ދެމެހެއްޓެނިވި ގޮތެއްގައި އޯގާތެރި، ދުޅަހެޔޮ މުޖުތަމައެއް ބިނާކުރަން އެންމެ މުހިންމު މަސައްކަތަކީ ނަފްސާނީ ދުޅަހެޔޮކަން ތަރައްގީ ކުރުން: ނަސީމް

ދެމެހެއްޓެނިވި ގޮތެއްގައި އޯގާތެރި، ދުޅަހެޔޮ މުޖުތަމައެއް ބިނާކުރަން ކުރަން ޖެހޭ އެންމެ މުހިންމު މަސައްކަތަކީ ނަފްސާނީ ދުޅަހެޔޮކަން ތަރައްގީ ކުރުން ކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެއެވެ.

ނަސީމް މިފަދައިން ވިދާޅުވީ ނަފްސާނީ ދުޅަހެޔޮކަމާ ގުޅޭ ގޮތުން އާއްމުން ހޭލުންތެރިކުރުވުމަށް ހޯމަ ދުވަހުގެ ރޭ ފެށި "ކިހިނެއް؟" ކެމްޕޭން ފެއްޓުމުގެ ރަސްމިއްޔާތުގައި ވާހަކަދައްކަވަމުންނެވެ. އޭނާ ވިދާޅުވީ ސިއްޙީ ގޮތުން ދުޅަހެޔޮވުމަކީ ޖިސްމާނީ ގޮތުންނާއި ނަފްސާނީ ގޮތުންނާއި އިޖުތިމާއީ ގޮތުން ދުޅަހެޔޮވުން ކަމަށާއި ސިއްހަތަކީ އަސާސީ ޙައްގަކަށްވާއިރު އެ ޙައްގު ކަށަވަރު ކުރެވޭނީ ވެސް ނަފްސާނީ ދުޅަހެޔޮކަމުގެ ޙައްގު ކަށަވަރު ކުރެވިގެން ކަމަށެވެ.

ދުނިޔޭގެ ސިއްޙަތު ޖަމިއްޔާ، ޑަބްލިއުއެޗްއޯގެ ރިޕޯޓާ ހަވާލާދީ ނަސީމް ވިދާޅުވީ ކޮވިޑަށްފަހު އިތުރުވެފައިވާ އެންމެ ބޮޑު ސިއްޙީ މައްސަލައަކީ ނަފްސާނީ ބަލިތައް ކަމަށެވެ. އެކަމާ ގުޅިގެން ދުނިޔޭގެ ފެންވަރުގައި އެކަމަށް ހާއްސަ އިސްކަމެއް ދީގެން ޑަބްލިއުއެޗްއޯއިން މަސައްކަތްތައް ފަށާފައިވާއިރު މި ސަރުކާރުން އޭގެ ކުރިންވެސް ނަފްސާނީ ދުޅަހެޔޮކަން ކަށަވަރު ކުރުމަށް މަސައްކަތްތައް ފަށާފައިވާ ކަމަށް އޭނާ ވިދާޅުވިއެވެ. އަދި މިކަން ކުރެވެނީ ސަރުކާރުގެ އެންމެ އިސް ދަފުގައި ވިލަރެސް ކުރެވިގެން ކަމަށާއި އަތޮޅުތެރޭގައި އެ މަސައްކަތް ފުޅާކުރުމަށް މަސައްކަތް ފަށާފައިވާ ކަމަށް ވެސް ވިދާޅުވިއެވެ.

ނަސީމް އިތުރަށް ވިދާޅުވީ މަސްތުވާތަކެއްްޗާ ގުޅިފައިވާ ތަފާތު އިޖުތިމާއީ މައްސަލަތަކުގެ ސަބަބުން ރައްޔިތުންގެ ނަފްސާނީ ދުޅަހެޔޮކަމަށް ސީދާ ގޮތުން ނޭދެވޭ އަސަރު ކުރާ ކަމަށެވެ. އަދި ސޯޝަލް މީޑިއާ ފަދަ ވަސީލަތްތައް މެދުވެރިކޮށް މީހުންގެ އަބުރު ކަތިލުން ފަދަ ކަންކަން ކުރަމުން އަންނައިރު އޭގެ ސަބަބުން ވެސް ނަފްސާނީ މައްސަލަތައް ދިމާވާ ކަމަށާއި އެކަންކަން ހުއްޓާލަން ޖެހޭ ކަމަށް އޭނާ ވިދާޅުވިއެވެ.

ނަސީމް ވިދާޅުވީ ނަފްސާނީ ސިއްޙަތާ މެދު މީހުން ދެކޭ ގޮތާއި މައުލޫމާތު ހުރި މިންވަރާއި ތަފާތު ކުރުން އިތުރު ކަމާއި ހޭލުންތެރިކަން ކުޑަ މިންވަރު ދެނެގަނެވިފައިވާ ކަމަށެވެ. އެހެންކަމުން "ކިހިނެއް؟" ކެމްޕޭނުގެ ސަބަބުން އެ މައުލޫމާތުތައް އިތުރަށް ހާމަކޮށް ރައްޔިތުން ހޭލުންތެރިކުރެވޭނެ ކަމަށް ވެސް ވިދާޅުވިއެވެ.

ރާއްޖޭގައި ނަފްސާނީ އެހީތެރިކަން ބޭނުންވާ މީހުންގެ އަދަދު އިތުރުވެފައިވާއިރު ޚިދުމަތް ދޭން ތިބި މީހުންގެ އަދަދު މަދުކަން ނަސީމް ފާހަގަކުރެއްވިއެވެ. އެހެންކަމުން އެކަން ބަދަލު ކުރުމަށް ވެސް މަސައްކަތް ކުރައްވާނެ ކަމަށް އޭނާ ވިދާޅުވިއެވެ.