރާތްތައް ތުރުކީގައި އަންނަނީ މަދުވަމުންނެވެ.
މެއިން ސްޓްރީމް ބޮޑެތި މީޑިޔާތައް ތުރުކީ ސަރުކާރުގެ ބާރުގެ ދަށުގައި އޮތްއިރު މިނިވަންކަމާއެކު ހިންގާ ކުދިކުދި މީޑިޔާތަކަށް ވަނީ ބޮޑެތި ގޮންޖެހުންތަކާއި ކުރިމަތިވެފައެވެ. އެގޮތުން ބޮޑެތި އަދަދުތަކުން ޖޫރިމަނާކުރުން ފަދަ ކަންކަން އަންނަނީ އެފަރާތްތަކަށް ކުރިމަތިވަމުންނެވެ.
