ވޯލްޑް ކަޕް ފައިނަލްގައި ކުޅޭ ދެ ޓީމެއްގެ ނަން ގޫގުލްގައި އޮޅިގެން ލިޔެވިއްޖެ

މިއަހަރުގެ ނޮވެމްބަރު މަހު ޤަތަރުގައި ފަށާ ފީފާ ވޯލްޑް ކަޕްގެ ފައިނަލްގައި ކުޅޭ ދެ ޓީމުގެ ނަމެއް އޮޅިގެން ގޫގުލްގައި ޖެހިއްޖެއެވެ.

ނޮވެމްބަރު މަހުގެ 20 ވަނަ ދުވަހު މުބާރާތް ފަށާއިރު، ގޫގުލް އިން ވަނީ މުބާރާތުގެ ސްޓޭޑިއަމްތަކުގައި ކުޅޭ މެޗުތައް ހިމެނޭ ގޮތަށް، މުބާރާތުގެ ޝެޑިއުލް ހިމަނާފައެވެ. މިގޮތުން ވޯލްޑް ކަޕްގެ ފައިނަލް ކުޅުމަށް ހަމަޖެހިފައިވާ ލުސައިލް ސްޓޭޑިއަމްގައި ކުޅޭ މެޗުތައް ވެސް ގޫގުލްގައި ވަނީ ހިމަނާފައެވެ. ފައިނަލްގެ އިތުރުން އެހެން މެޗުތަކެއް ވެސް އެ ސްޓޭޑިއަމްގައި ކުޅޭނެއެވެ.

ގޫގުލްގައި "ލުސައިލް ސްޓޭޑިއަމް އިވެންޓްސް" ޖަހާފައި ސާޗު ކުރުމުން އެ ސްޓޭޑިއަމްގައި ކުޅުމަށް ހަމަޖެހިފައިވާ ނުވަ މެޗު ދައްކައެވެ. އޭގެ ތެރޭގައި ގްރޫޕް ސްޓޭޖުގެ ހަ މެޗާއި، ގަދަ 16 ގެ މެޗަކާއި، ކުއާޓާ ފައިނަލް މެޗަކާއި، ސެމީ ފައިނަލް މެޗެއްގެ އިތުރުން ފައިނަލް މެޗު ހިމެނެއެވެ.

ގޫގުލްގައި ވަނީ ލުސައިލް ސްޓޭޑިއަމްގައި ކުޅޭ ފައިނަލް މެޗުގައި ބައްދަލުކުރާ ދެ ޓީމެއްގެ ގޮތުގައި އެންމެ ފަހުގެ ޗެމްޕިއަން ފްރާންސް އާއި އެންމެ ގިނަ ފަހަރު މުބާރާތް ކާމިޔާބުކޮށްފައިވާ ބްރެޒިލް ހިމަނާފައެވެ. ނަމަވެސް މިހާރު ގޫގުލް އިން ވަނީ އެ ނަންތައް އުނިކޮށްފައެވެ.

މި ސްޓޭޑިއަމްގައި ކުޅޭ ގްރޫޕް ސްޓޭޖުގެ މެޗުތަކަކީ، އާޖެންޓީނާ އާއި ސައުދީ އަރަބިއްޔާ ބައްދަލުކުރާ މެޗު، ބްރެޒިލް އާއި ސާބިއާ ބައްދަލުކުރާ މެޗު، އާޖެންޓީނާ އާއި މެކްސިކޯ ބައްދަލުކުރާ މެޗު، ޕޯޗުގަލް އާއި އުރުގުއާއީ ބައްދަލުކުރާ މެޗު، ސައުދީ އަރަބިއާ އާއި މެކްސިކޯ ބައްދަލުކުރާ މެޗުގެ އިތުރުން ކެމަރޫން އާއި ބްރެޒިލް ބައްދަލުކުރާ މެޗެވެ.

މުބާރާތަށް ޚާއްސަކޮށްގެން ލުސައިލް ސްޓޭޑިއަމް މިހާރު ވަނީ ރަސްމީކޮށް ހުޅުވާފައެވެ. މި ސްޓޭޑިއަމް ހުންނަނީ ގަތަރުގެ ވެރިރަށް ދޯހާގައި އަލަށް އާބާދުކުރަމުން އަންނަ ލުސައިލް ސިޓީގައެވެ. ގާތްގަނޑަކަށް 675 މިލިއަން ޑޮލަރު ހަރަދުކޮށްގެން ތައްޔާރުކުރި ސްޓޭޑިއަމުގެ ޖާގައަކީ 80,000 އެވެ.