ނޮވެމްބަރު މަހުގެ ނިޔަލަށް ހުޅުދޫގެ ބަނދަރު ނިމޭނެ: އާޒިމް

އަންނަ ނޮވެމްބަރު މަހުގެ ނިޔަލަށް އައްޑޫ ސިޓީ ހުޅުދޫގެ ބަނދަރު ނިމޭނެކަމަށް މޯލްޑިވްސް ޓްރާސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.

ހުޅުދޫ ބަނދަރު ތަރައްޤީ ކުރުމުގެ މަޝްރޫޢު ކުރިއަށް ދާ ގޮތާއި ގުޅޭގޮތުން "ރާއްޖެއެމްވީ" އަށް މައުލޫމާތު ދެއްވަމުން އާޒިމް ވިދާޅުވީ މިހާރު އެ ބަނދަރުގެ މަސައްކަތުގެ 93 އިންސައްތަ ނިމިފައިވާ ކަމަށެވެ. އަދި މިހާރު ބަނދަރުގެ މަސައްކަތްތަކުގެ ތެރެއިން ނުނިމި ހުރީ ވަރަށް މަދު މަސައްކަތްތަކެއް ކަމަށް އޭނާ ވިދާޅުވިއެވެ. މިހާރު އެ މަޝްރޫޢުގެ މަސައްކަތަށް ބޭނުންވާ ބޮޑު ހިލައިގެ ދެވަނަ ޝިޕްމަންޓު ޕްރޮޖެކްޓު ސައިޓަށް ގެންގޮސްފައިވާ ކަމަށް ވެސް އޭނާ ވިދާޅުވިއެވެ. އެ ބަނދަރުގެ އެތެރޭގެ ހުރިހާ މަސައްކަތްތަކެއް ނިމިފައިވާ ކަމަށާއި މިހާރު ނުނިމި ވަނީ ބަނދަރުގެ ބޭރުގައި ރިވެޓްމެންޓު ޖެހުމުގެ މަސައްކަތް ކަމަށް އާޒިމް ވިދާޅުވިއެވެ.

ގާތްގަނޑަކަށް 1200 ފޫޓުގެ ދިގުމިން ހުންނަ މި ބަނދަރު ނިމިގެންދާނީ ވަަރަށް ފުރިހަމަ ބަނދަރެއްގެ ގޮތުގައި ކަމަށާއި ބަނދަރުގެ މަސައްކަތް ނިމިގެންދާނީ ފުރިހަމަ އަށް ކީވޯލް ޖަހާ، ރިވެޓްމެންޓު ޖަހާ، ޕޭމެންޓު އަޅާ، ރެމްޕު އެޅުމުގެ އިތުރުން ފުރިހަމަ ލައިޓިން އަކާއި އެކުގައި ކަމަށް އާޒިމް ވިދާޅުވިއެވެ.

މި މަޝްރޫޢުގެ ދަށުން، 114 މީޓަރުގެ ސަރަޙައްދެއްގައި ބޭރުތޮށި ލުމާއި، 88،623 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި، 624 މީޓަރުގެ ސަރަޙައްދެއްގައި ރިވެޓްމެންޓު ޖެހުމާއި، 2250 އަކަ މީޓަރުގެ ސަރަޙައްދެއްގައި ޕޭވްމަންޓު ހެދުމާއި، 742 މީޓަރުގެ ސަރަޙައްދެއްގައި އެއްގަމުތޮށި ލުމާއި، މަގުބައްތި ހަރުކުރުމުގެ މަސައްކަތް ކުރުމަށް ވަނީ ހަމަޖެހިފައެވެ. މި މަޝްރޫޢަކީ 66.3 މިލިއަން ރުފިޔާގެ މަޝްރޫޢެކެވެ.