ސިނގިރޭޓު ބަޓު: ބައެއްގެ ނާތަހުޒީބު އަމަލުން، މުރާލި ބައެއްގެ ޖީބަށް ތަނަވަސްކަން
މި އަހަރުގެ މަރޗް 31ގެ ނިޔަލަށް އެމީހުން ވަނީ 1.2 ބިލިއަން ސިނގިރޭޓް ބަޓް ރީސައިކަލް ކޮށްފަ
ސިނގިރޭޓުގެ ސަބަބުން، ކަމާ ނުބެހޭ ބައެއްގެ ޖީބު ތަނަވަސްވެ، ދިރިއުޅުން ކޮޅަށް ޖެހެނަސް، ދުންފަތުގެ އިސްތިއުމާލު ކުރުމަށް އެއްވެސް ހާލެއްގައި ހިތްވަރު ދެވިގެން ނުވާނެ
ދުނިޔޭގެ ސިއްޙަތު ޖަމިއްޔާ (ޑަބްލިއުއެޗްއޯ)ގެ އަންދާޒާތައް ބުނާ ގޮތުން، އަވަށްޓެރި އިންޑިއާގައި ދިރިއުޅޭ ސިނގިރޭޓު ބޯ މީހުންގެ ޢަދަދު، ގާތްގަނޑަކަށް، 267 މިލިއަނަށް އަރައެވެ. ވެރި ރަށް ނިއުދިއްލީގެ މަގުތަކަށް ބަލާލި ކަމުގައި ވި ނަމަވެސް، ތަފާތު އެކި ޒާތްޒާތުގެ ކުނިބުންޏާ އެކުވެފައިވާ ސިނގިރޭޓް ބަޓް ނުވަތަ ފިލްޓަރުތައް ފެނުމަކީ އާންމު ކަމެކެވެ.
ވިޔަފާރިވެރިޔާ ނަމާން ގުޕްތާއަށް މި ކުންޏަކީ ހަޒާނާއެކެވެ. ކުނިބުނި ބޭނުންކޮށްގެން އޭނާ ދަނީ ކުޑަކުދިން ކުޅޭ ޒާތުގެ ކުޅޭ ސާމާނާއި އެނޫންވެސް ތަކެތި އުފައްދަމުންނެވެ.
ގުޕްތާގެ ކުންފުނި، ކޯޑް އެފަރޓްއިން ކޮންމެ ދުވަހަކުވެސް އެތައް ހާސް ކިލޯގްރާމްއެއްގެ ސިނގިރޭޓް ފިލްޓަރު އެއްކުރެއެވެ. އެއީ މުޅިންވެސް މަގުތައް މަތިން ހޮވާ ފިލްޓަރެވެ. ގުޕްތާގެ ކާރުޚާނާ ހިންގަނީ އުތުރުގެ ސިޓީއެއް ކަމަށް ވާ ނޮއިޑާގައެވެ.
ބަޔަކު ބޮއެ އުކާލާފައި ހުންނަ ސިނގިރޭޓް ބުރިތައް ބޭނުންކޮށްގެން އެ ކާރުޚާނާގައި ނުއުފައްދާ އެއްޗެއް ނެތޭވެސް ދެންނެވިދާނެއެވެ.
ގުޕްތާ ހުރީ، އޭނާގެ ވިޔަފާރި އަދިވެސް އިތުރަށް ފުޅާ ކުރުމުގެ ޢަޒުމުގައެވެ.
ކާރުޚާނާގެ ބޭރުގައި އޮންނަ ހުސްބިމުގައި ކޯނިކޯންޏަށް އަންހެނުންގެ ގުރޫޕުތައް އަވަދިނެތި އުޅޭތީ ފެނެއެވެ. އެކަކު އަނެކަކާ ހީނ ސަމާސާކޮށް އޮލަވާހަކަތަކުގައި ވަގުތުތައް ހޭދަ ކުރަމުން ދަނީ، ސިނގިރޭޓް ފިލްޓަރުގައިވާ ކަރުދާހާއި ދުންފަތް ވަކިކޮށް، ސާފު ކުރުމުގެ ބުރު މަސައްކަތުގައި މަޝްހޫލުވެ ތިބެގެންނެވެ.
ޕޫނަމް ފަދަ މީހުންނަށް، ގުޕްތާގެ ވިޔަފާރިން ކުރާ ފައިދާ ކިތަންމެ ހާވެސް ބޮޑެވެ. އެއް ގޮތަށް ވުރެ ގިނަ ގޮތުން ފައިދާ ކުރެއެވެ. ސިނގިރޭޓްގެ ސަބަބުން، ކަމާ ނުބެހޭ ބައެއްގެ ޖީބު ތަނަވަސްވެ، ދިރިއުޅުން ކޮޅަށް ޖެހެމުން ދިޔަ ކަމުގައި ވީ ނަމަވެސް، ދުންފަތުގެ އިސްތިއުމާލު ކުރުމަށް އެއްވެސް ހާލެއްގައި ހިތްވަރު ދެވިގެން ނުވާނެއެވެ.
