ލިވަޕޫލްގެ އާތޫރް ކުޅުމާ ދުރަށް!
މި ހަފްތާ ބަންދުގައި އާތޫރް ސާޖަރީއެއް ހަދާނެ ކަަމަށާއި އޭގެ ސަބަބުން ކުޅުމާ ދުރަށް ދާން ޖެހޭނެ ކަމަށް ރިޕޯޓުތައް ބުނޭ
އާތޫރް މެލޯ
ލޯނު އެއްބަސްވުމެއްގެ ދަށުން ލިވަޕޫލަށް ބަދަލުވި މިޑްފީލްޑަރު އާތޫރް މެލޯ ކުޅުމާ ދުރަން ދާން ޖެހިއްޖެ ކަމަށް މީޑިއާ ރިޕޯޓުތައް ބުނެފިއެވެ.
ރިޕޯޓުތައް ބުނާ ގޮތުން އާތޫރް ފުޓުބޯޅަ ކުޅުމާ ދުރަން ދާން ޖެހެނީ ސާޖަރީއެއް ހަދަން ޖެހޭތީއެވެ. އެގޮތުން މި ހަފްތާ ބަންދުގައި އާތޫރް ސާޖަރީއެއް ހަދާނެ ކަަމަށާއި، އޭގެ ސަބަބުން ކުޅުމާ ދުރަށް ދާން ޖެހޭނެ ކަމަށް ވެސް ރިޕޯޓުތައް ބުނެއެވެ. ސާޖަރީގެ ސަބަބުން ކުރިއަށް އޮތް މަސް ދުވަހު އޭނާ ކުޅުމާއި ދުރުގައި ހުންނަން ޖެހޭނެ ކަމަށާއި، އަދި އެނބުރި ކުޅުމުގެ ތެރެއަށް ދެން އާދެވޭނީ އަންނަ އަހަރު ކަމަަށް ވެސް ރިޕޯޓުތައް ބުނެއެވެ.
ލިވަޕޫލުން އާތޫރް ހޯދީ އެ ޓީމުގެ މިޑްފީލްޑުގައި ދިމާވެގެން އުޅޭ މައްސަލައަށް ހައްލެއް ހޯދުމަށެވެ. އެގޮތުން ލިވަޕޫލުން ވަނީ ގިނަ ކުޅުންތެރިންތަކަކަށް ފާރަ ލާފައެވެ. ނަމަވެސް އެ ޓީމުން ނިންމީ ލޯނު އެއްބަސްވުމެއްގެ ދަށުން ޔުވެންޓަސް އިން އާތޫރް ގެނައުމަށެވެ. ލޯނު އެއްބަސްވުމެއްގެ ދަށުން އާތޫރް ގެނައި ނަމަވެސް، އެއްބަސްވުން ދާއިމީ ކުރުމުގެ ފުރުސަތު އޮވެއެވެ. އަދި އެއްބަސްވުން ދާއިމީ ކުރަން ލިވަޕޫލުން ބޭނުންވާނަމަ، 38 މިލިއަން ޑޮލަރު ދައްކަން ޖެހޭނެ ކަމަށް ރިޕޯޓުތަކުގައިވެއެވެ.
