ރަމަޟާން ވެޓެރެންސް ކަޕް ފުޓުބޯޅަ މުބާރާތުގެ ފައިނަލުގެ ދެވަނަ ޖާގަ، އެންމެ ފަހުގެ ޗެމްޕިއަން ނިއުރޭޑިއަންޓް ސްޕޯޓްސް ކުލަބުން ހޯދައިފިއެވެ.

ނިއު އިން ފައިނަލުގެ ދެވަނަ ޖާގަ ހޯދީ ބުދަ ދުވަހު ހަވީރު ކުޅުނު ސެމީފައިނަލުގެ 3 ވަނަ މެޗުގައި ވެލެންސިއާގެ މައްޗަށް 2-1 ގެ ނެތީޖާއަކުން ކުރިހޯދައިގެންނެވެ.

މެޗު ފެށިގެން ނިއުރޭޑިއަންޓްގެ ފަރާތުން ފެނިގެން ގޮސްފައިވަނީ މޮޅު ކުޅުމެކެވެ. އެގޮތުން އެޓީމުން ވަނީ ގިނަ ވަގުތު ބޯޅަ ހިފަހައްޓައި ލީޑު ނެގުމަށް ފުރުސަތުތަކެއް ތަނަވަސް ކޮށްފައެވެ. ނަތީޖާއެއްގެ ގޮތުން ނިއުއިން ވަނީ ފުލު ފުލުގައި ދެ ލަނޑު ކާމިޔާބުކޮށް ލީޑު ނަގާފައެވެ. ފުރަތަމަ ލަނޑު 33 ވަނަ މިނެޓުގައި އަބްދުﷲ މުހަންމަދު ކާމިޔާބުކޮށްދިންއިރު ދެވަނަ ލަނޑު 34 ވަނަ މިނެޓުގައި ކާމިޔާބުކޮށްދިނީ ހުސްނީ އަބްދުލް ރަހްމާން އެވެ.

ފުރަތަމަ ހާފުގައި ވެލެންސިއާގެ ފަރާތުން މާ އެދޭވޭ ކުޅުމެއް ފެނިގެން ގޮސްފައި ނުވާއިރު، ހާފް ނިމުނީ 2-0 ގެ ނަތީޖާއަކުން ނިއު ލީޑުގައި އޮވެގެންނެވެ. ނަމަވެސް ދެވަނަ ހާފުގެ ކުރީކޮޅުގައި ވެލެންސިއާއިން ވަނީ ކުޅުންރަނގަޅުކޮށް ސުން ކަނޑުވާލާފައެވެ. މި ލަނޑު 54 ވަނަ މިނެޓުގައި އެޓީމަށް ކާމިޔާބުކޮށްދިނީ އިސްމާއީލް މުހަންމަދެވެ.

މެޗުގެ މޮޅު ކުޅުންތެރިއަކަށް ނިއުރޭޑިއަންޓުގެ ހުސްނީ އަބްދުލް ރަހްމާން ހޮވުނުއިރު، 45 އަހަރުން މަތީގެ މޮޅު ކުޅުންތެރިއަކަށް ހޮވިފައިވަނީ އަހުމަދު ނިޔާޒެވެ.

ފާއިތުވި އަހަރު ނިއުރޭޑިއަންޓުން މުބާރާތް ކާމިޔާބުކުރީ ފައިނަލުގައި ވެލެންސިއާ ބަލިކޮށްގެންނެވެ. ނިއުއިން ވަނީ މިހާތަނަށް މި މުބާރާތް 2 ފަހަރު ކާމިޔާބުކޮށްފައެވެ.

މުބާރާތުގެ ފައިނަލުގެ ފުރަތަމަ ޖާގަ ހޯދާފައިވަނީ މަޒިޔާއެވެ. މިއީ މާޒިޔާއިން މި މުބާރާތުގެ ފައިނަލުން ޖާގަ ހޯދި ފުރަތަމަ ފަހަރެވެ. މި މުބާރާތުގެ އެންމެ ކަމިޔާބު ޓީމަކީ ވެލެންސިއާއެވެ. އެޓީމުން ވަނީ ޖުމްލަ 4 ފަހަރު މުބާރާތް ކާމިޔާބު ކޮށްފައެވެ.

ނިއުރޭޑިއަންޓާއި މާޒިޔާ ބައްދަލުކުރާ ފައިނަލް މެޗް ކުޅުމަށް ހަމަޖެހިފައިވަނި މި މަހުގެ 24 ވާ ހޮނިހިރު ދުވަހު 16:15 ގައި އެއްނަމްބަރު ޓާފް ދަނޑުގައެވެ.