އިއުތިސާމްގެ މައްޗަށް ކުރާ ދައުވާ ނިމުމާއި ހަމައަށް
28 ސެޕްޓެމްބަރު 2022 | ބުދަ 05:46ދިރާސާ ކުރުމުގެ ތެރޭގައި އިތުރު ކަމެއް ސާފުކުރަން ނެތްނަމަ ދެން އޮންނާނީ މައްސަލައިގެ ޙުކުމް ކުރެއްވުން
ކްރިމިނަލް ކޯޓް
2017 ވަނަ އަހަރު އައިއީޑީއެއް ތައްޔާރުކުރުމަށް ބޭނުންވާ ތަކެއްޗާއި ކެމިކަލް، ތަނެއްގެ ތެރޭގައި ތައްޔާރުކޮށް އައިއީޑީއެއް ހަދާ އެ ގޮއްވާލުމަށް ރާވަމުންދާކަމުގެ ތުހުމަތުގައި ޓެރަރިޒަމާ ގުޅޭ ދައުވާއެއް އުފުލާފައިވާ އިއުތިސާމް މުހައްމަދު ސައީދު، ގަމަރީ/ ގދ. މަޑަވެލި ގެ މައްޗަށް ކުރާ ދައުވާގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒް ރަޝާދެވެ.
މި މައްސަލައިގައި މީގެ ކުރިން ވަނީ ހެކިބަސް ނަގާ ނިމިފައެވެ. ބުދަ ދުވަހުގެ އަޑުއެހުމަކީ މި މައްސަލައިގެ ހެއްކާ ގުޅޭގޮތުން ވާހަކަ ދެއްކުމާއި ޚުލާސާ ބަޔާން އިއްވުމެވެ.
ދައުލަތުން ބުނާ ގޮތުގައި އޭނާގެ މޯބައިލް ފޯނާއި، އޭނާގެ ކޮޓަރިން ފެނުނު ޕެންޑްރައިވްގެ އިތުރުން، އިތުރު ފޯނެއް ޗެކްކުރިއިރު، ޓެރަރިސްޓް ޖަމާއަތެއްކަަމަށްވާ އައިސިސްއަށް ތާއީދުކުރާކަން ދޭހަވާފަދަ ތަކެތި ފެނިފައިވެއެވެ. އޭގެ ތެރޭގައި އައިސިސްގެ ލޯގޯއެއްގެ ފޮޓޯއަކާއި، ބައެއް ލިއުންތައް ހިމެނޭކަމަށް ދައުލަތުން ބުނެއެވެ.
އޭނާއަކީ ހަރުކަށި ފިކުރުގެ މައްސަލައިގައި އައްޑޫސިޓީން ހައްޔަރު ކުރި މީހުންގެ ތެރޭގައިވެސް ހިމެނޭ މީހެކެވެ. އިއުތިސާމް މުހައްމަދު ސައީދު އޭރު ހައްޔަރުކުރީ، އެ މައްސަލައިގައި ހިމެނޭ ހއ ހޯރަފުށީ އަލަނާސިގޭ މުހައްމަދު ތަސްލީމް ޓެރަރިޒަމް އަމަލުތައް ހިންގުމަށް އަމަލީގޮތުން މަސައްކަތްކޮށް، ހަރުކަށި ފިކުރު ފެތުރުމާއި ޓެރަރިޒަމްގެ އަމަލްތައް ހިންގުމަށް ހިތްވަރުދީ، އަދި ގޮވާތަކެތި ހެދުމުގެ މައުލޫމާތު އެހެން މީހުނަށް ފޯރުކޮށްދޭކަމަށް ތުހުމަތުކުރެވޭ މައްސަލައިގައި އިއުތިސާމް މުހައްމަދު ސައީދުގެ ބައިވެރިވުން އޮތްކަމަށް ތުހުމަތު ކުރެވިގެންނެވެ.
މުހައްމަދު ތަސްލީމަކީ ރައީސް މުޙައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅިގެންވެސް ދައުވާ އުފުލައި ޝަރީއަތް ހިންގެމުންދާ ފަރާތެކެވެ.
ދިފާއުން ބުނާ ގޮތުގައި މި މައްސަލައިގައި ހިމެނޭ ޕެންޑްރައިވްގެ ހަގީގަތް ތަހުގީގު މަރުޙަލާގައިވެސް ވަނީ ކިޔާދީފައެވެ. އަދި މި ދައުވާއާއި ގުޅިގެން ފުލުހުން ހޯދާފައިވާ ހެކިތަކަކީ އިއުތިސާމްއަށް އޭގެ މައުލޫމާތެއް އެނގިފައިވާ ހެކިތަކެއް ނޫންކަމަށް ދިފާއުން ބުނެއެވެ.
މި މައްސަލަ ދިރާސާ ކުރެއްވުމުގެ ތެރޭގައި އިތުރު ކަމެއް ސާފުކުރަން ނެތްނަމަ ދެން އޮންނާނީ މައްސަލައިގެ ޙުކުމް ކުރެއްވުމެވެ.
