އަމާޒަކީ 2030ގެ ކުރިން ގައިންގަޔަށް ނާރާ ބަލިތައް ބޮޑުތަނުން ދަށްކުރުން: ނަސީމް
މިފަދަ ބަލިތަކުން ރައްކާތެރިވުމަށް ދިރިއުޅުމުގެ ވައްޓަފާޅި އަށް ބޮޑު ބަދަލެއް ގެންނަންޖެހޭ
ހެލްތު މިނިސްޓަރު އަހުމަދު ނަސީމް
އަމާޒަކީ 2030 ވަނަ އަހަރުގެ ނިޔަލަށް ގައިންގަޔަށް ނާރާ ބަލިތައް މިހާރު ހުރި ނިސްބަތުން، މަދުވެގެން 3 ބައިކުޅަ 1 ބައި ދަށްކުރުން ކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެއެވެ.
ހެލްތު މިނިސްޓަރު މިފަދައިން ވިދާޅުވީ ގައިންގަޔަށް ނާރާ ބަލިތަކުގެ ހިރާސްތަކުގެ މަޢުލޫމާތު ހާމަކުރުމަށާއި ގައިންގަޔަށް ނާރާ ބަލިތައް ކޮންޓްރޯލު ކުރުމަށް ކަނޑައަޅާފައިވާ ޚާއްޞަ މަސައްކަތްތައް އިފްތިތާޙު ކުރުމުގެ ޖަލްސާގައި ވާހަކަފުޅުދައްކަވަމުންނެވެ.
މި ޖަލްސާގައި ގައިންގަޔަށް ނާރާ ބަލިތައް ކޮންޓްރޯލު ކުރުމަށް ކެމްޕޭނެއް އިއުލާނުކޮށް، އެކްޝަން ޕްލޭނެއް ވަނީ އެކުލަވާލާފައެވެ. މިނިސްޓަރު ވަނީ މި ކެމްޕޭން އަދި އެކްޝަން ޕްލޭން ތަންފީޒު ކުރުމަށާއި އެހެން މުއައްސަސާތަކާ ގުޅިގެން މަސައްކަތްކުރަމުން ގެންދާނެ ކަމުގެ ފުރިހަމަ ޔަޤީންކަން ދެއްވާފައެވެ. މި ޕްލޭނަކީ ފަރުދުންނާއި ޖަމާއަތްތަކާއި، ސަރުކާރާއި ޕްރައިވެޓް ސެކްޓަރާ ގުޅިގެން ވަށާޖެހޭގޮތަކަށް އެކުގައި މަސައްކަތް ކުރުމަށް އެކުލަވާލާފައިވާ ޕްލޭނެއްކަން މިނިސްޓަރު ވިދާޅުވިއެވެ.
ގައިންގަޔަށް ނާރާބަލިތަކުގެ ހިރާސްތައް ރާއްޖޭގައި ހުރިގޮތް ދެނެގަތުމަށްޓަކައި އެމްއެންޔޫ އިން ކޮށްފައިވާ ސާވޭ އަށް އަލިއަޅުވާލައްވައި މިނިސްޓަރު ނަސީމް ވިދާޅުވީ ގައިންގަޔަށް ނާރާ ބަލިތަކުން ރައްކާތެރިވެވޭނީ ދިރިއުޅުމުގެ ވައްޓަފާޅި އަށް ވަރަށް ބޮޑު ބަދަލެއް ގެނެސްގެންކަން ހާމަވެގެން ގޮސްފައިވާކަމަށެވެ. ރަނގަޅު ކެއުން ކެއުމާއި، ހެލިފެލިވެ އުޅުމާއި، ނުރަނގަޅު އާދަތަކުން ދުރުވެ، ތިމާގެ އަމިއްލަ ސިއްހީ ހާލަތު ޔަގީންކޮށް ދެނެގަތުން މުހިންމުކަމުގައި މިނިސްޓަރު ނަސީމް ފާހަގަކުރެއްވިއެވެ.
އަދި މިއީ ކޮންމެ މީހަކު ވެސް އެމީހެއްގެ އަމިއްލަ ނަފުސަށް އަދާކޮށްދޭންޖެހޭ ޒިންމާ އެއް ކަމަށާއި، ކޮންމެ މީހަކު ވެސް މި ޒިންމާ އަދާކޮށް، ތިމާ ދުޅަހެޔޮ ދިރިއުޅުމަކަށް އަހުލުވެރިވެ، ތިމާގެ ބެލުމުގެ ދަށުގައި ތިބޭ އެހެން މީހުންނަށް ރަނގަޅު ނަމޫނާ ދައްކާ، ޅަދަރިން ޞިއްޙީ ރަނގަޅު އާދަތަކަށް އަހުލުވެރި ކުރުވަންޖެހޭކަމުގައި މިނިސްޓަރު ނަސީމް ވިދާޅުވިއެވެ.
