ޗެމްޕިއަންސް ލީގުގައި އަމިއްލަ ދަނޑުގައި ރޭންޖަރސް ބަލިކޮށް, ލިވަޕޫލުން އިތުބާރު ހޯދައިފިއެވެ.
ރޭންޖަރސްގެ މައްޗަށް ލިވަޕޫލުން ކުރި ހޯދީ 2-0 ނެވެ. މިމޮޅާއެކު ކޯޗު ކްލޮޕަށް އޮތް ޕްރެޝަރަށް ވަނީ ފިނިކަމެއް ލިބިފައެވެ. މެޗުގައި ލިވަޕޫލްގެ ފުރަތަމަ ލަނޑު ހަތްވަނަ މިނެޓުގައި ޖެހީ އެލެގްޒެންޑަރ އާނޯލްޑެވެ. އޭނާ ލަނޑު ޖެހީ 25 ޔާޑުން ފޮނުވާލި ހިތްގައިމު ހިލޭ ޖެހުމުންނެވެ. ދެވަނަ ލަނޑު މުޙައްމަދު ސަލާހު ޖެހީ ދެވަނަ ހާފް ފަށައިގެން އަށްވަނަ މިނެޓުގައި ލިބުނު ޕެނަލްޓީއަކުންނެވެ. މިއީ ލެއޮން ކިންގް, ލުއިސް ޑިއާޒްއަށް ކުރި ފައުލަކަށް ދިން ޕެނަލްޓީއެކެވެ.
މިމޮޅާއެކު ލިވަޕޫލް ވަނީ ހަ ޕޮއިންޓާއެކު ގްރޫޕްގެ ދެވަނާގައެވެ. އެއްވަނާގައި އޮތީ ތިން މެޗުން ވެސް މޮޅުވި ނަޕޯލީއެވެ. ނަޕޯލީ ވަނީ ތިންވަނަ މެޗުގައި 6-1 ން އަޔެކްސް ބަލިކޮށްފައެވެ. މެޗުގައި ރަސްޕަޑޯރީ ދެ ލަނޑު ޖެހިއެވެ. އަދި 73 ވަނަ މިނެޓުގައި ދެވަނަ ރީނދޫ ކާޑާއެކު އަޔެކްސްގެ ޓަޑިކްއަށް ރަތްކާޑް ދެއްކުމުން ފަހު 17 މިނެޓު އެޓީމުން ކުޅުނީ 10 ކުޅުންތެރިންނާއެކުއެވެ. މިގްރޫޕްގެ ތިންވަނާގައި އަޔެކްސް އޮތީ ތިން ޕޮއިންޓާއެކުއެވެ. ރޭންޖަރސްއަށް ޕޮއިންޓެއް ނުލިބެއެވެ.
