ލޯކަލް ޓުއަރިޒަމް އިން ރިސޯޓްތަކަށް ގެއްލުންވާނެ ކަމަކަށް ނުބެލެވޭ: އަފީފް

ލޯކަލް ޓުއަރިޒަމް އިން ރިސޯޓްތަކަށް ގެއްލުންވާނެ ކަމަކަށް ނުބެލެވޭ ކަމަށް މަޓީގެ ނައިބުރައީސް އަދި ދިވެހިރާއްޖޭގެ ފަތުރުވެރިކަމުގެ އެއް ބާނީ ޗަމްޕާ ޙުސައިން ޢަފީފު ވިދާޅުވެއްޖެއެވެ.

ފަތުރުވެރިކަމާއި މެދު ކުރެވޭ ތަސައްވުރާއި މެދު ވާހަކަދައްކަވަމުން އަފީފް ވިދާޅުވީ ރާއްޖޭގައި ހުރި ޕްރޮޑަކްޓް ރަނގަޅުވެފައި ކޮންމެ މީހަކަށް ވެސް ރާއްޖެ އައުމުގެ ފުރުސަތު މިހާރު ހުޅުވިފައިވާ ކަމަށެވެ. ރާއްޖޭގައި ރިސޯޓްތައް އިތުރުވެ، ރަށްރަށުގައި ގެސްޓް ހައުސް ވިޔަފާރި އާއި ހޯމް ސްޓޭގެ ޚިދުމަތް ފެށުމަކީ ފަތުރުވެރިކަމުގެ ދާއިރާ އަށް ލިބުނު ރަނގަޅު ކުރިއެރުމެއްގެ ގޮތުގައި އޭނާ ވަނީ ފާހަގަކުރައްވާފައެވެ. އެކަންތައްތައް ރަނގަޅަށް ކުރިއަށް ގެންގޮސް، ފަތުރުވެރިންގެ ރައްކާތެރިކަމާއި ސަލާމަތް ކަށަވަރުކޮށްދީފި ނަމަ ރާއްޖޭގެ ފަތުރުވެރިކަން ވަރަށް ރަނގަޅަށް ކުރިއަރާނެ ކަމަށް އޭނާ ވަނީ ފާހަގަކުރައްވާފައެވެ.

އެހެންނަމަވެސް އެކަމުގެ ސަބަބުން ރިސޯޓްތަކަށް ގެއްލުންވެދާނެ ކަަމަށް ގަބޫލު ނުކުރައްވާ ކަމަށް އޭނާ ވަނީ ވިދާޅުވެފައެވެ. ރާއްޖެ އަކީ ވަން އައިލެންޑް ވަން ރިސޯޓް ހިމެނޭ ގޮތަށް އޮތް އޮތުމަކީ ރާއްޖޭގެ ފަތުރުވެރިކަމަށް އޮތް ވަރަށް މުހިންމު ބާރެއް ކަމަށް އޭނާ ވިދާޅުވިއެވެ. އެގޮތުން ސުނާމީ ކާރިސާ ދިމާވި އިރުވެސް އެ ހާލަތުން އެހާ އަވަހަށް ރާއްޖޭގެ ފަތުރުވެރިކަމަށް އަރައިގަނެވުނީ ރާއްޖޭގެ ރަނގަޅަށް ހުރި ރަށްރަށުން ސުނާމީގެ ސަބަބުން ލިބުނު ގެއްލުން ފެންނަން ނެތުމުން ކަަމަށާއި ލަންކާ ފަދަ އެހެން ގައުމުތަކުގައި ފަތުރުވެރިކަން ކުރިއަރުވަން އޭރު އުނދަނގޫވީ ސުނާމީގެ ސަބަބުން ލިބުނު ގެއްލުންތައް ވަށައިގެން ފެންނަން ހުރުމުން ކަމަށް އަފީފް ވަނީ ވިދާޅުވެފައެވެ. އެކަންކަމަށް ބަލާއިރު ގެސްޓް ހައުސްގެ ސަބަބުން ރިސޯޓްތަކަށް ވެސް ގެއްލުން ނުކުރާނެ ކަަމަށް އޭނާ ވަނީ ފާހަގަކުރައްވާފައެވެ.

އަފީފް ވިދާޅުވީ ކުރިއަށް އޮތްތަނުގައި ވެސް ރާއްޖޭގެ ފަތުރުވެރިކަން އިތުރަށް ކުރިއަރާނެ ކަަމަށް ބެލެވޭ ކަމަށެވެ. އެގޮތުން ރާއްޖޭގެ ޕްރޮޑަކްޓް ރަނގަޅުވެ އިގްތިސާދު ކުރިއަރާ ވަރަކަށް ފަތުރުވެރިކަމުން ލިބޭ އާމްދަނީ އިތުރުވާނެ ކަމަށް އަފީފް ވިދާޅުވިއެވެ. އެންމެ މުހިންމުކަމަކީ ލިބޭ ފައިސާ ރަނގަޅަށް މެނޭޖްކުރުން ކަމަށް އޭނާ ވަނީ ފާހަގަކުރައްވާފައެވެ. ފަތުރުވެރިކަން ފެށުނު އިރު ކާބޯތަކެތި ހޯދުމަކީ ވެސް ވަރަށް ދަތިކަމެއް ކަަމަށާއި އެހެންނަމަވެސް ފަތުރުވެރިކަމުގެ ސަބަބުން ރާއްޖެ އަށް ވަރަށް ބޮޑު ބަދަލެއް އައި ކަމަށް އޭނާ ވިދާޅުވިއެވެ. އަފީފް ވަނީ ރާއްޖޭގެ ފަތުރުވެރިކަމާއި އެކު މަޑުމަޑުން ރާއްޖެ، ދުނިޔެ އަށް ހުޅުވިގެން ދިޔަ ކަމަށް އޭނާ ވިދާޅުވިއެވެ.

ފަތުރުވެރިކަމުގެ މަސައްކަތް ފުރަތަމަ ފެށި އިރު ވެސް ގިނަ ގޮންޖެހުންތަކާއި ދިމާވި ކަމަށް އަފީފް ފާހަގަކުރެއްވިއެވެ. އެގޮތުން ފަންޑު ހޯދުމުގެ މަސައްކަތަކީ އޭރު ވެސް މިހާރު ވެސް އޮތް ވަރަށް ބޮޑު ދައްޗެއްކަން އަފީފް ވަނީ ފާހަގަކުރައްވާފައެވެ. އެގޮތުން ލޯނު ނަގާ މީހުން ލޯނު ނުދައްކާ ނަމަ ބޭންކްތަކުން ލޯނު ދިނުމަށް ޖެހިލުންވާކަމަށް އޭނާ ވިދާޅުވިއެވެ. ރާއްޖޭގެ ފަތުރުވެރިކަން ފެށީ ވަރަށް އާދައިގެ ގޮތަކަށް ކަމަށް ވީ ނަމަވެސް މިހާރު އެކަން ބަދަލުވެފައިވާ ކަމަށް އަފީފް ވަނީ ފާހަގަކުރައްވާފައެވެ.