އިންޑޮނޭޝިޔާ ސްޓޭޑިއަމް ހާދިސާގައި މަރުވި މީހުންގެ ހަނދާނުގައި، ޔުއެފާގެ މެޗުތައް ފެށުމުގެ ކުރިން ސުކޫތެއް

އިންޑޮނޭޝިޔާގެ ޕެޓްރިއޯޓް ކަންދްރާބާގާ ސްޓޭޑިއަމްގައި ހިނގި ހަމަނުޖެހުމުގެ ސަބަބުން މަރުވި މީހުންގެ ހަނދާނުގައި، ޔުއެފާގެ މެޗުތައް ފެށުމުގެ ކުރިން ސުކޫތެއް ގެނައުމަށް ނިންމައިފިއެވެ.

ސުކޫތު ގެނައުމަށް ނިންމާފައިވަނީ ޔޫރަޕުގެ މުބާރާތްތަކުގައި މި ހަފްތާގައި ކުޅޭ މެޗުތައް ފެށުމުގެކުރިންނެވެ. ޔުއެފާއިން މިގޮތަށް ނިންމީ މިއީ ފުޓްބޯޅައިގެ ތާރީޚުގައި މިހާތަނަށް ހިނގި މިފަދަ އެންމެ ބޮޑު އެއް ހާދިސާކަމަށްވާތީއެވެ.

އިންޑޮނޭޝިއާ ފުޓުބޯޅަ ލީގުގައި ކުޅުނު މެޗެއްގެ ތެރެއިން މި ހަމަނުޖެހުން ހިނގީ އަރެމާއާއި ޕާސެބަޔާ ސުރަބަޔާ ބައްދަލުކުރި މެޗުގައެވެ. އެ މެޗު ސުރަބަޔާއިން ކާމިޔާބުކުރީ 2-3ންނެވެ. މެޗުން ބަލިވުމާއެކު އަރެމާގެ ސަޕޯޓަރުން ވަނީ ދަނޑަށް އަރައިގަތުމަށް މަސައްކަތްކޮށްފައެވެ. އެއާއެކު އެ މީހުން ހުއްޓުވުމަށް ފުލުހުން ވަނީ މަސައްކަތްކޮށްފައެވެ. ސަޕޯޓަރުން ހުއްޓުވުމަށް ފުލުހުން ކުރި މަސައްކަތުގެ ތެރެއިން ވަނީ ކަރުނަ ގޭސް ބޭނުންކޮށްފައެވެ. ކަރުނަ ގޭސް ބޭނުންކުރުމުން، ސްޓޭޑިއަމުން ނުކުތުމަށް ސަޕޯޓަރުން އުޅުމުގެ ތެރޭގައި ތޮއްޖެހި ނޭވާހާސްވެގެން ހިނގި މި ހާދިސާގައި އެތައް ބަޔަކު މަރުވެ، ގިނަ ބަޔަކު ވަނީ ޒަޚަމްވެފައެވެ. އޭގެތެރޭގައި ސަޕޯޓަރުންނާއި، ސަލާމަތީ ކަންކަން ބެލެހެއްޓުމުގައި ހަރަކާތްތެރިިވި ފުލުހުން ހިމެނޭކަމަށް ރިޕޯޓުތައް ބުނެއެވެ. ރިޕޯޓުތައް ބުނާގޮތުން މި ހާދިސާގައި 174 މީހުން މަރުވެ، 180 އަށްވުރެ ގިނަ މީހުންނަށް އަނިޔާވެފައިވެއެވެ.

މިކަމާ ގުޅިގެން އެ ގައުމުގެ ޗީފް ސެކިއުރިޓީ އޮފިސަރު މަހްފޫދް ވިދާޅުވީ، ދަނޑުގެ ޖާގައަށްވުރެ ގިނައިން މީހުން އެ މެޗަށް ވަދެފައިވާ ކަމަށެވެ. އޭނާ ވިދާޅުވީ އެ ދަނޑުގެ ޖާގައަކީ 38،000 މީހުން ކަމަށާއި، ނަމަވެސް 42،000 ޓިކެޓު އެ މެޗަށް ދޫކޮށްފައިވާކަމަށެވެ. މި ހަމަނުޖެހުމުގައި މީހުންގެ އިތުރުން ބައެއް މުދާތަކަށްވެސް ވަނީ ގެއްލުން ލިބިފައެވެ. އޭގެ ތެރޭގައި 13 އުޅަނދެއް ހިމެނޭއިރު، 10 އުޅަނދަކީ ފުލުހުންގެ އުޅަނދެވެ.