ފަތުރުވެރިކަމުގެ އެކި ދާއިރާތަކުން 77 ފަރާތަކަށް ޕްރެޒިޑެންޓްސް ޓޫރިޒަމް ގޯލްޑް އެވޯޑް ދެއްވައިފިއެވެ.
ރާއްޖޭގެ ފަތުރުވެރިކަމަށް 50 އަހަރު ފުރޭ ރަންޔޫބިލް އަދި ރާއްޖެގެ ފުރަތަމަ ގައުމީ ފަތުރުވެރިކަމުގެ ދުވަސް ފާހަގަކުރުމަށް ކުރުނބާ މޯލްޑިވްސްގައި ބޭއްވި ގާލާ އިވްނިންގައި މި އެވޯޑްތައް ދީފައިވަނީ ފަތުރުވެރިކަމުގެ އެކި ދާއިރާތަކުން އަގުހުރި ހިދުމަތްތައް ކޮށްދެއްވާފައިވާ ބޭފުޅުންނަށެވެ.
މި އެވޯޑްތައް ދެއްވާފައިވަނީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހެވެ.
އެވޯޑް ފޮރ ދަ ވެލިއުބަލް ކޮންޓްރިބިއުޝަން އިން ދަ އިންސެޕްޝަން އޮފް ޓުއަރިޒަމް، ރައީސް ސުމުއްވުލް އަމީރު އަލްމަރުހޫމް އިބްރާހިމް ނާސިރު ރަންނަބަނޑޭރިކިލެގެފާނަށް އެރުވުނެވެ.
ރައީސް އިބްރާހިމް ނާސިރަކީ ފަތުރުވެރިކަން ފައްޓަވައިދެއްވުމުގައި 1972 ވަނަ އަހަރު އެންމެ މުހިންމު ނިންމެވުން ނިންމެވި ޝަހުސިއްޔަތެވެ. މިއަދުގެ މި ފަތުރުވެރިކަމަށް ލިބޭ މަންފާއަކީ އެމަނިކުފާނުގެ ސިޔާސަތުގެ ނަތީޖާއެވެ. މި އެވޯޑް ވަނީ އެމަނިކުފާނުގެ އާއިލާއާއި ހަވާލުކުރައްވާފައެވެ.
އެވޯޑް ފޮރ ދަ ވެލިއުބަލް ކޮންޓްރިބިއުޝަން އިން އެސްޓަބްލިޝިންގ މޯލްޑިވްސް އޭސް އަ ގްލޯބަލް ބްރޭންޑް، ރައީސް އަލްއުސްތާޛް މައުމޫން އަބްދުލްގައްޔޫމަށް އެރުވިއެވެ. ރައީސް މައުމޫން ވަނީ ދުނިޔޭގެ މަޝްހޫރު ގްލޯބަލް ބްރޭންޑަކަށް ރާއްޖެވުމުގައި ހަރުދަނާ ސިޔާސަތުތަކެއް ކަނޑައަޅުއްވާދެއްވާ އިންޑަސްޓްރީ ކުރިއަރައިދެއްވުމަށް ބޮޑު އެއްބާރުލުމެއް ދެއްވާފައެވެ.
އެވޯޑް ފޮރ ދަ ވެލިއުބަލް ކޮންޓްރިބިއުޝަން އިން ދަ އިންސެޕްޝަން އޮފް ކޮމިއުނިޓީ ބޭސްޑް ޓުއަރިޒަމް އިންދަ މޯލްޑިވްސް، ރައީސް މުހައްމަދު ނަޝީދަށް އެރުވުނެވެ. ރައީސް ނަޝީދު ވަނީ 2010 ވަނަ އަހަރު ރާއްޖޭގެ ފަތުރުވެރިކަމުގެ ގެސްޓް ހައުސް ވިޔަފާރި އައު ހަރުފަތަކަށް ގެންދަވާ މި ސިޔާސަތުގެ ދަށުން ފަތުރުވެރިންނަށް، ރާއްޖޭގައި މީހުން ދިރިއުޅޭ ރަށްރަށުގައި ޗުއްޓީ ހޭދަކުރުމުގެ ފުރުސަތު ހުޅުވާލެއްވިއެވެ.
