އިންޓަރ މިލާނުން ބާސެލޯނާ ބަލިކޮށްފި، ޒަވީ ބުނީ ނަތީޖާ އިންސާފުވެރި ނޫންކަމަށް

ބާސެލޯނާ ބަލިކޮށް, ޗެމްޕިއަންސް ލީގު ގްރޫޕް ސީގެ ދެވަނައަށް އިންޓަރ މިލާން ޖެހިލައިފިއެވެ.

މިނަތީޖާއާއެކު ބާސެލޯނާ ވަނީ ގްރޫޕްގެ ތިންވަނައަށް ވެއްޓި, ދެވަނަ ބުރަށް ދިއުމަށް އުނދަގޫ ހާލަތަކަށް ގޮސްފައެވެ. އިންޓަރ މިލާންގެ ދަނޑުގައި ކުޅުނު ފުޓުބޯޅަ މެޗު, އިންޓަރ އިން ކާމިޔާބުކުރީ 1-0 ނެވެ. މެޗުގެ ހަމައެކަނި ލަނޑު ފުރަތަމަ ހާފްގެ އިތުރު ވަގުތުގައި ޖެހީ ހަކަން ކަލްހަނޮގުލޫއެވެ. ދެވަނަ ހާފްގައި ޕެޑްރީ ލަނޑެއް ޖެހުމުން ބާސެލޯނާއިން އުއްމީދުކުރީ އެންމެ ކުޑަމިނުން ޕޮއިންޓެއް ލިބޭނެކަމަށެވެ. އެކަމަކު ވީއޭއާރުން ބެލުމަށްފަހު ނިންމީ އަންސޫ ފާޓީ އަތުގައި ބޯޅަ ޖެހުނު ކަމަށެވެ. އެ ހިތްހަމަނުޖެހުންތަކުގެ ތެރޭގައި ބާސެލޯނާގެ ކޯޗު ޒަވީއަށް ރެފްރީ ވަނީ ރީނދޫ ކާޑެއް ވެސް ދައްކާފައެވެ. ރެފްރީގެ އެނިންމުން ގޯސްކަމަށްބުނެ މެޗަށްފަހު ވެސް ޒަވީ ވަނީ ވާހަކަދައްކާފައެވެ.

މިނަތީޖާއާއެކު ބާސެލޯނާ ތިންވަނާގައި އޮތީ ތިން މެޗުން ތިން ޕޮއިންޓާއެކުއެވެ. ދެވަނާގައި އިންޓަރ މިލާން އޮތީ ހަ ޕޮއިންޓާއެކުއެވެ. އަދި އެއްވަނާގައި ބަޔާން މިއުނިކް އޮތީ ތިން މެޗުން ވެސް މޮޅުވެ ނުވަ ޕޮއިންޓާއެކުއެވެ.

ބަޔާންގެ ތިންވަނަ މެޗުގައި އެޓީމުން ވަނީ އަމިއްލަ ދަނށުގައި ވިކްޓޯރިއާ ޕްލެޒެން އަތުން 5-0 ން މޮޅުވެފައެވެ. މެޗުގައި ސާނޭ ދެ ލަނޑު ޖެހިއެވެ. ދެން އެޓީމަށް ލަނޑު ޖަހައިދިނީ މާނޭއާއި, ގްނަބްރީއާއި, ޗޯޕޯ މޯޓިންގއެވެ.