"އައިއެސްއެސްއެފް ވޯލްޑް ޗެމްޕިއަންޝިޕް" ގައި ބައިވެރިވާ ޝޫޓިންގ ޓީމާ، ޑިފެންސް މިނިސްޓަރު ބައްދަލުކުރައްވައިފި
މިމަހުގެ 9 ވަނަ ދުވަހު މިސްރަށް ފުރުމަށް ހަމަޖެހިފައިވާ ޝޫޓިންގ ޓީމުގައި ހިމެނެނީ ދެ ކޯޗުންނާއި ތިން ޝޫޓަރުން
އައިއެސްއެސްއެފް ވޯލްޑް ޗެމްޕިއަންޝިޕް ގައި ބައިވެރިވާ ޝޫޓިންގ ޓީމާ، ޑިފެންސް މިނިސްޓަރު ބައްދަލުކުރެއްވުން
މިސްރުގެ ކައިރޯގައި މި މަހުގެ 12 އިން 25 އަށް ބޭއްވުމަށް ހަމަޖެހިފައިވާ "އިންޓަރނޭޝަނަލް ޝޫޓިންގ ސްޕޯޓްސް ފެޑެރޭޝަން (އައިއެސްއެސްއެފް) ވޯލްޑް ޗެމްޕިއަންޝިޕް" ގައި ބައިވެރިވާ ޝޫޓިންގ އެސޯސިއޭޝަން އޮފް މޯލްޑިވްސްގެ ޝޫޓިންގ ޓީމާ، މިނިސްޓަރ އޮފް ޑިފެންސް އަލްއުސްތާޛާ މާރިޔާ އަޙްމަދު ދީދީ ބައްދަލުކުރައްވައިފިއެވެ.
ޑިފެންސް މިނިސްޓްރީގައި ބޭއްވި މި ބައްދަލުކުރެއްވުމުގައި ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލު ވެސް ބައިވެރިވެ ވަޑައިގެންނެވިއެވެ. މި ބައްދަލުކުރެއްވުމުގައި، އެ ދެ ބޭފުޅުން ޝޫޓިންގ ޓީމަށް ހިތްވަރުދެއްވައި ރަނގަޅު ކާމިޔާބީއަކަށް އެދިވަޑައިގެންނެވިއެވެ. އަދި، ޝޫޓިންގ ޓީމްގެ ފަރިތަކުރުންތަކަށް ރޭންޖެއްގެ ދަތިކަން ހުރުމާއެކު އެކަމަށް ހައްލެއް ލިބޭތޯ މަސައްކަތްޕުޅު ކޮށްދެއްވާނެ ކަމަށާއި، ރާއްޖޭގައި ޝޫޓިންގ ކުރިއެރުވުމަށް ބޭނުންވާ އެހީތެރިކަން ފޯރުކޮށްދެއްވުމަށް މަސައްކަތްޕުޅު ކޮށްދެއްވާނެ ކަމުގައި ޑިފެންސް މިނިސްޓަރ ވިދާޅުވިއެވެ.
މިމަހުގެ 9 ވަނަ ދުވަހު މިސްރަށް ފުރުމަށް ހަމަޖެހިފައިވާ ޝޫޓިންގ ޓީމުގައި ހިމެނެނީ ދެ ކޯޗުންނާއި ތިން ޝޫޓަރުންނެވެ.
އައިއެސްއެސްއެފް ވޯލްޑް ޗެމްޕިއަން ޝިޕްގައި ބައިވެރިވާ ޝޫޓަރުންނަކީ ސްޓާފް ސާޖަންޓް ޝަރަފިއްޔާ ޢަބްދުއްރަޙްމާން (ސ.ނ 5909) އާއި، ލާންސް ކޯޕްރަލް ޒިޔާން ޒިޔާއު (ސ.ނ 7810) ގެ އިތުރުން ލާންސް ކޯޕްރަލް އާސިފާ ޖައުފަރު (ސ.ނ 6990) އެވެ. ސްޓާފް ސާޖަންޓް ޝަރަފިއްޔާއާއި ލާންސް ކޯޕްރަލް އާސިފާ އެ މުބާރާތުގައި ވާދަކުރަނީ އަންހެނުންގެ 10 މީޓަރ އެއަރ ރައިފަލް އިވެންޓުގައެވެ. މީގެ އިތުރުން ލާންސް ކޯޕްރަލް ޒިޔާން ބައިވެރިވަނީ 10 މީޓަރ އެއަރ ޕިސްޓަލް އިވެންޓުގައެވެ. މި ޓީމުގެ ހެޑް ކޯޗެއްގެ ގޮތުގައި މަސައްކަތް ކުރައްވާނީ ވޮރަންޓް އޮފިސަރ 1 ޙަސަން ޢަބްދުލްޣަފޫރު (ސ.ނ 5062) އެވެ. އަދި ކޯޗެއްގެ ގޮތުގައި ސާޖަންޓް ފަސްޓް ކުލާސް އަޙްމަދު ސިރާޖް (ސ.ނ 4472) ވެސް މި ޓީމުގައި ހިމެނިލައްވައެވެ.
މި ބައްދަލުކުރެއްވުމުގައި މިނިސްޓަރ އޮފް ޑިފެންސްއާއި ޗީފް އޮފް ޑިފެންސް ފޯސްގެ އިތުރުން ޝޫޓިންގ އެސޯސިއޭޝަން އޮފް މޯލްޑިވްސްގެ ރައީސް، ބްރިގޭޑިއަރ ޖެނެރަލް ޙާމިދު ޝަފީޤާއި އެ އެސޯސިއޭޝަންގެ ނާޢިބް ރައީސް ކާނަލް ޒުބައިރު އަޙްމަދު މަނިކާއި ޝޫޓިންގ އެސޯސިއޭޝަން އޮފް މޯލްޑިވްސްގެ ސެކެރެޓަރީ ޖެނެރަލް ކާނަލް އަޙްމަދު ޝާމިންގެ އިތުރުން މިލިޓަރީ ސަރވިސް ޓު ދަ މިނިސްޓަރ އޮފް ޑިފެންސް، ބްރިގޭޑިއަރ ޖެނެރަލް ޢަބްދުލްމަތީން އަޙްމަދާއި "އައިއެސްއެސްއެފް ވޯލްޑް ޗެމްޕިއަން ޝިޕް" ގައި ބައިވެރިވާ ޝޫޓިންގ ޓީމް ބައިވެރިވެލެއްވިއެވެ.
