ހަފްތާ ބަންދު ގައި ނާއިބުރައީސް ރ. އަތޮޅަށް ވަޑައިގަންނަވާނެ
ރ. އަތޮޅުގެ 6 ރަށަކަށް ނާއިބުރައީސް ވަޑައިގަންނަވާނެ
ރައީސުލްޖުމްހޫރިއްޔާގެ ނައިބު، ފުވައްމުލައް ސިޓީއަށް ކުރެއްވި ދަތުރު ފުޅެއްގެ ތެރެއިން
އަންނަ ހަފްތާ ބަންދުގައި ރައީސުލްޖުމްހޫރިއްޔާގެ ނާއިބު ފައިސަލް ނަސީމް ރ. އަތޮޅަށް ވަޑައިގަންނަވަން ނިންމަވާފައިވަކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
ބުރާސްފަތި ދުވަހު ރައީސް އޮފިީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިއުވާން ވިދާޅުވީ އަންނަ ހަފްތާ ބަންދުގައި ނާއިބުރައީސް ވަޑައިގަންނަވަން ހަމަޖެހިފައިވާ ރަށްތަކަކީ ރ. އިނގުރައިދޫ، ވަންދޫ، އިންނަމާދޫ، މާކުރަތު، ދުވާފަރު އަދި އުނގޫފާރަށް ކަމަށެވެ.
ނާއިބުރައީސް މި ރަށްތަކަށް ވަޑައިގަންނަވާ އެރަށްތަކުގެ ކައުންސިލާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާއި، ބައެއް އިދަރާތަކުގެ އިސްވެރިންނާ ބައްދަލުކުރައްވާނެ ކަމަށް މިއުވާން ވިދާޅުވިއެވެ.
ނާއިބުރައީސްގެ ދަތުރުފުޅުގައި ރަށްރަށުގެ ސިއްހީ މަރުކަޒުތަކަށް ވަޑައިގަންނަވަން ވަނީ ހަމަޖެހިފައެވެ. އަދި އުނގޫފާރު ހޮސްޕިޓަލަށް ޒިޔާރަތްކުރައްވަން ވަނީ ހަމަޖެހިފައެވެ. އަދި ދުވާފަރުގައި އޮންނަ ރ. އަތޮޅު ޓޫރިޒަމް އެކްސްޕޯގައި އެވޯޑު ދިނުމުގެ ހަފްލާ ޝަރަފުވެރިކޮށްދެއްވުމަށް ވަނީ ހަމަޖެހިފައެވެ.
މިއުވާން ވިދާޅުވީ މި ސަރުކާރުން ސިއްހީ ދާއިރާއަށް ޚާއްސަ އިސްކަމެއް ދެއްވާ ކަމަށެވެ. މިގޮތުން ނާއިބުރައީސް ސިއްހީ މަރުކަޒުތަކަށް ކުރައްވާ ޒިޔާރަތުގައި އެ ތަންތަނުގައި ހުރި ކަންތައްތަކާއި، އެތަންތަނުގެ ހާލަތު ބައްލަވާލައްވާނެ ކަމަށް މިއުވާން ވިދާޅުވިއެވެ.