އެވޯޑް ފޮރ ދަ އެގްޒެމްޕްލެރީ ކޮންޓްރިބިއުޝަންސް ޓު މޯލްޑިވްސް ޓުއަރިޒަމް، އަލްމަރުހޫމް ކަނޑި އިސްމާއިލް މަނިކަށް އެރުވުނެވެ. އަދި އެވޯޑް ފޮރ ދަ އައުޓްސްޓޭންޑިންގ ކޮންޓްރިބިއުޝަން ޓު ދަ މޯލްޑިވްސް ޓުއަރިޒަމް، އަލްމަރުހޫމާ އުއްމިއްޔާ ނަސީރަށް އެރުވުނެވެ. މީގެ އިތުރުން އަލްމަރުހޫމް ޒާހިރު އާދަމަށާއި، އަލްމަރުހޫމް އިބްރާހިމް ވާފިރަށް ވެސް މި އެވޯޑް އެރުވުނެވެ.
ސިނާއަތުގައި ފާހަގަކޮށްލެވޭ ޝަހުސިއްޔަތުތަކުގެ ތެރެއިން އެވޯޑް ފޮރ ދަ އެގްޒެމްޕްލެރީ ކޮންޓްރިބިއުޝަންސް ޓު މޯލްޑިވްސް ޓުއަރިޒަމް ގާސިމް އިބްރާހިމް އަދި ޗަމްޕާ މުހައްމަދު މޫސާ (އުއްޗު) އަށް އެރުވުނެވެ.
އެވޯޑް ފޮރ ދަ އައުޓް ސްޓޭންޑިންގ ކޮންޓްރިބިއުޝަންސް ޓު މޯލްޑިވްސް ޓުއަރިޒަމް، ރައީސުލްޖުމްހޫރިއްޔާގެ ނައިބް ފައިސަލް ނަސީމަށް އެރުވުނެވެ. ނައިބް ރައީސްގެ އުމުރުފުޅުން 17 އަހަރުގައި ފަތުރުވެރިކަމުގެ ސިނާއަތަށް ވަދެވަޑައިގެން 27 އަހަރު ވަންދެން ދިވެހި ޒުވާނުން ބިނާކުރުމަށާއި، މުވައްޒަފުންގެ ދުޅަހެޔޮކަމަށް އަދި ތަރައްގީއަށް އެކިއެކި މަސައްކަތް ވަނީ ކޮށްދެއްވާފައެވެ. މިގޮތުން 2015 ވަނަ އަހަރު ފަތުރުވެރިކަމުގެ ދާއިރާއަށް ކޮށްފައިވާ ހިދުމަތްތައް ފާހަގަކޮށް ސްޕެޝަލް ރިކޮގްނިޝަން އެވޯޑެއް ވެސް ނައިބް ރައީސަށް ވަނީ ލިބިވަޑައިގެންފައެވެ.
މީގެ އިތުރުން އަހުމަދު ސިޔާމް މުހައްމަދާއި، އަބްދުﷲ ޖާބިރު ފަދަ ފަތުރުވެރިކަމުގެ ދާއިރާގައި ހަރަކާތްތެރިވާ އެކިއެކި ބޭފުޅުންނަށް ވެސް ވަނީ އެވޯޑް ދެއްވާފައެވެ.
ގާލާ އީވްނިންގައި އެކި ގޮތްގޮތުން ރާއްޖޭގެ ފަތުރުވެރިކަމަށް ޚިދުމަތްކޮށްދެއްވާފައިވާ 77 ފަރާތަކަށްވަނީ ޕްރެޒިޑެންޓްސް ޓޫރިޒަމް ގޯލްޑް އެވޯޑް ދެއްވާފައެވެ. މީގެތެރޭގައި އަމިއްލަ ޖަމިއްޔާ ޖަމާއަތްތަކާއި ރާއްޖެއާއި ރާއްޖެއިން ބޭރުގެ އެއަރލައިންތަކާއި ކޮމިއުނިކޭޝަން ހިދުމަތްތައް ދީފައިވާ ފަރާތްތައް ހިމެނެއެވެ.
