އުދައްޔު އަށް ހަމަލާ ދިން މީހުން ތިބީ މަސްތުގައި، ހަމަލާ ދިން މަންޒަރު ފެނުނު - ސިއްރު ހެކި

ގއ. މާމެންދޫގައި ހިންގި ގްރޫޕް މާރާމާރީއެއްގައި ލިބުނު ޒަހަމްތަކުގެ ސަބަބުން މަރުވި 17 އަހަރުގެ އަހުމަދު އުދައްޔު އަށް ހަމަލާ ދިން މީހުން ތިބީ މަސްތުގެ ހާލަތުގައި ކަމަށާއި، އޭނާ އަށް ހަމަލާ ދިން މަންޒަރު ފެނިފައިވާ ކަމަށް އެ މައްސަލައިގައި ހެކި ބަސް ދިން ސިއްރު ހެކިވެރިޔަކު ބުނެފިއެވެ.

މި މައްސަލައިގައި ދައުލަތުން ވަނީ ގއ. މާމެންދޫ، ރިހިފަރުދާގެ، އަޙުމަދު ޝަމީމްއާއި، ގއ. މާމެންދޫ، ބިލަތްމާގެ، ޝަރަފު ރަޝީދުއާއި، ގއ. މާމެންދޫ، ގުލްފާމުގެ، މުޙައްމަދު މާޒިންގެ މައްޗަށް، ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގައި ބައިވެރިވުމުގެ ކުށުގެ ދައުވާ އުފުލާފައެވެ. މީގެ އިތުރުން ނުރައްކާތެރި ހާނިއްކައެއްވާ ގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ކުށުގެ ދައުވާވެސް އެ މީހުންގެ މައްޗަށް ވަނީ އުފުލާފައެވެ.

މި މައްސަލަ އާއި ގުޅިގެން ބުދަ ދުވަހު ބޭއްވި އަޑު އެހުމުގައި ދައުލަތުގެ ފަރާތުން ހުށަހަޅާ 4 ސިއްރު ހެއްކިވެރިންގެ ހެކި ބަސް ވަނީ ނަގާފައެވެ. މި މައްސަލައިގައި ބުދަ ދުވަހު ހެކި ބަސް ދިން އެންމެންވެސް ހެކިބަސް ދީފައި ވަނީ ކާކުކަން ނޭނގޭ ގޮތަށް އަޑު ބަދަލުކޮށްގެނެވެ. ބުދަ ދުވަހު ހެކި ބަސް ދިން އެކަކު ވަނީ އޭނާ އަށް އުދައްޔު އަށް ހަމަލާ ދިންތަން ފެނިފައިވާ ކަމަށް ހެކިބަސް ދީފައެވެ. ހަމަލާ ދީފައި ވަނީ އޭނާގެ ބުރަކަށްޓާއި ދިމާލަށް ކަމަށް ވެސް އޭނާ ވަނީ ބުނެފައެވެ. އަދި މި މައްސަލައިގައި ހަމަލާ ދިން އިތުރު މީހަކު ވަނީ ހަމަލާ ދިން މީހުން ތިބީ މަސްތުގެ ހާލަތުގައި ކަމަށާއި އެ މީހުން ހަމަލާ ދިނުމުގެ ކުރިން ހަމަލާ ދޭނެ ކަމުގެ އިންޒާރު ދީފައިވާ ކަމަށް ބުނެފައެވެ. އަދި ހަޑި ހުތުރުބަހުން މުއާމަލާތްކޮށްފައިވާ ކަަމަށް އޭނާ ވަނީ ބުނެފައެވެ. އަދި ހަތަރު މީހަކު ވެގެން އުދައްޔުގެ ބޭބެ އަށް ހަމަލާދިން ކަމަށް އޭނާ ވަނީ ބުނެފައެވެ.

ބުދަ ދުވަހު ހެކި ބަސް ދިން އިތުރު މީހަކު ބުނި ގޮތުގައި ހަމަލާ ދިން ދުވަހުގެ ރޭ އޭނާ އަށް މި މައްސަލައިގައި ތުހުމަތު ކުރާ ދެ މީހެއްގެ އަތުން ތޫނު އެއްޗެއް ވަނީ ފެނިފައެވެ. އެ މީހުންގެ އަތުގައި ހުރި އެއްޗެހި ހުރީ ތިރިއަށްވާ ގޮތަށް ކަމަށާއި، ގޮށްމުށްކަވާ އޭގައި ހިފާފައި ހުރި ގޮތުން އެއީ ވަޅި އެއް ކަމަށް ބެލެވުނު ކަމަށް އޭނާ ވަނީ ބުނެފައެވެ. އޭނާ ވަނީ މާޒިން މާރާމާރީ ހިންގަނިކޮށް ފެނުނުކަމަށާއި އުދައްޔުގެ ބޭބެ އަށް މައްސަލައިގައި ތުހުމަތު ކުރެވޭ މީހަކު ހަމަލާ ދިން މަންޒަރު ފެނުނު ކަމަށް ވެސް ބުނެފައެވެ.

މި މައްސަަލައިގެ ހެކިބަސް ނެގުން ކުރިއަށްދާއިރު މީގެ ކުރިން ވެސް މި މައްސަލައިގެ ހެކިބަސް ނަގާފައިވެއެވެ. މި މައްސަލަ ބައްލަވާ ގާޒީ އަލީ ނަދީމް ވިދާޅުވީ، ދެން މި މައްސަލައިގައި އަޑުއެހުމެއް އޮންނާނީ ބުރާސްފަތި ދުވަހު ކަމަށާއި އެ އަޑުއެހުމުގައި ވެސް އޮންނާނީ ހެކިބަސް ނެގުން ކަމަށެވެ. އަދިވެސް ދައުލަތުގެ 2 ހެއްކެއްގެ ހެކިބަސް ނުނެގި އެބައޮތެވެ.

2021 ވަަނަ އަހަރުގެ 8 ފެބުރުވަރީ ވަނަ ދުވަހުގެ ރޭ ގއ. މާމެންދޫގައި، ހިންގި މާރާމާރީގައި، އުދައްޔުއާއި އޭނާގެ ބޭބެ ފިރުޝާން ޒާހިރުއަށް ވަނީ ޖިސްމާނީގޮތުން ބޮޑެތި އަނިޔާތަކެއް ލިބިފައިވެއެވެ. އެ ޒަޚަމްތަކަށް ފަރުވާ ދެމުން ދަނިކޮށް އުދައްޔު މަރުވެފައިވާއިރު، އޭނާ ވަޅުލާފައިވަނީ އިންޑިއާއަށް ފޮނުވައިގެން ޕޯސްޓްމޯޓަމް ހެދުމަށްފަހުއެވެ.