ސްޓަޓްގާޓްގެ ކޯޗު މަޓަރާޒޯ މަގާމުން ވަކިކޮށްފި

ޖަރުމަނު ލީގުގެ ސްޓަޓްބާގުގެ ކޯޗު ޕެލެގްރިނޯ މަޓަރާޒޯ މަގާމުން ވަކިކޮށްފިއެވެ.

އުމުރުން 44 އަހަރުގެ މަޓަރާޒޯ މަގާމުން ވަކުކުރީ ޖަރުމަނު ލީގުގައި ސްޓަޓްްބާގުން ހޯދަމުން އަންނަ ދަށް ނަތީޖާ ތަކުގެ ސަބަބުންނެވެ. މި ސީޒަންގައި އެ ޓީމު އޮތީ ރެލިގޭޝަން ޒޯންގައެވެ. އެއީ ކުޅުނު ނުވަ މެޗުން ލިބުނު ފަސް ޕޮއިންޓާއެކު، ތާވަލްގެ 17 ވަނަ މަގާމުގައެވެ.

މަޓަރާޒޯ މަގާމުން ވަކިކޮށްފައިވާކަން އެ ކުލަބުން ވަނީ ރަސްމީކޮށް އިއުލާންކޮށްފައެވެ. މިކަމާ ގުޅިގެން އެ ކުލަބުގެ ސީއީއޯ ވިދާޅުވީ، އެ ނިންމުން ނިންމަން ޖެހުނީ މަޓަރާޒޯއާ މަޝްވަރާ ކުރުމަށް ފަހު ކަމަށެވެ. އަދި އޭނާ ފާހަގަ ކުރޮ ގޮތުގައި މަޓަރާޒޯ އަކީ ރަނގަޅު މީހެކެވެ. ނަމަވެސް ކުލަބަށް އެ ބަދަލު ގެންނަން ޖެހޭކަން މަޓަރާޒޯ ވެސް ޤަބޫލު ކުރާ ކަމަށެވެ. އޭނާ ވަނީ މަޓަރާޒޯ އަށް މުސްތަޤުބަލުގައި ކާމިޔާބަށް ވެސް އެދިފައެވެ.

މި ނިންމުމާ ގުޅިގެން މަޓަރާޒޯ ބުނީ، ސްޓަޓްބާގާއެކު އެތައް ހަނދާންތަކާއި، ގިނަ ރަނގަޅުކަންކަން ހުންނާނެ ކަމަށެވެ. އޭނާ ބުނީ އެ ކުލަބަށް ކޯޗެއްގެ ގޮތުގައި އިރުޝާދު ދިނުމުގެ ފުރުސަތު ލިބުނުކަމަށްޓަކައި، އަބަދުވެސް އޭނާ ޝުކުރު އަދާ ކުރާނެކަމަށެވެ. އޭނާ ބުނީ އެ ކުލަބަކީ ޚާއްސަ ކުލަބެއް ކަމަށާއި، އެކަން އެނގޭނީ އެ ކުލަބާއެކު މަސައްކަތް ކުރުމުން ކަމަށެވެ. އޭނާ ވަނީ ސްޓަޓްބާގަށް އަބަދުވެސް ކާމިޔާބު ލިބުމަށް އެދޭ ކަމަށް ވެސް ބުނެފައެވެ.

ސްޓަޓްބާގުގެ ކޯޗުކަމަށް މަޓަރާޒޯ ހަމަޖެއްސީ 2019 ވަނަ އަހަރުއެވެ. އޭނާގެ އިރުޝާދުގެ ދަށުން އެ ޓީމު ވަނީ 99 މެޗު ކުޅެފައެވެ. އޭގެ ތެރެއިން އެ ޓީމު ވަނީ 31 މެޗުން މޮޅުވެ، 39 މެޗުން ބަލިވެފައެވެ. އެއްވަރުވެފައިވަނީ 29 މެޗުންނެވެ.