މާމެންދޫ އަދި ނިލަންދޫ ސިއްހީ މަރުކަޒު އަޕްގްރޭޑް ކުރުމުގެ މަސައްކަތް އަންނަ އަހަރު ކުރީކޮޅު ނިމޭނެ – ނަސީމް

މާމެންދޫ އަދި ނިލަންދޫ ސިއްހީ މަރުކަޒު އަޕްގްރޭޑް ކުރުމުގެ މަސައްކަތް އަންނަ އަހަރު ކުރީކޮޅު ނިމޭނެ ކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެއެވެ.

މިނިސްޓަރު ނަސީމް މިހެން ވިދާޅުވީ ދާންދޫ ދާއިރާގެ މެންބަރު ޔަޢުޤޫބު ޢަބްދުﷲ، މިނިސްޓަރ އޮފް ހެލްތު އަޙްމަދު ނަސީމާއި ކުރެއްވި ސުވާލުގެ ޖަވާބު ދެއްވަމުންނެވެ.

މިނިސްޓަރު ވިދާޅުވީ ގއ. މާމެންދޫ ސިއްހީ މަރުކަޒުގެ އެކްސްޓެންޝަން އިމާރާތަކީ ލާމަރުކަޒީ ގާނޫނުގެ ދަށުން ކައުންސިލާއި ހަވާލުކޮށްގެން ކުރިއަށް ގެންދެވުނު މަސައްކަތެއް ކަމަށެވެ. އަދި މި ޕްރޮޖެކްޓު ނުނިމި ގިނަ ދުވަސްވުމުގެ ސަބަބުން ޕްރޮޖެކްޓު ހަވާލުކުރެވުނު ފަރާތުގެ ކޮންޓްރެކްޓު ޓަރމިނޭޓުކޮށް، އެތަނުގައި ނުނިމި ހުރި މަސައްކަތް މިހާރު ކުރިއަށް ގެންދަނީ މިނިސްޓްރީން ހަވާލުކުރި ފަރާތުން ކަމަށެވެ.

އަދި އެކްސްޓެންޝަން އިމާރާތުގެ ނުނިމި ހުރި މަސައްކަތާއި ލެބޯޓަރީ ގާއިމްކުރުމަށް އަޅަންޖެހޭ އިމާރާތް އެޅުމަށް ކޮންޓްރެކްޓަރަކާއި ހަވާލުކުރެވި މި 2 ޕްރޮޖެކްޓުގެ މަސައްކަތް އަންނަ އަހަރުގެ ފެބްރުއަރީއަށް ނިންމާލެވޭނެކަމަށް ލަފާކުރެވޭ ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ނިލަންދޫ ސިއްހީ މަރުކަޒުގެ އެކްސްޓެންޝަން އިމާރާތަކީ ލާމަރުކަޒީ ގާނޫނުގެ ދަށުން ކައުންސިލާ ހަވާލުކޮށްގެން ކުރިއަށް ގެންދެވުނު މަސައްކަތެއް ކަމަށެވެ. އަދި މި މަސައްކަތް ނުނިމި ގިނަ ދުވަސްވުމުގެ ސަބަބުން ޕްރޮޖެކްޓު ޓަރމިނޭޓުކޮށް އެތަނުގައި ނުނިމި ހުރި މަސައްކަތް ކުރިއަށް ގެންދަނީ މިނިސްޓްރީގެ ފަރާތުން ކަމަށެވެ.

ނަމަވެސް އެކްސްޓެންޝަން އިމާރާތުގެ ނުނިމި ހުރި މަސައްކަތާއި ލެބޯޓަރީ ގާއިމްކުރުމަށް އަޅަންޖެހޭ އިމާރާތް އެޅުމަށް 2 ފަހަރު އިއުލާންކޮށްގެން ވެސް ހުށަހަޅާފައިވާ ބިޑްތައް މާބޮޑަށް އަގުބޮޑުވެފައިވާތީ އަލުން އިއުލާންކުރުމަށް ހަމަޖެހިފައިވާ ކަމަށެވެ. އަދި މި ޕްރޮޖެކްޓުގެ މަސައްކަތް އަންނަ އަހަރުގެ އެޕްރީލް އަށް ނިންމާލެވޭނެކަމަށް އުއްމީދުކުރައްވާ ކަމަށް މިނިސްޓަރު ވިދާޅުވިއެވެ.