ތަރުހީބު ބޮޑުވެ ޤައުމީ ޔުނިވާސިޓީގެ ފޮތް މައުރަޒުގެ ވަގުތު އިތުރުކޮށްފި
9 އޮކްޓޯބަރު 2022 | އާދީއްތަ 02:26ފޮތް މައުރަޒު ކުރިއަށްދާނީ މި މަހުގެ 11 އިން 13 އަށް
ދިވެހިރާއްޖޭގެ ގައުމީ ޔުނިވާސިޓީ
ދިވެހިރާއްޖޭގެ ޤައުމީ ޔުނިވާސިޓީން ބާއްވަން ނިންމާފައިވާ ފޮތް މައުރަޒަށް އޮތް ތަރުހީބު ބޮޑުވެ އެ މައުރަޒު ބާއްވާ ވަގުތު އިތުރުކޮށްފިއެވެ.
މި ފޮތް މައުރަޒު ބާއްވަން ތާވަލު ކޮށްފައިވަނީ މި މަހުގެ 11 އިން 13 އަށް ޤައުމީ ޔުނިވާސިޓީގެ މައި މަރުކަޒުގައެވެ. މި މައުރަޒު ކުރިން ބާއްވަން ތާވަލު ކުރީ މި ދުވަސްތަކުގެ މެންދުރު 2:00 އިން ރޭގަނޑު 10:00 އާ ހަމައަށެވެ. ނަމަވެސް ތަރުހީބު ބޮޑުވެ މިހާރު ވަނީ ވަގުތު ހެނދުނު 10:00 އިން ރޭގަނޑު 10:00 އަށް އިތުރުކޮށްފައެވެ.
ޤައުމީ ޔުނިވާސިޓީން ކުރިއަށްގެންދާ މި ފޮތް މައުރަޒަކީ ފޮތް އުފައްދާ މީހުންނާއި ވިއްކާ މީހުންނާއި ފޮތް ގަންނަ މީހުންނަށް ހާއްސަކޮށްގެން ކުރިއަށްގެންދާ ހަރަކާތެކެވެ. އެގޮތުން، ތަފާތު ބަސްތަކުން ދިވެހި ލިޔުންތެރިން ލިޔެފައިވާ ފޮތްތައް މި މައުރަޒުގެ ޒަރީއާއިން އާއްމުންނަށް ލިބޭނެއެވެ.
މި އަހަރުގެ ފޮތް މައުރަޒު ބާއްވަން ޤައުމީ ޔުނިވާސިޓީއިން ނިންމާފައިވަނީ މިދިޔަ އަހަރު ބޭއްވި މައުރަޒަށް ލިބުނު ތަރުހީބާ ގުޅިގެންނެވެ.
މި މައުރަޒުގެ ސަބަބުން ދިވެހި ލިޔުންތެރިންނަށް އެ ފަރާތްތަކުގެ ހުނަރު އާއްމުންނަށް ދައްކާލުމުގެ ފުރުސަތު ފަހިކޮށްދޭއިރު، މިހާތަނަށް ޝާއިއު ނުކޮށް ހުރި ފޮތްތައް ވެސް އާއްމުންނަށް ހަމައަށް ގެނެސްދެވޭނެ މާހައުލެއް އުފެދިގެންދާ ކަމަށާއި ފޮތަށް އަހުލުވެރިކުރުވުމާއި ފޮތް ކިޔުމުގެ އާދަ އުފައްދާ ދެމެހެއްޓުމުގެ ޝައުގު އުފެއްދުމަކީ ވެސް މި މައުރަޒުގެ ބޭނުމެއް ކަމަށް ޤައުމީ ޔުނިވާސިޓީން މައުލޫމާތު ދެއެވެ.
މި ފޮތް މައުރަޒުގައި 21 އެގްޒަބިޓަރުން ބައިވެރިވާނެ ކަމަށް ޤައުމީ ޔުނިވާސިޓީން މައުލޫމާތު ދެއެވެ.
