އެއްގަމު އުޅަނދުތަކުގެ ނަންބަރު ބޯޑު ރަނގަޅު ނުކުރާނަމަ ހޮނިހިރު ދުވަހުން ފެށިގެން ފިޔަވަޅު އަޅާނެ
ފުލުހުން ވަނީ ނަންބަރު ބޯޑުތައް ބަދަލުކުރަން ދެ ހަފުތާގެ މުއްދަތެއް ދީފައި
މަގެއްގައި ވެހިކަލްތައް ޕާކުކޮށްފައި
އެއްގަމުގައި ދުއްވާ އިންޖީނުލީ އުޅަނދުތަކުގެ ނަންބަރު ބޯޑު ޤަވާއިދާ އެއްގޮތަށް ރަނގަޅު ނުކުރާ ފަރާތްތަކާމެދު ހޮނިހިރު ދުވަހުން ފެށިގެން ފިޔަވަޅު އަޅަން ނިންމައިފިއެވެ.
މި މަހުގެ 21 ވަނަ ދުވަހު ފުލުހުން ނެރުނު ބަޔާނެއްގައި ބުނީ ޓްރާންސްޕޯޓް މިނިސްޓްރީގެ ގަވާއިދާ އެއްގޮތަށް ނަންބަރު ބޯޑު ރަނގަޅު ކުރުމަށް އޮކްޓޯބަރު މަހުގެ 1 ވަނަ ދުވަހާ ހަމައަށް ފުރުސަތު ދޭން ނިންމާފައިވާ ކަމަށެވެ. އަދި 1 އޮކްޓޯބަރުން ފެށިގެން ނަންބަރު ބޯޑުތައް ބަދަލު ނުކުރާނަމަ އެ ފަރާތްތަކާމެދު ފިޔަވަޅު އަޅަން ނިންމާފައިވާ ކަމަށް ވެސް ފުލުހުން ވަނީ ބުނެފައެވެ.
ފުލުހުން މިގޮތަށް ބުނެފައިވަނީ އެއްގަމު އުޅަނދުތަކުގެ ނަންބަރު ބޯޑު ގަވާއިދާ އެއްގޮތަށް ބަހައްޓަން ޓްރާންސްޕޯޓް މިނިސްޓްރީން ނިންމާފައިވަނިކޮށެވެ. އެ މިނިސްޓްރީން 19 ސެޕްޓެމްބަރު 2022 ގައި ނެރުނު އިއުލާނުގައި ބުނެފައިވަނީ އެއްގަމުގައި ދުއްވާ އިންޖީނުލީ ބައެއް އުޅަނދުތަކުގައި ހަރުކޮށްފައި ހުންނަ ނަންބަރު ބޯޑު ހަދާފައި ހުންނަނީ “އެއްގަމު ދަތުރު ފަތުރު ގާނޫނު” ގެ 3 ވަނަ މާއްދާގެ (ހ) އިން ބާރުލިބިގެން އެކުލަވާލެވިފައިވާ ގަވާއިދު “އެއްގަމުގައި ދުއްވާ އިންޖީނުލީ އުޅަނދު ރަޖިސްޓްރީ ކުރުމުގެ ގަވާއިދު” ގައި ބުނެފައިވާ ގޮތަށް ނޫން ކަމަށް ފާހަގަ ކުރެވިފައިވާ ކަމަށެވެ. އެހެންކަމުން އެ އުޅަނދުތަކުގެ ނަންބަރު ބޯޑު އެ ގަވާއިދުގައި ބަޔާންކޮށްފައިވާ މިންގަނޑާ އެއްގޮތަށް ބޭނުން ކުރުމަށް ވަނީ އަންގާފައެވެ.
“އެއްގަމުގައި ދުއްވާ އިންޖީނުލީ އުޅަނދު ރަޖިސްޓްރީ ކުރުމުގެ ގަވާއިދު”ގައި ބުނެފައިވާ ގޮތުގައި ނަންބަރު ބޯޑުގެ އަކުރުތައް ހުންނަން ޖެހޭނީ “އޭރިއަލް ބޯލްޑް” ފޮންޓުން ކަމަށެވެ. އަދި އަކުރުތަކުގެ ސައިޒު ހުންނަންވާނީ ގަވާއިދުގައި ބުނެފައިވާ ގޮތަށް ކަމަށާއި މިއާއި ޚިލާފަށް ނަންބަރު ބޯޑުގެ އަކުރުތައް ހަދައިގެން ބޭނުން ކުރުމަކީ މަނާކަމެއް ކަމަށް ވެސް ވަނީ ބުނެފައެވެ.
މީގެ އިތުރުން ނަންބަރު ބޯޑުގައި ހުންނަ އަކުރުތައް ވަކިން ކަނޑާ ނަގައިގެން ބޭނުންކުރުމާއި އަކުރުތައް އެއް މިލިމީޓަރަށް ވުރެ އުސްކޮށް އުފުލިފައި ހުންނަ ގޮތަށް ހަދައިގެން ބޭނުން ކުރުމަކީވެސް މަނާކަމެކެވެ. އަދި އެއްގަމުގައި ދުއްވާ އުޅަނދުފަހަރުގެ ނަންބަރު ބޯޑު ކަރުދާހުން ހަދައިގެން ބޭނުންކުރުމަކީ ވެސް މި ގަވާއިދުގައި ބުނާގޮތުން މަނާކަމެކެވެ.
ގަވާއިދުގައި އިތުރަށް ބުނެފައި ވަނީ ވިޔަފާރި އުސޫލުން ބޭނުންކުރާ އުޅަނދު ފަހަރުގެ ނަމްބަރު ބޯޑު ހުންނަން ވާނީ ރީނދޫ ކުލައިގެ ބޯޑެއްގައި ކަޅުކުލައިގެ އަކުރުން ކަމަށެވެ. އަދި ކޮޮންސިއުލަރ މިޝަންތަކުގައި ބޭނުންކުރާ އުޅަނދުތަކުގެ ނަންބަރު ބޯޑު ނޫ ކުލައިގެ ބޯޑެއްގައި ހުދު ކުލައިގެ އަކުރުން ލިޔެފައި ހުންނަން ޖެހޭއިރު މިދެބާވަތުގެ އުޅަނދުތައް ފިޔަވައި އެހެން އުޅަނދުތަކުގެ ނަމްބަރު ބޯޑު ހުންނަން ވާނީ ކަޅު ކުލައިގެ ބޯޑެއްގައި ހުދު ކުލައިގެ އަކުރުން ލިޔެފައެވެ.
މި ގަވާއިދާ އެއްގޮތަށް ނަންބަރު ބޯޑުތައް ބަދަލު ކުރުމަށް ޓްރާންސްޕޯޓް މިނިސްޓްރީން އަންގާފައިވާއިރު ފުލުހުން ވަނީ އެ ބަދަލު ގެންނަން ދެ ހަފުތާގެ މުއްދަތެއް ދީފައެވެ. މި މުއްދަތުގައި ނަންބަރު ބޯޑުތައް ގަވާއިދާ ޚިލާފަށް ހުރި އުޅަނދުތައް ފާހަގަކޮށް ފުލުހުން ވަނީ ނަސޭހަތްތެރިވެފައެވެ.
