އަލިފުށީ ސްކޫލްގެ މުދައްރިސުން ކަޅު ހެދުމުގައި މަސައްކަތަށް ނުކުމެ، އެމީހުންގެ ޙައްޤުތައް ހޯދުމަށް އަޑު އުފުލައިފި
އަލިފުށީ ސްކޫލްގެ މުދައްރިސުން ކަޅު ހެދުމުގައި މަސައްކަތަށް ނުކުތީ ދައުލަތުގެ މުސާރައިގެ އޮނިގަނޑު އެކުލަވާލުމަށް ފަހު ދެ އަހަރު ވާއިރު ވަޒީފާގެ ކުރިއެރުން ނުލިބޭތީ އެވެ. 1 މޭ 2022 އިން ފެށިގެން ދެ އަހަރު ފަހުން ލިބެން ޖެހޭ ޕްރޮމޯޝަން މިހާތަނަށް ވެސް ނުދީ ތައުލީމީ ދާއިރާއަށް ވަކި އުސޫލެއް ގެންގުޅޭ ކަމަށް މުދައްރިސުން ތުހުމަތު ކުރެ އެވެ.
އަލިފުށީގެ މުދައްރިސުން ކަޅު ހެދުމުގައި ސްކޫލަށް ހާޒިރުވުމަށް ފަހު ނަގާފައިވާ ފޮޓޯ އެއް
އަލިފުށީ ސްކޫލްގެ މުދައްރިސުން ކަޅު ހެދުމުގައި މަސައްކަތަށް ނުކުމެ، އެމީހުންގެ ޙައްޤުތައް ހޯދުމަށް އަޑު އުފުލައިފި އެވެ.
ރާއްޖެ އެމްވީ އަށް މައުލޫމާތު ދެމުން ނަން ހާމަ ނުކުރުމަށް ޝަރުތުކޮށް އިތުބާރު ހުރި މަސްދަރަކުން ބުނީ ބުރާސްފަތި ދުވަހު މުދައްރިސުން ކަޅު ހެދުމުގައި ސްކޫލަށް ދިޔަ ނަމަވެސް އެއްވެސް އިހުތިޖާޖެއް ކޮށްފައި ނުވާނެ ކަމަށެވެ. އަދި ދަރިވަރުންގެ ކިޔެވުމަށް ހުރަސް އެޅޭނެ ފަދަ ކަމެއް ވެސް ކޮށްފައި ނުވާނެ ކަމަށް އޭނާ ވަނީ ބުނެފަ އެވެ.
އޭނާ ބުނީ ދައުލަތުގެ މުސާރައިގެ އޮނިގަނޑު އެކުލަވާލާ އެންމެ ފުރަތަމަ ބޮޑު ކުރި މުސާރަ މުދައްރިސުންނަށް ދޭން ފެށި 1 މޭއި 2022 ގައި ކަމަށެވެ. އެ އޮނިގަނދުގައި ބުނާ ގޮތުން މުސާރަ ބޮޑު ކުރާތާ ދެ އަހަރު ވާ އިރު ވަކި އުސޫލުތަކެއްގެ ދަށުން މުދައްރިސުންގެ މުސާރަ ބޮޑުކޮށް، މަޤާމުގެ ކުރިއެރުން ދޭނެ ކަމަށް ވަނީ ބުނެފަ އެވެ،
"އެ އޮނިގަނޑު ބުނާ ގޮތުން ދެ އަހަރު ވީމަ މުސާރަ ބޮޑުވޭ. އާ ޕޭ ފްރޭމް ވަރކް ބުނާ ގޮތުން އޮތީ އެހެން. ދެ އަހަރު ވުމުން ޕީއޭ މާކްސް އަށް ބެލުމަށް ފަހު ވަޒިފާގެ ކުރިއެރުން ލިބެން ޖެހޭ. 1 މޭއި 2024 އަށް އެ މާރކްސް ހަމަ ވެފައި ހުރި އެންމެންނަށް ވަޒީފާގެ ކުރިއެރުން ލިބެން ވާނެ. އެގޮތަށް ބަލާ ނަމަ ކުރިއަށް އޮތް 5 މަސް ތެރޭގައި 2 ވަނަ ފަހަރަށް ޕްރޮމޯޝަން ހަމަވާނެ." އޭނާ ކިޔާދިނެވެ.
އޭނާ ބުނީ ޕޭ ފްރޭމްވަރކް އަށް އަމަލުކުރުމުގައި ތަފާތުކުރުންތަކެއް ގެންގުޅޭ ކަމަށެވެ. ޚާއްސަކޮށް ތައުލީމީ ދާއިރާ އަށް ވަކި އުސޫލެއް ގެންގުޅޭ ކަަމަށް އޭނާ ތުހުމަތު ކުރި އެވެ. މުސާރައިގެ ކުރިއެރުން ނުދޭ ނަމަ އެއްވެސް ބަޔަަކަށް އެކަން ކޮށްދީގެން ނުވާނެ ކަމަށް އޭނާ ވަނީ ފާހަގަކޮށްފަ އެވެ.
"2024 ވަނަ އަހަރު ލިބެން ޖެހޭ އެއްޗެއްގެ ވާހަކަ މި ދައްކަނީ. މިހާރު 2025 ނިމި 2026ގެ މޭއި އަންނަން ކައިރި ވަނީ." އޭނާ ވަނީ ބުނެފަ އެވެ.
އެނގިފައިވާ ގޮތުން އަލިފުށީ ގައި މުދައްރިސުން ވަނީ މީގެ ދެ މަހެއްހާ ދުވަސް ކުރިން ޕްރައިޒް ޑޭގައި އެޑިއުކޭޝަންގެ ސްޓޭޓް މިނިސްޓަރަކު އެ ރަށަށް ދިއުމުން ވެސް މި ޝަކުވާ ކޮށްފަ އެވެ. އޭރު އޭނާ ވަނީ މި މައްސަލައިގައި މުދައްރިސުންނަށް ލިޔުމުން ޖަވާބުދެއްވާނެ ކަމަށް ވިދާޅުވެފަ އެވެ. ނަމަވެސް މިހާތަނަށް ވެސް އެއްވެސް ޖަވާބެއް އެޑިއުކޭޝަން މިނިސްޓްރީ އިން ވެސް އަދި އެހެން ފަރާތަކުން ވެސް އަލިފުށީ މުދައްރިސުންނަށް އެއްވެސް ޖަވާބެއް ދީފަ އެއް ނުވެ އެވެ.
