އުތުރު ކޮރެއާއިން އަނެއްކާވެސް މިސައިލުތަކެއް ފޮނުވާފައިވާ ކަމަށް ޖަޕާނުން ބުނެފި
އުތުރު ކޮރެއާއިން 25 ސެޕްޓެމްބަރުން ފެށިގެން ހަތް ފަހަރު މިސައިލްތަކެއް ވަނީ ފޮނުވާފައި
މިސައިލެއް
އުތުރު ކޮރެއާއިން އަނެއްކާ ވެސް ޖަޕާނުގެ ސަރަހައްދަށް މިސައިލުތަކެއް ފޮނުވާފައިވާ ކަމަށް ޖަޕާނުގެ ޑިފެންސް މިނިސްޓްރީން ބުނެފިއެވެ.
ޖަޕާނުގެ ޑިފެންސް މިނިސްޓްރީން ބުނެފައިވާ ގޮތުގައި އުތުރު ކޮރެއާއިން އާދީއްތަ ވިލޭރޭ ދަންވަރުގެ ވަގުތެއްގައި އެ ޤައުމުގެ ކަނޑުގެ ސަރަހައްދަށް ދެ މިސައިލް ލޯންޗު ކުރިއެވެ. ފުރަތަމަ މިސައިލް ދަންވަރު ޖަޕާނު ގަޑިން 1:47 ހާއިރު ފޮނުވާފައިވާއިރު ދެވަނަ މިސައިލް ފޮނުވާފައިވަނީ އޭގެ ހަ މިިނެޓު ފަހުން ކަމަށް އެ މިނިސްޓްރީން ބުނެފައިވެއެވެ.
ޖަޕާނުން ބުނެފައިވާ ގޮތުގައި މި ދެ މިސައިލް ވެސް ވެއްޓިފައިވަނީ ޖަޕާނުގެ އެކްސްކްލޫސިވް އިކޮނޮމިކް ޒޯން ބޭރަށެވެ. އެ މިސައިލްތަކަކީ ކޮން ބާވަތެއްގެ މިސައިލްތަކެއްތޯ ބެލުމުގެ މަސައްކަތް މިހާރު ކުރަމުން ދާއިރު އެއީ ބެލިސްޓިކް މިސައިލްތަކެއް ކަމަށް ޝައްކު ކުރެވޭ ކަމަށް ޖަޕާނުން ވަނީ ބުނެފައެވެ.
މިއީ އުތުރު ކޮރެއާއިން ޖަޕާނުގެ ކަނޑުގެ ސަރަހައްދަށް މިސައިލްތައް ފޮނުވި ހަތްވަނަ ފަހަރެވެ. މި މިސައިލްތައް ފޮނުވަން ފެށީ މިދިޔަ ސެޕްޓެމްބަރު މަހުގެ 25 ވަނަ ދުވަހުއެވެ.
ކުރިން ފޮނުވި މިސައިލްތަކަކީ ތަމްރީންތަކެއް ކަމަށް އުތުރު ކޮރެއާއިން ބުނެފައިވާއިރު ޖަޕާނާއި ދެކުނު ކޮރެއާ އަދި އެމެރިކާއިން ވެސް ވަނީ މިކަން ހަރުކަށި އިބާރާތުން ކުށްވެރިކޮށްފައެވެ.
