ދެ ލައްކައަށްވުރެ ގިނަ ޕައުންޑުން މެންޗެސްޓަރ ސިޓީ ޖޫރިމަނާ ކޮށްފި
އެފްއޭ އިން ހުކުރު ދުވަހު އާންމު ކުރި ސްޓޭޓްމަންޓެއްގައި ބުނީ، ސިޓީ 260،000 (ދެ ލައްކަ ފަސްދޮޅަށް ހާސް) ޕައުންޑުން ޖޫރިމަނާކޮށް، އިންޒާރު ދީފައިވާ ކަމަށް.
ސިޓީން ކުޅުނު މެޗުގައި ސަޕޯޓަރުން ދަނޑަށް އަރަނީ
ޕްރިމިއާ ލީގުގެ ޗެމްޕިއަން މެންޗެސްޓަރ ސިޓީ ބޮޑު އަދަދަކުން ޖޫރިމަނާ ކޮށްފިއެވެ.
ސިޓީ ޖޫރިމަނާ ކޮށްފައިވަނީ ނިމުނު ސީޒަންގެ ލީގު ފަހު މެޗުގައި ހިނގައިދިޔަ ކަމަކާ ގުޅިގެންނެވެ. އެ މެޗުގައި ސިޓީން ވަނީ ފަހަތުން އަރައި އެސްޓަން ވިލާ ބަލިކޮށް ލީގު ޗެމްޕިއަންކަން ހޯދާފައެވެ. ސިޓީގެ އެ ކާމިޔާބާ ގުޅިގެން ޓީމުގެ ސަޕޯޓަރުންތައް ވަނީ ދަނޑަށް އަރައިގަނެ، އުފާ ފާޅުކޮށްފައެވެ. އެއީ ފާއިތުވި ފަސް އަހަރުގެ ތެރޭގައި ސިޓީން ލީގު ކާމިޔާބުކުރި ހަތަރު ވަނަ ފަހަރެވެ.
އެކަމާ ގުޅިގެން ފުޓުބޯޅަ އެސޯސިއޭޝަނުން ވަނީ މައްސަލަ ބެލުމަށްފަހު ސިޓީ ޖޫރިމަނާ ކޮށްފައެވެ. އެއީ އެފްއޭ ގެ ގަވާއިދުގެ އީ 20 ވަނަ ރޫލާ ސިޓީން ޚިލާފުވެފައިވާތީއެވެ. އެކަން ހާމަކޮށް އެފްއޭ އިން ހުކުރު ދުވަހު އާންމު ކުރި ސްޓޭޓްމަންޓެއްގައި ބުނީ، ސިޓީ 260،000 (ދެ ލައްކަ ފަސްދޮޅަށް ހާސް) ޕައުންޑުން ޖޫރިމަނާކޮށް، އިންޒާރު ދީފައިވާ ކަމަށެވެ.
އެ ސްޓޭޓުމަންޓުގައި ބުނީ އެ މައްސަލަ ބަލާފައިވަނީ މިނިވަން ކޮމެޓީއަކުން ކަމަށެވެ. އަދި މެޗުގެ ފަހު ކަށިގަނޑަށް ފަހު ހިނގައިދިޔަ ކަމަކީ ޤަވާއިދާއި ޚިލާފު ކަމަކަށްވާތީ، އެ ޓީމު ޖޫރިމަނާ ކުރަން ނިންމީ ކަމަށެވެ.
ނިމުނު ސީޒަންގެ ޕްރިމިއާ ލީގު ސިޓީން ކާމިޔާބުކުރީ ފަހު މެޗުން މޮޅުވެގެންނެވެ. އެ މެޗުގައި ސިޓީ ބަލިވިނަމަ، ލީގު ޗެމްޕިއަންކަން ލިބެން އޮތީ ވާދަވެރި ލިވަޕޫލަށެވެ. ފަހު މެޗުގައި އެސްޓަން ވިލާ އަތުން ބަލިވާން ދަނިކޮށް، ސިޓީން ވަނީ ފަސް މިނެޓުގެ ތެރޭގައި ތިން ލަނޑު ޖަހައި، ލީގު ޗެމްޕިއަންކަން ހޯދާފައެވެ.
