މޯލްޑިވްސް އިމިގްރޭޝަންގެ ސަދަން ރީޖަނަލް އޮފީސް ހިންގަމުން އައި އިމާރާތް މަރަދޫ ރަށްވެހިގެއަށް ބަދަލުކޮށް އާދީއްތަ ދުވަހުން ފެށިގެން އެ އޮފީހުން ޚިދުމަތް ދޭން ފަށައިފިއެވެ.
ސަދަން ރީޖަނަލް އޮފީސް ހުޅުވާ، ރަސްމީކޮށް ބޭނުން ކުރަން ފެށުމުގެ ގޮތުން މަރަދޫގައި އާދީއްތަ ބޭއްވި ޚާއްސަ ރަސްމިއްޔާތު ޝަރަފްވެރިކޮށްދެއްވީ އައްޑޫ ސިޓީގެ މޭޔަރު އަލީ ނިޒާރެވެ. މި ރަސްމިއްޔާތުގައި އިމިގްރޭޝަންގެ ސީނިއާ މުވައްޒަފުންނާއި ކައުންސިލް އިދާރާގެ ބައެއް މެންބަރުން ބައިވެރިވިއެވެ.
މަރަދޫގައި ހުޅުވި އައު އޮފީހަކީ ޚިދުމަތް ހޯދުމަށް އަންނަ ރައްޔިތުންނަށް އިހުނަށް ވުރެ ރަނގަޅު މާހައުލެއް ގާއިމުކޮށްދިނުމުގެ ގޮތުން ހުޅުވި އޮފީހެއް ކަމަށް އިމިގްރޭޝަނުން ބުނެއެވެ.
އިމިގްރޭޝަނުން ބުނީ ކުރިން ހިތަދޫގައި ހިންގަމުން އައި ސަދަން ރީޖަނަލް އޮފީހުން ދެމުން ގެންދިޔަ، ހުރިހާ ޚިދުމަތެއް އައު އޮފީހުން ލިބެން ހުންނާނެ ކަމަށެވެ.
ހިތަދޫގައި އިމިގްރޭޝަންގެ ސަދަން ރީޖަނަލް އޮފީސް އެންމެ ފުރަތަމަ ހިންގަން ފަށާފައިވަނީ 2016 ވަނަ އަހަރުގައެވެ. އެ އޮފީސް ފުރަތަމަ ހިންގަމުން އައީ ހިތަދޫ އަވަށު އޮފީހުގައެވެ.
