ކުރިން އެއް މަސްދުވަހަށް ދެމުން އައި އުމްރާ ވިސާ ކުރިޔަށް އޮތް ތާނގައި ކޮންމެ ގައުމެއްގެ ކޮންމެ މީހަކަށްވެސް ތިން މަސް ދުވަހަށް ދޭން ސައުދީ ސަރުކާރުން ނިންމައިފި އެވެ. މިކަން އިއުލާން ކުރައްވާފައިވަނީ ސައުދީ މިނިސްޓްރ އޮފް ހައްޖު އެންޑް އުމްރާ ޑރ ތައުފީގު އަލް ރާބިޔާ އުސްބަކިސްތާނަށް ކުރެއްވި ދަތުރުފުޅެއްގައި އެގައުމުގެ ރައީސް ޝައުކަތު މީރްޒީޔޮޔޭވް އާއެކު އާދީއްތަ ދުވަހު ބޭއްވެވި ބައްދަލުކުރެއްވުމުގައެވެ.
މިދަތުރުފުޅުގައި ޒަމާންވީ ރަހުމަތްތެރި ދެގައުމު ކަމަށްވާ ސައުދީ އަރަބިއްޔާ އާއި އުޒްބަކިސްތާނާ ދެމެދު ވަނީ އެކި ދާއިރާތަކުން އެއްބާރުލުން އިތުރު ކުރުމުގެ އެތައް އެއްބަސްވުމެއްގައި ސޮއިކޮށްފައެވެ. މީގެ ތެރެއިން ގިނަ އެއްބަސްވުންތަކަކީ ހައްޖާއި އުމްރާގެ ތެރެއިން އެއްބާރުލުން އިތުރު ކުރުމަށް ވެވުނު އެއްބަސްވުންތަކެވެ.
ސައުދީ މިނިސްޓަރު އޮފް ހައްޖު ފާހަގަ ކުރެއްވި ގޮތުގައި ކޮވިޑް19 އަށް ފަހު ބޯޑަރު ހުޅުވާލުމުން އެންމެ ފަހު ހައްޖުގައި ވެސް އުޒްބަކިސްތާންގެ 12ހާސް މީހުން ހައްޖުވެފައިވެއެވެ. އަދި ފާއިތުވި ދެމަސް ދުވަހު އެކަނި ވެސް އުޒްބަކިސްތާންގެ 36ހާސް މީހުން ވަނީ އުމްރާގެ އަޅުކަން އަދާކޮށްފައެވެ.
ސައުދީ މިނިސްޓްރ އޮފް ހައްޖު އެންޑް އުމްރާ ޑރ ތައުފީގު އަލް ރާބިޔާ އުޒްބަކިސްތާނަށް ކުރެއްވި ދަތުރުފުޅުގައި މަޝްވަރާކުރެވުނު ކަންކަމުގެ ތެރޭގައި ހައްޖާއި އުމްރާވެރިންނަށް ދެވޭ ބައެއް ޚިދުމަތްތައް އޮޓޮމޭޓުކޮށް ވިސާ އަވަހަށް ލިބޭނެގޮތް ހަމަޖެއްސުން ހިމެނެއެވެ. މީގެއިތުރުން އެދެގައުމު ދެމެދު އިތުރު ފްލައިޓުތައް ހަމަޖެއްސުމާއި ބެހޭ ގޮތުން ވެސް މަޝްވަރާތައް ކުރެވުނެވެ.
