އަޅުތަކުންގެ އަޖަލު ވަނީ ކަނޑައަޅުއްވާފައި
ހުކުރު ޚުތުބާ
މާތް ﷲ ޚަލްޤުކުރައްވާ، ފުރާނަ އަޅުއްވާފައިވާ ކޮންމެ މަޚުލޫގަކީ މަރުގެ ރަހަ ދެކި، ފަނާވެދަނިވި އެއްޗެއް ކަން ހުކުރު ޚުތުބާގައި ހަނދާންކޮށްދީފިއެވެ.
"މަރަށް ތައްޔާރުވުން" މި މައުޟޫއަށް އިއްވި ޚުތުބާގައި ބުނީ ﷲގެ ޒާތުފުޅު މެނުވީ އެހެން ހުރިހާ ތަކެއްޗަކީ ފަނާވެދާނެ ތަކެތި ކަމަށެވެ. އެކަލާނގެ ވަނީ އަޅުތަކުންގެ އަޖަލު ކަނޑައަޅުއްވާ، އައްލައުހުލް މަހްފޫޒުގައި ލިޔުއްވާފައި ކަމަށާއި، ލިޔުއްވާފައިވާ ގޮތާ އެއްވެސް ތަފާތު އަދި ލަސްވުމެއް އަވަސްވުމެއް ނެތި އެމީހެއްގެ އަޖަލު އެމީހަކާ ބައްދަލުކުރާނެ ކަމަށް ޚުތުބާގައި ބުނެފައިވެއެވެ.
އިންސާނުންގެ ތެރެއިން އެކި ކަންކަމުގައި މަރުވެދާ މީހުން ވެސް ވަކިވެގެން އެދަނީ އެމީހުންގެ އަޖަލު ފުރިހަމަކޮށްފައި ކަމަށް ޚުތުބާގައި ބުނެފައިވެއެވެ. އަދި އިންސާނާގެ ގާތަށް މަރު އަންނާނެ ވަގުތެއް އޭނާއަކަށް ނޭނގޭނެ ކަމަށް ވެސް ބުނެފައިވެއެވެ.
މަރަށް ހާޒިރުވެފައިވާ ކޮންމެ އިންސާނަކަށް ވެސް މަރުގެ ވޭނާ ކުރިމަތިލާން ޖެހޭނެކަމަށް ޚުތުބާގައި ބުނެފައިވެއެވެ. ޚުދު ސަލާމާއި ސަލަވާތް ލެއްވި ކައު ސާހިބާ މުހައްމަދު صَلَّى ٱللَّٰهُ عَلَيْهِ وَسَلَّمَ މި ވޭން ތަހައްމަލުކުރެއްވިކަމަށް ޚުތުބާގައި ބުނެފައިވެއެވެ.
މުއުމިނުންނަށްވުރެ ބޮޑަށް ކާފަރުންނާއި ފާޖިރުން މަރުގެ ވޭން ތަހައްމަލުކުރާނެ ކަމަށް ޚުތުބާގައި ބުނެފައިވެއެވެ. އެމީހުންގެ ރޫހު ހަށިގަނޑުން ނުކުންނަންދެން މަލާއިކަތުން އެ ހަށިގަނޑުގައި ތަޅުއްވާނެ ކަމަށް ވެސް ޚުތުބާގައި ބުނެފައިވެއެވެ.
