ސ. ހުޅުދޫ ބަނދަރު ތަރައްޤީ ކުރުމުގެ މަސައްކަތުގެ 93 އިންސައްތަ ނިމިފައިވާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނެފިއެވެ.

އެމްޓީސީސީން ބުނީ، އެ މަސައްކަތް މިހާރު ކުރިއަށްދާ ކަމަށާއި، މަސައްކަތަށް ބޭނުންވާ ބޮޑު ހިލައިގެ ދެވަނަ ޝިޕްމަންޓް ސައިޓަށް ގެންދެވިފައިވާ ކަމަށެވެ.

މި މަޝްރޫއުގެ ދަށުން 88,623 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުމާއި، 114 މީޓަރުގެ ބޭރުތޮއްޓެއް ލުމާއި، 742 މީޓަރުގެ އެއްގަމު ތޮއްޓެއް ލުމުގެ މަސައްކަތް ހިމެނެއެވެ. އަދި 624 މީޓަރުގެ ސަރަހައްދެއްގައި ރިވެޓްމަންޓް ޖެހުމާއި، 2250 އަކަ މީޓަރުގެ ސަރަހައްދެއްގައި ޕޭވްމަންޓް ހަދައި، މަގު ބައްތި ޖެހުމުގެ މަސައްކަތް ވެސް ހިމެނެއެވެ.

މީގެ އިތުރުން 742 މީޓަރުގެ ސަރަހައްދެއްގައި އެއްގަމުތޮށި ލުމާއި، 2250 އަކަމީޓަރުގެ ސަރަހައްދެއްގައި ޕޭވްމަންޓް ހެދުމާއި، މަގު ބައްތި ހަރުކުރުމުގެ މަސައްކަތްވެސް އެ މަޝްރޫއުގެ ތެރޭގައި ހިމެނެއެވެ. މި މަސައްކަތް 2020 ވަނަ އަހަރު ޑިޒައިން އެންޑް ބިލްޑުގެ އުސޫލުން އެމްޓީސީސީއާ ހަވާލުކޮށްފައިވަނީ 66.3 މިލިއަން ރުފިޔާއަށެވެ.

މި މަޝްރޫއު ފެށުމުގެ ކުރިން އެ މަސައްކަތުގެ ސަބަބުން ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓު ގަބޫލުކުރިކަމުގެ ލިޔުމާ ޚިލާފަށް މަސައްކަތްކުރަމުން އަންނާތީ، ހުޅުދޫ ބިން ހިއްކުމާއި ފަޅު ކޮނުމުގެ އެންމެހާ މަސައްކަތެއް ހުއްޓާލުމަށް އީޕީއޭއިން މީގެ ކުރިން އެންގިއެވެ. ނަމަވެސް އެމްޓީސީސީން މިވަނީ އެ މަސައްކަތް މިހާރު އަނެއްކާވެސް ކުރިއަށްދާކަން ހާމަކޮށްފައެވެ.

ހުޅުދޫ ބަނދަރު ތަރައްޤީ ކުރުމުގެ މަޝްރޫޢުއަކީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެ ކުންފުންޏާއި ހަވާލުކޮށްގެން ކުރިއަށްގެންދާ މަޝްރޫޢުއެކެވެ. އެގޮތުން މި މަޝްރޫޢުގެ ދަށުން، ހާބަރ-ބްރިޖްގެ ކޮލަމްގެ މަސައްކަތްތައް ވަނީ ނިމިފައިކަމަށް އެމްޓީސީސީއިން ބުނެއެވެ. އަދި އެއްގަމުތޮށީގެ ކޮންކްރީޓް މަސައްކަތްތައް ވަނީ ކުރިއަށް ގެންގޮސްފައެވެ.