ސްޕެނިޝް ލީގުގައި ކާޑިޒްއާ ދެކޮޅަށް ކުޅުނު މެޗުން އެއްވަރުވެ އެސްޕަންޔޯލް ރެލިގޭޝަން ޒޯނުން ކުރިއަށް ޖެހިލައިފިއެވެ.

އާދިއްތަ ދުވަހުގެ ރޭ ކާޑިޒްގެ ދަނޑުގައި އެ ޓީމަށް ދެކޮޅަށް ނުކުތް އިރު، އެސްޕަންޔޯލް އޮތީ ރެލިގޭޝަން ޒޯންގައެވެ. ނަމަވެސް އެ މެޗު އެއްވަރުވުމުން އެސްޕަންޔޯލް ވަނީ ފައިދާ ގޯލުން ކުރިއަށް ޖެހިލައިފައެވެ. މެޗު ނިމުނީ 2-2 އިން އެއްވަރުވެގެންނެވެ.

މެޗުގައި ފުރަތަމަ ލަނޑު ޖަހައި ލީޑު ނެގީ ކާޑިޒް އިންނެވެ. އެއީ 41 ވަނަ މިނެޓުގައި ޗުސްޓު ޖެހި ލަނޑެކެވެ. ނަމަވެސް ދެ ވަނަ ހާފުގައި އެސްޕަންޔޯލުން ވަނީ ދެ ލަނޑު ޖަހައި، މެޗުގެ ލީޑު ނަގާފައެވެ. އެ ދެ ލަނޑު ވެސް އެ ޓީމަށް ޖަހައިދިނީ ޖޮސެލޫއެވެ. އެއީ 51 ވަނަ މިނެޓުގައި އޭނާ ޖެހި ލަނޑާއި، 67 ވަނަ މިނެޓުގައި އޭނާ ޖެހި ލަނޑުތަކެވެ. ލީޑުގައި އޮވެ އެސްޕަންޔޯލުން ކުޅެމުން ދަނިކޮށް، ޕެރޭޒް ވަނީ 78 ވަނަ މިނެޓުގައި ލަނޑެއް ޖަހައި ކާޑިޒްއަށް ނަތީޖާ ހަމަހަމަކޮށްދީފައެވެ.

މި ނަތީޖާއާއެކު އެސްޕަންޔޯލް މިހާރު އޮތީ ލީގު ތާވަލްގެ 17 ވަނައިގައެވެ. އެއީ އަށް މެޗުން ހަ ޕޮއިންޓު ހޯދައިގެންނެވެ. ކާޑިޒް އޮތީ އަށް މެޗުން ފަސް ޕޮއިންޓާއެކު ރެލިގޭޝަން ޒޯންގައެވެ. އެސްޕަންޔޯލާ ސެވިއްޔާ ޕޮއިންޓުގެ ގޮތުން އެއްވަރުވާއިރު، ފައިދާ ގޯލުން އެސްޕަންޔޯލް ކުރި ހޯދައެވެ. މިވަގުތު ސެވިއްޔާ ވެސް އޮތީ ރެލިގޭޝަން ޒޯންގައެވެ.