އީރާންގައި ހައްޔަރުކުރި ޒުވާން އަންހެން ކުއްޖެއްގެ ކުއްލި މަރާގުޅިގެން އެގައުމުގެ ސަރުކާރާ ދެކޮޅަށް މިހާރު ކުރިއަށްދާ ހަރަކާތްތައް މަތަކުރުމަށްކަމަށް ބުނެ، ސަރުކާރުން އަޅަމުންދާ ހަރުކަށި ފިޔަވަޅުތައް ކުށްވެރިކޮށް، ކެނެޑާއިން ރައްދު ފިޔަވަޅު އަޅައިފިއެވެ. މިގޮތުން ކެނެޑާގެ ބޮޑުވަޒީރު ޖަސްޓިން ޓްރޫޑޯ ހޮނިހިރު ދުވަހު ވަނީ، އީރާނުގެ ދިހަ ހާހެއްހާ އިސް ލީޑަރުން ހިމެނޭހެން އެގައުމުގެ އިސްލާމިކް ރިވޮލިއުޝަނަރީ ގާޑްސް ކޯ، އަދި ޤުދްސް ފޯސްގެ ވެރިން ކެނެޑާއަށް އެތެރެވުން މަނާކޮށްފައިވާކަން އިއުލާންކުރައްވާފައެވެ.

ޓްރޫޑޯ ވިދާޅުވީ، އީރާނުގެ ހަރުކަށި ވެރިކަމާ ދެކޮޅަށް ކެނެޑާއިން ބޭނުންކުރެވޭނެ އެންމެ ބާރުގަދަ ހަތިޔާރު ބޭނުންކުރައްވާފައިވާކަމަށެވެ. މިގޮތުން އައި.އާރް.ޖީ.ސީގެ 50 އިންސައްތަ، ނުވަތަ އެންމެ އިސް ދިހަ ހާހެއްހާ ލީޑަރުން ކެނެޑާއަށް އެތެރެވުމާއި، ކެނެޑާއިން ލިބޭނެ ހުރިހާ ފުރުސަތެއް ބަންދުކުރެވިފައިވާކަމަށް ވިދާޅުވިއެވެ. އަދި މިއީ އެމީހުންގެ މުޅި އުމުރަށް އެޅުނު ފިޔަވަޅެއް ކަމަށްވެސް ޓްރޫޑޯ ވިދާޅުވިއެވެ.

ކެނެޑާއިން އީރާނާ ދެކޮޅަށް ހަރުކަށި ފިޔަވަޅެއް އަޅާފައިމިވަނީ، ޔޫކްރެއިން އިންޓަރނޭޝަނަލް އެއާލައިންސްގެ ބޯޓެއް ތެހެރާނުން ފުރިތަނާ އައި.އާރު.ޖީ.ސީން ހަމަލާ ދީ ބޯޓް ވައްޓާލުމުން، އޭގައިތިބި 176 މީހުން މަރުވި ހާދިސާ މއަށް އެއްހާސް ދުވަސް ފުރުނު މުނާސަބަތާވެސް ދިމާކޮށެވެ. އެފަހަރުގެ ބޯޓުވެއްޓުމުގެ ހާދިސާގައި މަރުވި މީހުންގެ ތެރޭގައި ކެނެޑާގެ 57 ރައްޔިތުންވެސް ހިމެނެއެވެ.

ޓްރޫޑޯގެ ފަހުން ވާހަކަފުޅު ދައްކަވަމުން ޑެޕިއުޓީ ޕްރައިމިނިސްޓަރ ކްރިސްޓިއާ ފްރީލަންޑް ވަނީ، އީރާނުގެ ސަރުކާރަކީ ވަރަށްވެސް ހަރުކަށި، އަނިޔާވެރި، އަދި ރައްޔިތުން ފިއްތާފައި ބައިތިއްބާ ސަރުކާރެއްކަމަށް ސިފަކުރައްވާފައެވެ. އަދި އައި.އާރް.ޖީ.ސީއަކީ ޓެރަރިސްޓް ޖަމާއަތެއްކަމަށް ސިފަ ކުރައްވާފައި ވެއެވެ. އަދި ކެނެޑާއިން އީރާނުގެ ވެރިންނާއެކު އެއްވެސް ކަހަލަ ފައިސާގެ މުއާމަލާތެއް ނުކުރާނެކަމަށް ވިދާޅުވިއެވެ.

ބުރުގާ އަޅާފައި ހުރީ ރަގަޅަށް ނޫންކަމަށް ބުނެ 22 އަހަރުގެ ޒުވާން އަންހެންކުއްޖަކު ހައްޔަރުކުރުމަށްފަހު ކުރި އަނިޔާގައި އޭނާ މަރުވުމާ ގުޅިގެން، ސަރުކާރާ ދެކޮޅަށް އަންހެނުންނާއި އަންހެން ކުދިން ފެށި މުޒާހަރާތައް ދަނީ ދުވަހެއް ދުވަހަކަށް ފުޅާވަމުންނެވެ. ގިނަ އަދަދެއްގެ ހައި ސްކޫލް ކުދިން އަންނަނީ އިހްތިޖާޖްކުރުމުގެ ގޮތުން ބުރުގާނާޅައި ނުކުމެ، އަދި ބުރުގާ އަންދައި އަދި އިސްތަށިގަނޑު ކޮށާލުންފަދަ ކަންތައް އާންމު ތަންތަނުގައި ކުރަމުންނެވެ. މި އިހްތިޖާޖްތައް މަތިރިކުރުމަށް ކަމަށް ބުނެ އީރާން ސަރުކާރުން އަންނަނީ އެކަށީގެންނުވާ ބާރުގެ ބޭނުން ކުރަމުންނެވެ.

ސަރުކާރުން ބުނަނީ، ހައްޔަރު ކުރެވުނު ޒުވާނާ، އަމީނީ މަރުވީ ހާޓް އެޓޭކެއް ޖެހިގެން ކަމަށެވެ. ނަމަވެސް މިވާހަކަ އެއްވެސް ބަޔަކު ގަބޫލެއްނުކުރެއެވެ. އަމީނީގެ އާއިލާއިންވެސް ބުނެފައިވަނީ އެމީހުންގެ ދަރިފުޅު މަރާލާފައިވާކަމަށެވެ.