ކާބޯތަކެތީގެ މައްސަލައިގައި ވަގުތީ އަދި ދާއިމީ ހައްލުތަކެއް ބޭނުންވޭ
ފޮރިން މިނިސްޓަރު އަބްދުﷲ ޝާހިދު
ކާބޯތަކެތީގެ ޔަގީންކަން ކަށަވަރުކޮށް، ކާރިސާއިން އަރައިގަތުމަށް ދާއިމީ ޙައްލުތަކަށް ރިޢާޔަތްކޮށް، އިސްނެގުން އިތުރުކޮށް، ބައިނަލްއަޤުވާމީ މުޖުތަމަޢުން ގުޅިގެން މަސައްކަތްކުރަން ޖެހޭކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
މިނިސްޓަރު ޝާހިދު މިހެން ވިދާޅުވި، ފުޑް ސެކިއުރިޓީ ކޮމިޓީގެ 50 ވަނަ ހުޅުވާލެވިފައިވާ ކޮމިޓީގައި ވާހަކަދައްކަވަމުންނެވެ.
މިނިސްޓަރު ވިދާޅުވީ އަޅުގަނޑުމެންނާ މި ބައްދަލުކުރަނީ، މުޅި ދުނިޔެއަށް ވެސް އެތައް ކާރިސާތަކެއް ކުރިމަތިވެ، އެއް ބަޔަކު އަނެއް ބަޔަކަށް އޭގެ ނޭދެވޭ އަސަރުކޮށް، އެ ކާރިސާތަކެއްގެ އިތުރަށް ބޮޑުވެގެންދާ ދަނޑިވަޅެއް ކަމަށެވެ. އޭގެ ތެރޭގައި ކޮވިޑް-19ގެ ބަލިމަޑުކަމާއި، މޫސުމީ ހީނަރުކަމާއި، ޔޫކްރެއިންގައި ހިނގަމުންދާ ހަނގުރާމަފަދަ ހަމަނުޖެހުންތައް ހިމެނޭ ކަމަށެވެ.
އަދި މިކަންކަމުގެ ސަބަބުން ދުނިޔޭގެ ކާބޯތަކެތީގެ ޔަޤީންކަން ނުރައްކަލަށް ހުށަހެޅި، ޖީލަކަށް ފަހު ޖީލެއްގައި ދިރިއުޅުމުގެ އެންމެ ބޮޑު ޚަރަދެއް ކުރަންޖެހިފައިވާ ކާރިސާގެ ގޮތުގައި ވަނީ ހަދާފައި ކަމަށެވެ.
މިނިސްޓަރު ޝާހިދު ވިދާޅުވީ ކާބޯތަކެތީގެ މައްސަލައިގައި ވަގުތީ އަދި ދާއިމީ ހައްލުތަކެއް ބޭނުންވާކަން ޤަބޫލު ކުރެވޭތީ އާންމު މަޖިލީހުގެ 76 ވަނަ ދައުރުގެ ރައީސްގެ ހައިސިއްޔަތުން ވަނީ، ދުނިޔޭގެ ކާބޯތަކެތީގެ ސަލާމަތާބެހޭ ކޮމިޓީއާއީ ބައްދަލުކޮށް، "ޓައިމް ޓު އެކްޓް ޓު ގެދަރ: ކޯޑިނޭޓިންގ ޕޮލިސީ ރެސްޕޮންސެސް ޓު ދަ ގްލޯބަލް ފުޑް ކްރައިސިސް" ގެ ނަމުގައި، 18 ޖުލައިގައި މަތީ ފެންވަރުގެ ބައްދަލުވުމެއް ބާއްވާފައިވާ ކަމަށެވެ.
އަދި މި ޙަރަކާތުގެ ސަބަބުން، މެންބަރު ޤައުމުތަކާއި، މަދަނީ ޖަމާޢަތްތަކާއި، ޕްރައިވެޓް ސެކްޓަރާއި، ކަމާބެހޭ އެހެނިހެން ފަރާތްތައް އެއްތަނަކުން ބައްދަލުވެ، ދުނިޔޭގެ ފެންވަރުގައި ސިޔާސަތުތައް އެކަށައެޅުމުގައްޔާއި، ޢަމަލުކުރާނެ ސިޔާސަތުތައް ބައްޓަންކުރުމަށް މަގުފަހިވެގެންދިޔަ ކަމަށެވެ.
މިނިސްޓަރު ވިދާޅުވީ ކޮވިޑް-19ގެ ބަލިމަޑުކަމުގެ ސަބަބުން އިޤްތިޞާދަށްކުރާ އަސަރުގެ އިތުރުން، ދިރިއުޅުމުގެ ޚަރަދުތައް ކުޑަކުރުމުގެ ސަބަބުން، އިމްޕޯޓަށް ބަރޯސާވެފައިވާ އެހެން ކުދި ޖަޒީރާ ޤައުމުތަކެކޭ އެއްފަދައިން، ދިވެހިރާއްޖެއަށް ވެސް ވަރަށް ބޮޑު އަސަރެއްކޮށްފައިވާ ކަމަށެވެ. އަދި އެންމެ ނިކަމެތިން ޙިމާޔަތް ކުރުމަށްޓަކައި އިޖްތިމާޢީ ރައްކާތެރިކަމުގެ ސްކީމްތައް ހުރިއިރު، އިތުރު އާމްދަނީ ނުލިބި އެ ސްކީމްތައް ދެމެހެއްޓޭކަށް ނެތް ކަމަށެވެ.
