ބަންގްލްދޭޝްގެ ނެޝަނަލް އިލެކްޓްރިސިޓީ ގްރިޑަށް މައްސަލައެއް ދިމާވެ، ބޮޑުބައެއް އަނދިރީގައި

ބަންގްލަދޭޝްގެ ނެޝަނަލް އިލެކްޓްރިސިޓީ ގްރިޑަށް ދިމާވިމައްސަލައަކާ ގުޅިގެން އެގައުމުގެ ބޮޑުބައެއް އަނދިރީގައިވާކަމަށް ޚަބަރުތައް ބުނެފިއެެވެ. މިގޮތުން ހުޅަނގު އުތުރުގެ ބައެއް ހިސާބުތައް ފިޔަވައި މުޅި ގައުމުވެސް ވަނީ އަނދިރިކަމުގައި ކަމަށް ޚަބަރުލިބެއެވެ.

ސަރުކާރުގެ ޔުޓިލިޓީ ކުންފުނިން ބުނިގޮތުގައި، އަންގާރަ ދުވަހު މެންދުރު ފަހު އެގައުމުގެ ގަޑިން ދޭއްޖަހާ އެހާކަންހާއިރު ކުރިމަތިވި މި މައްސަލައަށްފަހު 140 މިލިއަނެއްހާ މީހުން ވަނީ ކަރަންޓްގެ ޚިދުމަތުން މަހުރޫމްވެފައެވެ. ޕަވަރ ޑިވެލޮޕްމަންޓް ބޯޑުގެ ތަރުޖަމާނު ބުނެފައިވަނީ މައްސަލަ ފުރަތަމަ ދިމާވީ އިރުމަތީ ފަޅީގެ އިންޖީނުގެއަކަށް ކަމަށެވެ. އެއަށްފަހުު އެހެން އިންޖީނުގެތަކަށްވެސް މައްސަލަ ކުރިމަތިވެ، ވެރިރަށް ޑާކާއާއި އެހެން ބޮޑެތި ސިޓީތަކުންވެސް ކަރަންޓު ކަނޑަން ޖެހުނީކަމަށް ތަރުޖަމާނު ހާމަކޮށްފައިވެއެވެ. އަދި މައްސަލަ ވީހާވެސް އަވަހަކަށް ހައްލުކުރުމަށް އިންޖިނޭރުން މަސައްކަތްކުރަމުން ދާކަމަށްވެސް ބުނެފައިވެއެވެ.

ފަހަކަށް އައިސް ބަންގްލަދޭޝްއިން އައީ އިގުތިސާދީގޮތުން ކުރިއެރުންތަކެއް ހާސިލްކުރަމުންނެވެ. ނަމަވެސް ސަރުކާރުން ހުރިހާ ޑީސަލް އިންޖީނުގެތައް ބަންދުކުރަން އަންގާފައި ވުމުން، ކަރަންޓް ކަނޑާވަރު އިތުރުވެފައިވާތީ، އިގުތިސާދު އެންމެ އެދެވޭގޮތަށް ކުރިއެރުމަށް ހުރަސްއެޅިފައިވާކަމަށް ޚަބަރުތައް ބުނެއެވެ.  

ބަންގްލަދޭޝްގެ ގާމެންޓް މެނުފެކްޗަރަރސް އެސޯސިއޭޝަންގެ ރައީސް ވިދާޅުވެފައިވާގޮތުގައި، ކަރަންޓްގެ މައްސަލަ ގޯސްވެފައިވާވަރުން އެގައުމުގެ ގާމެންޓް ފެކްޓަރީތަކުން 10 ގަޑިއިރު ވަންދެންވެސް ކަރަންޓް ކަނޑާފައި ހުރެއެވެ.

ބަންގްލަދޭޝްއަކީ ޗައިނާ ފިޔަވައި ދެވަނައަށް އެންމެ ގިނައިން ގާމެންޓް އެކްސްޕޯޓްކުރާ ގައުމެވެ. އަދި ގައުމަށް ލިބޭ ފޮރިން ކަރަންސީގެ 80 އިންސައްތަ ލިބެނީ ގާމެންޓް އިންޑަސްޓްރީން ކަމަށް ވެއެވެ.