މާލޭގެ މަގުތަކުގައި ދިރިއުޅޭ ބުޅަލާ މެދު އަޅާލަން ޖެހޭ މުއައްސަސާތަކުން އެކަމާއި އަޅާ ނުލާ ކަަމަށް ފާހަގަކުރައްވާ މާލެ ސިޓީ ކައުންސިލުގެ މޭޔަރު ޑރ. މުހައްމަދު މުޢިއްޒު ބައެއް އިދާރާތަކާއި މުއައްސަސާތަކަށް ވަރަށް ބޮޑަށް ފާޑު ވިދާޅުވެއްޖެއެވެ.

މާލޭ ސިޓީ ކައުންސިލުގެ ހަރަދުގައި ބުޅާ ފެސިލިޓީއަކާއި ވެޓް ކްލިނިކެއް ވިލިމާލޭގައި ގާއިމްކުރަން އެ ކައުންސިލުގެ އާންމު ބައްދަލުވުމުގައި ފާސްކޮށްފައި ވަނީ މި އަހަރުގެ އޮގަސްޓު މަހުގެ 31 ވަނަ ދުވަހުއެވެ. އެ މަސައްކަތް ކުރިއަށްދާ ގޮތާއި ގުޅޭ ގޮތުން ވާހަކަދައްކަވަމުން ޑރ.މުއިއްޒު އާދިއްތަ ދުވަހު ވިދާޅުވީ، އެގޮތަށް މަގުމަތީގައި އުޅޭ ބުޅާތަކުގެ ސާފުތާހިރުކަން ކުޑަވެ މަގުމަތީގެ އާއްމު އިޖުތިމާއީ މިންގަނޑަށް ނުފެތޭ މިންވަރަށް ބުޅާ ދިރިއުޅޭ ބައެއް ސަރަހައްދުތަކުގެ ސާފުތާހިރުކަން ދަށް ވެފައިވާ ކަމަށެވެ. ސިޓީ ކައުންސިލުން އިސްނަގައިގެން އެފަދަ މަސައްކަތެއް ކުރަން ޖެހުނު ސަބަބަކީ އެއީ ކަމަށް ޑރ. މުއިއްޒު ވިދާޅުވިއެވެ. އެހެންނަމަވެސް ކަމާއި ބެހޭ އެހެން އިދާރާތަކުން އެކަމާ މެދު އަޅާ ނުލަނީ ކީއްވެގެންތޯ މޭޔަރު ވަނީ ސުވާލު އުފައްދަވާފައެވެ.

އެޗްޑީސީން އިސްނައިގެން ބުޅާ ގެންގުޅޭ ފެސިލިޓީ ހިންގުމަށް ހަމަޖެހިފައިވާ ކަމަށާއި އެ މަސައްކަތް ކުރާނީ މާލެ ސިޓީ ކައުންސިލާއި ގުޅިގެން ކަމަށް މިދިޔަ އަހަރުގެ ޖޫން މަހު އެ ދެ އިދާރާއިން ވަނީ ހާމަކޮށްފައެވެ. އެގޮތުން ހުޅުމާލެ ފޭސް 2ގެ ފަރުކޮޅުފުށީގައި ގާއިމުކުރާ މި ފެސިލިޓީގައި 3،000 ބުޅާ ބަލަހައްޓާނެ ކަމަށް އެޗްޑީސީން އޭރު ވަނީ ބުނެފައެވެ. އެ ފެސިލިޓީގައި މަސައްކަތް ކުރާނެ މުވައްޒަފުން ވެސް އެޗްޑީސީން ހަމަޖައްސާނެ ކަަމަށް އޭރު ވަނީ ބުނެފައެވެ. އެކަމަށް އިޝާރާތް ކުރައްވާ ޑރ.މުއިއްޒު ވިދާޅުވީ މިހާރު މި މަސައްކަތަށް އެޗްޑީސީގެ އެއްބާރުލުން ނުލިބޭ ކަމަށެވެ. އެޗްޑީސީއިން ބިމެއް ދީފި ނަމަ ވިލިމާލޭގައި އެފަދަ ފެސިލިޓީ އެއް ގާއިމްނުކުރާނެ ކަމަށް ވެސް މޭޔަރު ވިދާޅުވިއެވެ.

ވިލިމާލޭގައި އިމާރާތްކުރާ ބުޅާ ގެންގުޅޭ ފެސިލިޓީ އަށް ބުޅާ ގެންދާނީ ކިހިނެތްތޯ ނޫސްވެރިއަކު ސުވާލެއް ދެންނެވުމުން މުއިއްޒު ވިދާޅުވީ އަދި އެ އިންތިޒާމްތައް ހަމަޖައްސާނެ ގޮތެއް ނިންމަވާފައި ނުވާ ކަމަށެވެ.

މި މަޝްރޫއަށް އަށް މިލިއަނެއްހާ ރުފިޔާ ހަރަދުވާނެ ކަމަށް ލަފާ ކުރެވޭ އިރު އެ ހަރަދު ކުރުމަށް ހަމަޖެހިފައިވަނީ ކައުންސިލުގެ ބަޖެޓުންނެވެ. އެ ވަސީލަތް އެޅުމަށް ހަމަޖެހިފައިވަނީ ވިލިމާލޭގައި 3000 އަކަފޫޓުގެ ބިމެއްގައި އިމާރާތެއް އަޅައިގެންނެވެ. ވިލިމާލޭގައި ބުޅާ ގެންގުޅޭ ފެސިލިޓީ އެއް ގާއިމުކުރުމުގެ މަސައްކަތް ސިޓީ ކައުންސިލުން ކުރިއަށް ގެންދިޔަ ނަމަވެސް ވިލިމާލޭގެ ކައުންސިލަރު ނަހުލާ އަލީ ވަނީ އެކަމާއި ދެކޮޅު ހައްދަވާފައެވެ. އޭނާ މީގެ ކުރިން ވިދާޅުވީ ވިލިމާލޭގައި މީގެކުރިން ވެސް ވެޓް ކްލިނިކެއް ހިންގާފައިވާ ކަމަށާއި އެ ކަމުގެ ތަޖުރިބާ އެ އަވަށުގައި ދިރިއުޅޭ ރައްޔިތުންނަށް އެނގޭ ކަމަށެވެ.

މާލޭ ސިޓީ ކައުންސިލުން މީގެ ކުރިން ވަނީ އަމިއްލަ ހަރަދުގައި ބުޅާ ފެސިލިޓީ ގާއިމްކޮށްދޭނެ ބައެއް ހޯދަން އިއުލާނުކޮށްފައެވެ. ނަމަވެސް އެކަމަށް ތަރުހީބެއް ލިބިފައެއް ނުވެއެވެ.

މަގުމަތީގައި އުޅޭ ބުޅަލަށް އަނިޔާ ކުރުމަކީ ދިވެހިންގެ ތެރޭގައި މަދުން ނަމަވެސް ފެންނަމުން އަންނަ ކަމެއް ކަމަށް ވާއިރު، ބުޅަލުގެ އާބާދީ އިތުރުވުމުން އާންމުންނަށް އުޅެން އުނދަގޫވެފައިވާ ކަމަށް ބުނެ ބުޅާތަކާ މެދު ރަހުމު ކުޑަ އަމަލުތައް ހިންގާ މައްސަލަތައް ވެސް ވަނީ ފެންމަތިވެފައެވެ.