މިނިސްޓަރު ވިދާޅުވީ ފުޑް ސެކިއުރިޓީއާ ބެހޭ ހައި-އެލް އީވެލް ސްޕެޝަލް އިވެންޓް ބޭއްވި ފަހުން، މި ކާރިސާއިން އަރައިގަތުމަށް ކުރެވުނު އެންމެ މުހިންމު އެއް މަސައްކަތަކީ ބްލެކް ސީ އިނީޝިއޭޓިވް ކަމަށެވެ. އަދި އެކަން އެކުލަވާލުމާއި ތަންފީޒުކުރުމުގައި މުހިންމު ދައުރެއް އަދާކުރެއްވި ސެކްރެޓަރީ ޖެނެރަލްއަށް މިނިސްޓަރު ވަނީ ޝުކުރު އަދާކުރައްވާފައެވެ.
މިނިސްޓަރު ވިދާޅުވީ މި އިސްނެގުމުގެ ސަބަބުން ޔޫކްރެއިންގެ ގޮވާމުގެ ބާވަތްތައް އެކްސްޕޯޓްކުރުން އަލުން ފެށުމަށް މަގުފަހިވެ، ރަޝިޔާގެ ކާބޯތަކެއްޗާއި ތަރުކާރީ ދުނިޔޭގެ ބާޒާރުތަކަށް ވާސިލުވުމުގެ މަގު ފަހިވެގެން ދިޔަ ކަމަށެވެ. އުންމީދަކީ، މިކަމުގެ ސަބަބުން އަގުތައް ހަމައަކަށް އެޅި، މިއަދު އެތައް މިލިއަން ބަޔަކަށް މި ކާރިސާއާއި ބަނޑުހައިހޫނުކަމުގެ އަސަރު ފޯރާ، ކާރިސާތަކަށް ޙައްލެއް ލިބިގެން ދިޔުން ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ މަސައްކަތަކީ ފަސޭހަ މަސައްކަތެއް ނޫން ކަމަށާއި، ކުރިމަތީގައި އެތައް ގޮންޖެހުންތަކެއް އެބަހުރި ކަމަށެވެ. އަންދާޒާ ކުރެވޭ ގޮތުގައި ފާއިތުވީ ދެ އަހަރެއްހާ ދުވަހުގެ ތެރޭގައި ކާބޯތަކެތީގެ ނުތަނަވަސްކަން އިންތިހާއަށް ކުރިމަތިވެފައިވާ މީހުންގެ އަދަދު ވަނީ 135 މިލިއަނުން 276 މިލިއަނަށް އިތުރުވެފައި ކަމަށް މިނިސްޓަރު ޝާހިދު ވިދާޅުވިއެވެ.
ޔޫކްރެއިންގައި ހިނގަމުންދާ ހަނގުރާމައިގެ ސަބަބުން 2022 ވަނަ އަހަރު މި އަދަދު 323 މިލިއަނަށް އަރާނެ ކަމަށް ބެލެވޭ ކަމަށާއި، މި އަހަރުގެ ގޮންޖެހުމަކީ ކާބޯތަކެތި ފޯރުކޮށްދިނުން ކަމަށްވާއިރު، ދަނޑުވެރިކަމުގެ އުފެއްދުންތެރިކަމަށް އިތުރަށް ހީނަރުކަމެއް އަންނަނަމަ، އަންނަ އަހަރަކީ ކާބޯތަކެތި ލިބުމުގެ ދަތިކަން ކުރިމަތިވެދާނެ އަހަރަކަށްވެދާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ސަރުކާރުތަކާއި، ރަސްމީ މަލްޓިލޭޓަރަލް ބޮޑީތަކުގެ އިތުރުން، ޕްރައިވެޓް ސެކްޓަރާއި، މަދަނީ މުޖްތަމަޢުގެ ބައިވެރިވުން ވެސް އަޅުގަނޑުމެން ބޭނުންވާ ކަމަށެވެ. ފުރިހަމަ ހައްލުތައް ހޯދައި ބެލެހެއްޓޭނީ، ފުލް ސްކޭލްއެއްގައި، ކޯޑިނޭޓް ކުރެވިގެން ކުރިއަށް ގެންދެވޭ މޮބިލައިޒޭޝަންއަކުން ކަމަށާއި، އެއް ރޫޙުގައި، އެންމެން އެކަތިގަނޑަކަށްވެ، ދިރިއުޅުމުގެ ޚަރަދުތައް ފޫބެއްދުމަށްޓަކައި، އާ ޢަޒުމަކާއެކު މަސައްކަތްކޮށް، ދުނިޔޭގެ ކާބޯތަކެތީގެ ނުތަނަވަސްކަން ކުޑަކޮށް، ބާކީ ހުރި ހުރިހާ ގޮންޖެހުންތަކެއް ޙައްލުކުރުމަށް ޢަޒުމް އާކުރަންޖެހޭ ކަމަށް މިނިސްޓަރު ވިދާޅުވިއެވެ.
