އަލޮންސޯ އިރުޝާދު ދިން ފުރަތަމަ މެޗުން ލެވަކޫސަން މޮޅުވެއްޖެ

އައު ކޯޗު ޒަބީ އަލޮންސޯ އިރުޝާދު ދިން ފުރަތަމަ މެޗުން ބަޔާ ލެވަކޫސަން މޮޅުވެއްޖެއެވެ.

ލެވަކޫސަން ކޯޗުކަމަށް އަލޮންސޯ ހަމަޖަައްސާފައިވަނީ މަގާމުގައި ހުރި ޖެރާޑޯ ސިއޯނޭ މަގާމުން ވަކިކޮށްފައެވެ. އެއީ މި ސީޒަންގެ ޖަރުމަނު ލީގުގައި އެ ޓީމުން ނެރެމުން އަންނަ ދަށް ނަތީޖާތަކުގެ ސަބަބުންނެވެ. އަލޮންސޯގެ އިރުޝާދުގެ ދަށުން ލެވަކޫސަންގެ ފުރަތަމަ ފުޓުބޯޅަ މެޗުގައި ހޮނިހިރު ދުވަހުގެ ރޭ ނުކުތީ ޝާލްކާ ދެކޮށެވެ. އަމިއްލަ ދަނޑުގައި ލެވަކޫސަން މޮޅުވީ 0-4 އިންނެވެ.

މެޗުގައި ލެވަކޫސަންގެ ފުރަތަމަ ލަނޑު 38 ވަނަ މިނެޓުގައި ޖެހީ ޑިއަބީއެވެ. އެއީ އެންޑްރިޗް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ތިން މިނެޓު ފަހުން ޑިއަބީ ދިން ބޯޅައަކުން ފްރިމްޕޮންގް ވަނީ ލެވަކޫސަންގެ ދެ ވަނަ ލަނޑު ޖަހާފައެވެ. އެ ޓީމުގެ އަނެއް ދެ ލަނޑު ފެނުނީ ދެ ވަނަ ހާފުގައެވެ.

ދެ ވަނަ ހާފު ފަށައިގެން ކުރީ ކޮޅު ފްރިމްޕޮންގް ވަނީ އިތުރު ލަނޑެއް ޖަހައި ލެވަކޫސަނަށް ލީޑު އިތުރަށް ފުޅާކޮށްދީފައެވެ. 53 ވަނަ މިނެޓުގައި އޭނާ އެ ލަނޑު ޖެހީ ވެސް ޑިއަބީ ތަނަވަސްކޮށްދިން ފުރުސަތަކުންނެވެ. ލެވަކޫސަންގެ ފަހު ލަނޑު 90 ވަނަ މިނެޓުގައި ޖެހީ ޕައުލީނިއޯއެވެ.

މެޗުން މޮޅުވެ ލެވަކޫސަން އޮތީ ތާވަލްގެ 14 ވަނަ މަގާމުގައެވެ. އެއީ ނުވަ މެޗުން އަށް ޕޮއިންޓު ހޯދައިގެންނެވެ.