މުސާރައިގެ ކުރިއެރުމާއި ގުޅިގެން ތައުލީމީ ދާއިރާއިން އެންމެ އެދެވޭ ބަދަލު ފެންނަން އަދި ވަގުތުކޮޅެއް ނަގާނެކަމަށް އެޑިއުކޭޝަން މިނިސްޓަރު ޑރ އާއިޝަތު އަލީ ވިދާޅުވެއްޖެއެވެ.

ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި ދާންދޫ ދާއިރާގެ މެމްބަރު ޔައުޤޫބު އަބްދުﷲ ވަނީ ޓީޗަރުންގެ މުސާރަ ބޮޑުކުރަން ކުރީ ސަރުކާރުތަކުން ވެސް މަސައްކަތް ކުރަމުންދިޔަ ކަމަށާއި، ނަމަވެސް އެކަން ކޮށްދީފައިވަނީ ރައީސް ސާލިޙުގެ ސަރުކާރުންކަން ފާހަގަ ކުރައްވައި، މި ބަދަލާއެކު ތައުލީމީ ދާއިރާއަށް ކިހާ ބޮޑު ކުރިއެރުމެއް އައިސްފައިވޭތޯ ސުވާލު ކުރައްވާފައެވެ.

އެ ސުވާލަށް ދެއްވި ޖަވާބުގައި މިނިސްޓަރު ވިދާޅުވީ، ތައުލީމީ ދާއިރާގައި މުދައްރިސުންނަށް ހުރި ކަންބޮޑުވުންތައް ދެނެގަތުމަށް މި ސަރުކާރުން ދިރާސާއެއް ހަދާފައިވާ ކަމަށެވެ. އެ ދިރާސާގައި ފާހަގަ ކުރެވުނު އެންމެ ބޮޑު ކަންބޮޑުވުމަކީ މުސާރައާއި އިނާޔަތްތައް ކުޑަ ކަމުގެ ވާހަކަކަމުގައި ފާހަގަ ކުރައްވައި މިނިސްޓަރު ވިދާޅުވީ، މިހާރު މުސާރައަށް އައި ބޮޑު ބަދަލާއެކު، މި ދާއިރާއަށް ގުޅެން ބޭނުންވާ ފަރާތްތަކުގެ އަދަދު މައްޗަށް ޖެހިލާފައިވާ ކަމަށެވެ.

މިނިސްޓަރު ވިދާޅުވީ، މުސާރައިގެ ކުރިއެރުމާއި ގުޅިގެން ތައުލީމީ ދާއިރާއިން އެންމެ އެދެވޭ ބަދަލު ފެންނަން އަދި ވަގުތުކޮޅެއް ނަގާނެ ކަމަށެވެ. އެގޮތުން ޓީޗަރުންގެ މުސާރަ ބޮޑުކޮށްފައިވަނީ މެއި މަހުން ފެށިގެންނެވެ.

މިނިސްޓަރު ވަނީ މުސާރައަށް މި އައީ ހެޔޮ ބަދަލަކަށް ވާނެކަމަށް ވިދާޅުވެފައެވެ.

ޓީޗަރުންގެ މުސާރައަށް ގެނައި މި ބަދަލާއެކީ ޓީޗަރުންގެ މުސާރަތައް 56 އިންސައްތަ ބޮޑުވެފައިވެއެވެ.

ޓީޗަރުންގެ މުސާރައަށް ބަދަލު ގެނެސްފައިވަނީ، 5 ރޭންކަކަށް ބަހާލައިގެންނެވެ. އޭގެ ތެރެއިން ޑިޕްލޮމާ ފެންވަރުގެ ޓީޗަރެއްގެ މުސާރަ 10،000ން 13،000ށް އިތުރުވެގެންދާއިރު، ޑިގްރީ ފެންވަރުގެ ޓީޗަރުންގެ މުސާރަ 13،000ން 19،000ށް ބޮޑުވެގެންދެއެވެ. މާސްޓަރސް ފެންވަރުގެ ޓީޗަރުންގެ މުސާރަ 15،000ން 20،000ށް އިތުރުވެގެންދެއެވެ.

ޓީޗަރުންގެ މުސާރައަށް މި އައި ބޮޑު ބަދަލުގެ އަސަރު ރާއްޖޭގައި މަސައްކަތްކުރާ 6815 ޓީޗަރުންގެ މުސާރައިން ފެންނާނެކަން މިނިސްޓްރީން ފާހަގަކޮށްފައިވެއެވެ.

މި ޖަލްސާގައި އިތުރަށް ދެއްކެވި ވާހަކަފުޅުގައި މިނިސްޓަރު ވަނީ 157 ސްކޫލެއް އެއްދަންފަޅިއަށް ބަދަލު ކުރެވިފައިވާކަން ފާހަގަ ކުރައްވައި، އެއްދަންފަޅިއަށް ބަދަލު ކުރުމުން ވަށާޖެހޭ ތައުލީމެއް އޮތުމުގެ މުހިއްމުކަމަށްވެސް އަލިއަޅުވާލައްވާފައެވެ. އެގޮތުން 44 ސްކޫލެއްގައި އެކަން ފަށައިގެން ކުރިއަށް އެބަދާކަން މިނިސްޓަރ ފާހަގަ ކުރެއްވިއެވެ.

އެހެންނަމަވެސް، ހުރިހާ ސްކޫލެއް އެއްދަންފަޅިއަށް ބަދަލުކޮށް، ވަށާޖެހޭ ތައުލީމެއް ދިނުމުގައި އަދިވެސް ގޮންޖެހުންތަކެއް އެބަހުރިކަމަށް މިނިސްޓަރު ވިދާޅުވިއެވެ.

މިނިސްޓަރު އިތުރަށް ވިދާޅުވީ، މާލޭ ދާއިރާގައި މިހާރު އެއްދަންފަޅިއަށް ހިންގަނީ 2 ސްކޫލެއް ކަމަށާއި، ކުރިއަށް އޮތް ދުވަސްތަކުގައި އިތުރު ސްކޫލުތައް އެއްދަންފަޅިއަށް ބަދަލު ކުރެވިގެންދާނެ ކަމަށެވެ.