ރާއްޖޭގެ އެކި ކަންކޮޅުތަކަށް ފަތުރުވެރިކަން ފުޅާކުރުމަށް ސަރުކާރުން ވަރަށް ބޮޑު އިސްކަމެއް ދެއްވާކަމަށް، ފަތުރުވެރިކަމުގެ ބާނީ އަދި ހެލްތު މިނިސްޓަރު އަހުމަދު ނަސީމް ވިދާޅުވެއްޖެއެވެ.

ގައުމީ ފަތުރުވެރިކަމުގެ ދުވަހާއި ގުޅިގެން ރާއްޖެ ޓީވިއަށް ދެއްވި ޚާއްސަ އިންޓަރވިއުގައި މިނިސްޓަރު ނަސީމް ވިދާޅުވީ ފަތުރުވެރިކަން ފުޅާކުރުމަށް ސަރުކާރުން ކުރާ ކަމަކީ އިންފްރާސްޓްރަކްޗަރ ހަމަޖައްސައިދެއްވުން ކަމަށެވެ. އަދި ހިދުމަތް ދެވޭނީ އެ އިންފްރާސްޓްރަކްޗަރ ބޭނުން ކުރައްވައިގެން ކަމަށެވެ.

މިނިސްޓަރު ވިދާޅުވީ އާރުޓީއެލްއަކީ އެކަމުގެ މިސާލެއް ކަމަށާއި، އެއީ ފައިދާ ނުވާނެ ހިދުމަތެއް ނަމަވެސް، އެކަމުގެ ސަބަބުން އިގްތިސާދީ އެހެނިހެން ކަންކަމަށް މަގުފަހިވެގެންދާނެ ކަމަށެވެ. އެ ނެތިއްޔާ ނުވާނެ ކަމަށާއި، ރަނގަޅު ކޮލިޓީ ޓްރާންސްޕޯޓު ސިސްޓަމެއް ރާއްޖޭގައި ގާއިމްކުރުމަކީ ރާއްޖެ ފަދަ ޖަޒީރާ ގައުމަކަށް ވަރަށް މުހިންމު ކަމެއް ކަމަށެވެ. މިނިސްޓަރު ވިދާޅުވީ އެއީ ތަރައްގީގެ މައިބަދަ ކަމަށާއި، އެކަމަކީ ހުރިހާ ފަރާތްތަކެއްގެ ޝާމިލްވުން ހިމެނިގެންދާކަމެއް ކަމަށެވެ.

އާރުޓީއެލް ފަދަ އިންވެސްޓްމަންޓަކީ އޭގެ ޒާތުގައި އެއިން ފައިދާ ނުވި ނަމަވެސް އޭގެ ސަބަބުން އިގްތިސާދަށް އެތަކެއް ފައިދާތަކެއް ލިބިގެންދާނެ ކަމެއް ކަމަށް މިނިސްޓަރު ވިދާޅުވިއެވެ. މިނިސްޓަރު ވިދާޅުވީ ފަތުރުވެރިކަން ފުޅާކުރުމުގެ ސްޓްރެޓެޖީއެއް ސަރުކާރުގައި އެބައޮތް ކަމަށާއި، މިކަން ކުރެވެނީ އެހެންވެގެން ކަމަށެވެ.

މިނިސްޓަރު ނަސީމް ވިދާޅުވީ ސިއްހީ ދާއިރާއަށް ބަލާލާއިރުގައި ވެސް ސަރުކާރުން ޓަރޝިއަރީ ހޮސްޕިޓަލްތައް ގާއިމްކޮށްފައިވާ ކަމަށެވެ. އަދި ދެން އޮތް މަސައްކަތަކީ ހިދުމަތް ރަނގަޅު ކުރުން ކަމަށާއި، ކަންދިމާކުރި ގޮތުން ކޮވިޑް އައިސްގެން އިގްތިސާދީ ދަތިތަކެއް ދިމާވި ކަމަށާއި، އަންނަ އަހަރުގެ ފުރަތަމަ ކުއާޓާގައި ހިދުމަތްތައް ފުޅާކުރުމުގެ މަސައްކަތްތައް ފެށިގެންދާނެ ކަމަށެވެ.

މިނިސްޓަރު ވިދާޅުވީ ކޮވިޑާއެކު ރާއްޖެގެ ފަތުރުވެރިކަމަށް ފުރުސަތު ލިބިގެންދިޔަ ކަމަށެވެ. ބޯޑަރު ބަންދުކުރުމަށްފަހު އަލުން ޖުލައި 15 ގައި ބޯޑަރު ފަތުރުވެރިންނަށް ހުޅުވާލެވުނު ކަމަށެވެ. މިނިސްޓަރު ވިދާޅުވީ އެއީ ވަރަށް ދުރުވިސްނޭ ގޮތަކަށް ރޭވިގެން ކުރެވުނު ކަމެއް ކަމަށެވެ.

ކޮވިޑް މެނޭޖްކުރުމާއި އިގްތިސާދު ނެގެހެއްޓުމުގެ މޭސްތިރިޔަކީ ރައީސް އިބްރާހިމް މުހައްމަދު ޞާލިހް ކަމަށް މިނިސްޓަރު ވިދާޅުވިއެވެ. މިނިސްޓަރު ވިދާޅުވީ ހުދު އޭނާ ވެސް ހުންނެވީ ބިރުން ކަމަށާއި، ނަމަވެސް ރައީސް އެޅުއްވި ފިޔަވަޅުތަކަކީ އަޅުގަނޑުމެންގެ މާހައުލަށް ބަލާފައި އެޅުއްވި ފިޔަވަޅުތަކެއް ކަމަށެވެ.

މިނިސްޓަރު ވިދާޅުވީ މި ކަންކަން ހިނގާފައިވަނީ ދުރުވިސްނޭ ރަނގަޅު ސިޔާސަތެއްގެ ދަށުން ކަމަށެވެ. ސިއްހީ ވުޒާރާއިން މަސައްކަތް ކުރެއްވީ ރައީސް އެންގެވިގޮތަށް އެކަންކަން ކުރެއްވުމަށް ކަމަށާއި، އެކަން ކާމިޔާބުވެ ކޮވިޑް ކޮންޓްރޯލް ކުރެވިފައިވާ ކަމަށެވެ. އަދި ކޮވިޑް ކޮންޓްރޯލް ކުރުމުގައި ރާއްޖެއަކީ ލާމަސީލު މިސާލެއް ކަމަށެވެ.

މިނިސްޓަރު ވިދާޅުވީ ފަތުރުވެރިކަން ފުޅާކުރުމަށް މިހާރު މަސައްކަތް ކުރަމުން އެދަނީ ރަނގަޅަށް ކަމަށެވެ. އެއަރޕޯޓް ހެދުމާއި، ޓްރާންސްޕޯޓުގެ ވިއުގަ ގުޅުވާލުމާއި ސީޕްލޭންގެ މަސައްކަތް ފެށުން މިއީ ވަރަށް ބޮޑު ކަންކަން ކަމަށެވެ.