މޯލްޑިވްސް ޕޯޓްސް ލިމިޓެޑް (އެމްޕީއެލް) އަށް ދިމާވެފައިވާ އެންމެ ބޮޑު އެއް ގޮންޖެހުމަކީ ލޭބަރުންގެ ގޮތުގައި މަސައްކަތް ކުރާ ސްޓާފުންގެ ދަތިކަން ކަމަށް އެމްޕީއެލް އިން ބުނެފިއެވެ.
އާދިއްތަދުވަހު ބޭއްވި ނޫސްވެެރިންގެ ބައްދަލުވުމުގައި އެމްޕީއެލްގެ ސީއީއޯ ޝާހިދު އަލީ ވިދާޅުވީ އެކަން ހައްލުކުރުމަށް މަސައްކަތްކުރަމުންދާ ކަމަށެވެ. މީގެ އިތުރުންވެސް އެމްޕީއެލްގެ ޚިދުމަތްތައް ފުޅާކުރަން ގިނަ މަސައްކަތްތަކެއް ކުރަމުންދާ ކަމަށް އޭނާ ވަނީ ފާހަގަކުރައްވާފައެވެ. އެގޮތުން ބައެއް ސަރަހައްދުތަކުގަ ޕޭވިންގ ބޮޑުކުރުމުގެ މަސައްކަތެއް ކުރިއަށް ގެންދަން ނިންމާފައިވާ ކަމަށާއި ބިންގަނޑު ލެވަލްކޮށް ގާ އަތުރާ ޕޭވްކުރުމުގެ މަސައްކަތް ކުރުމަށް ހަމަޖެހިފައިވާ ކަމަށް އޭނާ ވިދާޅުވިއެވެ. އެތަންތަން ނިމުމުން އެމްޕީއެލްގައި އިތުރު ޖާގަ ލިބޭނެ ކަމަށް އޭނާ ވަނީ ފާހަގަކުރައްވާފައެވެ. ޝާހިދު އިތުރަށް ވިދާޅުވީ އެމްޕީއެލްގެ މަސައްކަތްތަކަށް ބޭނުންވާ އިތުރު އިތުރު ވަސީލަތްތައް ހޯދުމުގެ މަސައްކަތް ވެސް މިހާރު ކުރިއަށްދާ ކަމަށެވެ.
ޝާހިދު ވަނީ މިހާރު އެމްޕީއެލްގެ މަސައްކަތްތައް ރަނގަޅުކަމަށް ފާހަގަކުރައްވާފައެވެ. މިއަހަރުގެ 3 ވަނަ ކުއާޓަރު ނުވަތަ ޖުލައިން އޮގަސްޓަށް ހިނގި މުއްދަތުގައި އެމްޕީއެލްއަށް ކްލިއަރކުރި މުދަލުގެ މިންވަރު ވަަރަށް ބޮޑަށް އިތުރުވެފައިވާކަމަށް އޭނާ ފާހަގަކުރެއްވިއެވެ. މާލޭގެ ވިޔަފާރި ބަނދަރުތަކުން މިހާރު އެވްރެޖްކޮށް ކޮންމެ ދުވަހަކު 300 ކޮންޓެއިނަރުގެ މުދާ ކްލިއަރ ކުރެވޭކަމަށް އޭނާ ވިދާޅުވިއެވެ.
ޝާހިދު ވިދާޅުވީ މާލެއާއި ހުޅުމާލޭގެ ކްލިއަރިން އޮޕަރޭޝްނަތަކާ އަޅާ ކިޔާއިރު 2021 ވަނަ އަހަރު އެވްރެޖްކޮށް ދުވާލަކުު 200 ކޮންޓެއިނަރ ކްލިއަރކުރެވުނުނަމަވެސް، މިހާރު އެވްރެޖްކޮށް ދުވާލަކު 300 ކޮންޓެއިނަރ ކްލިއަރކޮށްފައިވާ ކަމަށެވެ.
