ދިވެހިރާއްޖޭގެ ގައުމީ ޔުނިވަރސިޓީގެ "ޓޫރިޒަމް ޖުބްލީ ވޯކް" ބާއްވައިފިއެވެ.
ހޮނިހިރު ދުވަހުގެ ހަވީރު ކުރިއަށްގެންދިޔަ މި ހަރަކާތަކީ ރާއްޖޭގެ ފަތުރުވެރިކަމުގެ ރަންޔޫބީލް ފާހަގަކުރުމުގެގޮތުން، ގައުމީ ޔުނިވަރސިޓީގެ ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް (އެފްއެޗްޓީއެސް)އާއި ޓޫރިޒަމް މިނިސްޓްރީ ގުޅިގެން ކުރިއަށްގެންދިޔަ ހަރަކާތެކެވެ. މި ހަރަކާތް ޝަރަފުވެރިކޮށްދެއްވީ ޓޫރިޒަމް މިނިސްޓަރ ޑރ. އަބްދުﷲ މައުސޫމެވެ.
މި ހަރަކާތުގައި އެ ފެކަލްޓީގައި ކިޔަވަމުންދާ ދަރިވަރުންނާއި މުސްކުޅި ދަރިވަރުންވެސް ވަނީ ބައިވެރިވެފައެވެ. އަދި ގިނަ އަދަދެއްގެ ސްކޫލް ދަރިވަރުންވެސް ބައިވެރިވިއެވެ.
އެފްއެޗްޓީއެސްއިން މައުލޫމާތުދޭގޮތުގައި "ޓޫރިޒަމް ޖުބްލީ ވޯކް"ގެ ނަމުގައި ކުރިއަށްގެންދިޔަ ހިނގާލުމުގައި 300އާ ގާތްކުރާ އަދަދަކަށް މީހުން ބައިވެރިވިއެވެ. އަދި މި ހަރަކާތަކީ ވަރަށް ކާމިޔާބު ހަރަކާތެއް ކަމަށްވެސް އެ ފެކަލްޓީން ބުނެއެވެ.
މި ހިނގާލުން ފެށީ ހޮނިހިރު ދުވަހުގެ ހަވީރު ގައުމީ ޔުނިވަރސިޓީގެ އިދާރީ މަރުކަޒުންނެވެ. ހިނގާލުމުގެ ތެރެއިން ގިނަ ހަރަކާތްތަކެއް ކުރިއަށްގެންގޮސްފައިވާއިރު ހިނގާލުން ނިންމާލާފައިވަނީ ބޮޑުތަކުރުފާނު މަގުން ގޮސް، ޔޫތު ސެންޓަރާ ހަމައަށެވެ.
ގައުމީ ޔުނިވަރސިޓީގެ ވައިސް ޗާންސެލަރ ޑރ. މުހައްމަދު ޝަރީފު ވިދާޅުވިގޮތުގައި ރާއްޖޭގެ ފަތުރުވެރިކަމަށް 50 އަހަރު ފުރުމުގެ މުނާސަބާ ފާހަގަކުރުމަށް އެ ޔުނިވަރސިޓީން މިފަދަ ހަރަކާތެއް ބޭއްވީ ރާއްޖޭގައި ފަތުރުވެރިކަމުގެ ދާއިރާއިން މީހުން ތަމްރީން ކުރުމުގައި އެންމެ ދިގު މުއްދަތަކަށް މަސައްކަތްކުރަމުން އަންނަ އިންސްޓިޓިއުޓަށް އެ ޔުނިވަރސިޓީ ވާތީކަމަށެވެ. އަދި އެފްއެޗްޓީއެސްއިން ކިޔަވާ ކޯސްތަކަކީ އިންޓަރނޭޝަނަލީ އެކްރެޑިޓެޑް ކޯސްތަކަށް ހެދުމަށް މިހާރު މަސައްކަތް ކުރަމުން އަންކަން ފާހަގަކޮށް ރާއްޖޭގެ ސްކޫލްތަކުގެ ހުރިހާ ދަރިވަރުން އެ ފެކަލްޓީއާ ގުޅުމަށް ދައުވަތުދެއްވިއެވެ.
މި ހިނގާލުން ޝަރަފުވެރިކޮށްދެއްވައި ޓޫރިޒަމް މިނިސްޓަރ ޑރ. އަބްދުﷲ މައުސޫމްވެސް ވަނީ ސްކޫލް ދަރިވަރުންނަށް ފަތުރުވެރިކަމުގެ ދާއިރާއަށް ވަނުމަށް ހިތްވަރުދެއްވާފައެވެ. އަދި މިހާރު އެ ދާއިރާއަށް ނުކުންނަ ދަރިވަރުންނަށް ބަލައި، އެ ދާއިރާ ކުރިއަށް އޮތް ތަނުގައިވެސް ކާމިޔާބު ދާއިރާއަކަށް ވެގެންދާނެ ކަމުގެ އުއްމީދު އެބައޮތް ކަމަށް މިނިސްޓަރ ވިދާޅުވިއެވެ.
ޓޫރިޒަމް އިންޑަސްޓްރީއަކީ މީހުންނާ ބައްދަލުވާ އިންޑަސްޓްރީ. މީހުންނަށް އުފާވެރިކަން ގެނެސްދޭ އިންޑަސްޓްރީ. މީހުންގެ މައްސަލަތައް އަޑުއަހާ އިންޑަސްޓްރީ. ދިވެހި ރާއްޖެއަށް އިގްތިސާދީގޮތުން ކުރިއެރުން ގެންނަ އިންޑަސްޓްރީ. އިންސާނީ ޚިދުމަތް ބޭނުންކުރާ އިންޑަސްޓްރީ.ޓޫރިޒަމް މިނިސްޓަރ ޑރ. އަބްދުﷲ މައުސޫމް
ފަތުރުވެރިކަމުގެ ރަންޔޫބީލް ފާހަގަކުރުމަށް ބޭއްވި މި ހިނގާލުމުގައި، ގައުމީ ޔުނިވަރސިޓީން ކިޔަވައިގެން މިއަދު ފަތުރުވެރިކަމުގެ ދާއިރާގައި ކާމިޔާބު މަގާމުތަކުގައި ތިބި ފަރާތްތަކުން ވަނީ ހިނގާލުމުގެ ބައިވެރިންނަށް ހިތްވަރުދީ އެ ފަރާތްތަކުގެ ތަޖުރިބާތައް ބައިވެރިންނާ ހިއްސާކޮށްފައެވެ.
